ប្រធានសមាគមពាណិជ្ជកម្មកម្ពុជាជប៉ុន៖ មានក្រុមហ៊ុនជប៉ុនជាង ២៥០ នៅកម្ពុជា

ប្រធានសមាគមពាណិជ្ជកម្មកម្ពុជាជប៉ុន បានមានប្រសាសន៍ថា រហូតមកដល់ពេលនេះមានក្រុមហ៊ុនជប៉ុនប្រមាណជាង ២៥០ ក្រុមហ៊ុន កំពុងវិនិយោគនៅប្រទេសកម្ពុជា ភាគច្រើនផ្តោតលើវិស័យទូទៅដូចជា ធនាគារ វិស័យសំណង់ និងវិស័យធានារ៉ាប់រងជាដើម។

ថ្លែងប្រាប់អ្នកសារព័ត៌មានក្រោយចូលរួមជំនួបពយភាក្សាជាមួយ អ្នកជំនួញជោគជ័យនៅប្រទេសកម្ពុជា នៅព្រឹកថ្ងៃទី ២៦ ខែសីហានេះ លោក កាន់ដាយូហ្គូ (KANDA YOGO) ប្រធានសមាគមពាណិជ្ជកម្មកម្ពុជាជប៉ុន បានបន្តថា ក្រុមហ៊ុនជប៉ុនជាង ២៥០ នេះគឺក្រុមហ៊ុនដែលបានចុះបញ្ជីនៅសមាគមទេ។ ប៉ុន្តែមានក្រុហ៊ុនច្រើនទៀតដែលកំពុងវិនិយោគនៅកម្ពុជា តែមិនបានចុះបញ្ជីជាមួយសមាគម។

លោកបានបន្តទៀតថា ក្នុងចំណោមក្រុមហ៊ុនជាង ២៥០ ក្នុងនោះមាន ២៥ ភាគរយវិនិយោគលើវិស័យកម្មមន្តសាល ២៥ ភាគរយវិនិយោគលើពាណិជ្ជកម្ម និងសេវាកម្ម និង ៥០ ភាគរយទៀតវិនិយោគលើវិស័យទូទៅ ដូចជាធនាគារ វិស័យសំណង់ និងវិស័យធានារ៉ាប់រងជាដើម។

លោកបានបន្ថែមថា ប៉ុន្តែបើគិតត្រឹមឆមាសទី១ ឆ្នាំ២០២២នេះ មានក្រុមហ៊ុនហ៊ុនជប៉ុនថ្មីបានមកបោះទុនវិនិយោគនៅកម្ពុជាចំនួន ៨ ក្រុមហ៊ុន ហើយលោកសង្ឃឹមថា នៅឆ្នាំ២០២៣ ខាងមុខនេះ នឹងមានក្រុហ៊ុនជប៉ុនជាច្រើនទៀតមកវិនិយោគនៅកម្ពុជា ដោយសារកម្ពុជាបានទប់ស្កាត់ជំងឺកូវីដ-១៩បានល្អប្រសើរ៕

អត្ថបទ៖ សំអឿន