កម្ពុជា សម្រេចសមិទ្ធផលធំលើការចុះ MOU នាំចេញទឹកមាត់ត្រចៀកកាំទៅប្រទេសចិន

កម្ពុជា បានចុះហត្ថលេខាលើអនុស្សរណៈយោគយល់គ្នា (MOU) ស្តីពី ” ការនាំចេញផលិតផលសម្បុកត្រចៀកកាំ​ទៅកាន់សាធារណរដ្ឋប្រជាមានិតចិន” នៅរសៀលថ្ងៃទី ០៨ ខែ សីហានេះ។

រដ្ឋមន្រ្តីក្រសួងកសិកម្ម លោក វេង សាខុន សម្តែងការសាទរចំពោះសមិទ្ធផលដែលសម្រេចបានរវាងមជ្ឈមណ្ឌល Cambodia (Xiamen) Commercial Center សហការជាមួយអគ្គនាយកដ្ឋានកសិកម្មក្នុងការជំរុញ លើកទឹកចិត្ត និងគាំទ្រផលិតផលកសិកម្មថ្មីមួយទៀត ដែលបានបើកទីផ្សារទឹកមាត់ត្រចៀកកាំកម្ពុជាឲ្យនាំ​ចេញទៅកាន់ទីផ្សារចិននាពេលអនាគតដ៏ខ្លី។

លោក បានវាយតម្លៃខ្ពស់លើលទ្ធផលនៃការខិតខំប្រឹង ប្រែងរបស់ភាគីទាំងពីរ ដែលឈានមកដល់ការចុះហត្ថលេខា​លើឯកសារ MOU នាពេលនេះ។

លោករដ្ឋមន្រ្តី បានគូសបញ្ជាក់ថា ទឹកមាត់ត្រចៀកកម្មកម្ពុជា កន្លងមកផលិតសម្រាប់ផ្គត់ផ្គង់ឲ្យទីផ្សារក្នុងស្រុក និងមានការនាំចេញក្នុងបរិមាណតិចតូច និងក្រៅផ្លូវការ។ លោកថា ឯកសារ MOU ដែលនឹងចុះហត្ថលេខានេះ នឹងជួយបើកទីផ្សារចិនដែលជាទីផ្សារធំជាងគេឲ្យទទួលយកផលិតផលមួយនេះជាផ្លូវការ ធានាបាននូវស្តង់ដាផលិត គុណភាពផលិតផល និងសុវត្ថិភាពសម្រាប់សុខភាពសាធារណ: ឆ្លើយតបបានតាមលក្ខខណ្ឌតម្រូវភូតគាម​អនាម័យនៃអគ្គនាយកដ្ឋានគយចិន។

សូមរំលឹកថា កាលពីថ្ងៃ​ទី២២ ខែមិថុនា ឆ្នាំ២០២២ អគ្គនាយកដ្ឋានកសិកម្ម​បាន​ទទួល​ជួប​ពិភាក្សា​ការងារ​ជា​មួយមជ្ឈមណ្ឌល Cambodia (Xiamen) Commercial Center ដែលជា​តំណាង​មជ្ឈមណ្ឌល​ពាណិជ្ជកម្ម​កម្ពុជាប្រចាំទីក្រុង Xiamen នៃខេត្ត Fujian។ មជ្ឈមណ្ឌលនេះ​កំពុង​សហការ​ជាមួយក្រុមហ៊ុន Southeast Yandu (Xiamen) Industrial Development Co., Ltd រៀបចំផែន​ការ​​​​​​វិនិយោគ​ក្នុង​ការកសាង​ហេដ្ឋា​រចនា​សម្ព័ន្ធ​ប្រមូលទិញ និងកែច្នៃ​សម្បុកត្រចៀកកាំនៅកម្ពុជា ដើម្បីនាំចេញទៅប្រទេសចិន។

ប្រធានមជ្ឈមណ្ឌល Cambodia (Xiamen) Commercial Center បានលើកឡើងថាមជ្ឈមណ្ឌល គ្រោងនឹងបង្កើតរោងចក្រកែច្នៃទឹកមាត់ត្រចៀកកាំនៅកម្ពុជា នាពេលអនាគតដ៏ខ្លី។

យោងតាមស្ថិតិ​​របស់រដ្ឋបាលព្រៃឈើនៃអគ្គនាយកដ្ឋានកសិកម្ម ក្នុងឆ្នាំ២០២០ បានឱ្យដឹងថា នៅទូទាំងប្រទេស មាន​ផ្ទះត្រចៀកកាំចំនួន ​៨៧២​ផ្ទះ និងអាចផ្តល់ផលចន្លោះពី ១តោន-១,៥តោន/ខែ។​ ​សម្បុកត្រចៀកកាំ​ទើបប្រមូល មានតម្លៃចាប់ពី ៧០០-៩០០ដុល្លារ​ ក្នុងមួយគីឡូក្រាម និងសម្បុកត្រចៀកកាំ ដែល​អាច​បរិភោគបាន មានតម្លៃ​ចាប់ពី ១ ៥០០-២ ០០០ដុល្លារ ក្នុងមួយគីឡូក្រាម៕