ក្រុមប្រឹក្សាអភិវឌ្ឍន៍កម្ពុជា​អនុម័តគម្រោង​បង្កើតរោងចក្រ​ចំនួន ៦ មានទឹកប្រាក់​ប្រមាណ ៨០ លានដុល្លារ​

​តាមសំណើសុំវិនិយោគរបស់ក្រុមហ៊ុន​ គណៈកម្មាធិការវិនិយោគកម្ពុជានៃក្រុមប្រឹក្សា​អភិវឌ្ឍន៍​កម្ពុជា (CDC) បានសម្រេចចេញវិញ្ញាបនបត្រចុះបញ្ជីគម្រោងវិនិយោគ ជូនដល់ក្រុមហ៊ុនចំនួន ៦ បន្ថែមទៀត ដែលមានទឹកប្រាក់ប្រមាណ ៨០ លានដុល្លារ និងបង្កើតការងារជាង ២ ពាន់កន្លែង។

១. គម្រោងបង្កើតរោងចក្រផលិតសំបកកំប៉ុង របស់ក្រុមហ៊ុន BAOSTEEL CAN MAKING (CAMBODIA) CO., LTD មានទីតាំងវិនិយោគស្ថិតនៅភូមិក្រាំងលាវ ឃុំសំបូរ ស្រុកសំរោងទង ខេត្តកំពង់ស្ពឺ មានទុនវិនិយោគប្រមាណ ៥០,៧ លានដុល្លារអាម៉េរិក និងអាចបង្កើតការងារបានចំនួន ១៥៥កន្លែង។

២. គម្រោងបង្កើតរោងចក្រដំឡើងរថយន្ត របស់ក្រុមហ៊ុន GTV MOTOR CO., LTD. ដែលមានទីតាំងវិនិយោគស្ថិតនៅអគារលេខ ៦ A និង ៦ B ផ្លូវជាតិលេ៣ ភូមិអង្រ្គង ឃុំអង្គពពេល ស្រុកគងពិសី ខេត្តកំពង់ស្ពឺ មានទុនវិនិយោគប្រមាណ ១៥,៦លានដុល្លារអាម៉េរិក និងអាចបង្កើតការងារបានចំនួន ៧៣៨កន្លែង។

៣. គម្រោងបង្កើតរោងចក្រកែច្នៃដើមឫស្សីរបស់ក្រុមហ៊ុន GLOTEC (CAMBODIA) CO., LTD. ដែលមានទីតាំងវិនិយោគស្ថិតនៅភូមិអញ្ចាញ ឃុំក្តុលសែនជ័យ ស្រុកទឹកផុស ខេត្តកំពង់ឆ្នាំង មានទុនវិនិយោគប្រមាណ ៤,៣លានដុល្លារអាម៉េរិក និងអាចបង្កើតការងារបានចំនួន ១៤១កន្លែង។

៤. គម្រោងបង្កើតរោងចក្រផលិតថង់ប្លាស្ទិករបស់ក្រុមហ៊ុន ECKL PACKAGING CO., LTD. ដែលមានទីតាំងវិនិយោគស្ថិតនៅភូមិព្រៃខ្លា ឃុំក្រាំងម្កាក់ ស្រុកអង្គស្នួល ខេត្តកណ្តាល មានទុនវិនិយោគប្រមាណ ៣,១លានដុល្លារអាម៉េរិក និងអាចបង្កើតការងារបានចំនួន ២៣៤កន្លែង។

៥. គម្រោងបង្កើតរោងចក្រផលិតគ្រឿងសង្ហារិម (គ្រោងធ្វើពីអាលុយមីញ៉ូម ដែក និងជ័រ) របស់ក្រុមហ៊ុន KONDA FURNITURE CO., LTD. ដែលមានទីតាំងវិនិយោគស្ថិតនៅភូមិកប់ចិន ឃុំសំបូរ ស្រុកសំរោងទង ខេត្តកំពង់ស្ពឺ មានទុនវិនិយោគប្រមាណ ២,៣លានដុល្លារអាម៉េរិក និងអាចបង្កើតការងារបានចំនួន ២៥៣កន្លែង។

៦. គម្រោងបង្កើតរោងចក្រកាត់ដេរសម្លៀកបំពាក់របស់ក្រុមហ៊ុន K FINE (CAMBODIA) GARMENT CO., LTD. ដែលមានទីតាំងវិនិយោគស្ថិតនៅអគារ A ផ្លូវពៅរតនា ភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ មានទុនវិនិយោគប្រមាណ ៣,៩លានដុល្លារអាម៉េរិក និងអាចបង្កើតការងារបានចំនួន ១.២២០កន្លែង៕