សេដ្ឋកិច្ច

វិស័យខុនដូ មានទីផ្សារឡើងវិញ នៅត្រីមាសទី២

បានផុស

២ years មុន

នៅ

ថ្ងៃអង្គារ ៦ កញ្ញា ២០២២

ដោយ

ភាពល្អប្រសើរនៃម៉ាក្រូសេដ្ឋកិច្ច តាមរយៈអត្រាដ៏ខ្ពស់នៃចំនួនប្រជាពលរដ្ឋក្នុងស្រុកដែលបានចាក់វ៉ាក់សាំងប្រឆាំងនឹងជំងឺកូវីដ ១៩ កំណើននៃការនាំចេញទំនិញទៅទីផ្សារអន្តរជាតិ ការមកដល់នៃភ្ញៀវទេសចរអន្តរជាតិ (មិនមានការធ្វើចត្តាឡីស័ក) និងការកសាងហេដ្ឋារចនាសម្ព័ន្ធថ្មីៗ បានធ្វើឱ្យទីផ្សារអចលនទ្រព្យ រួមទាំងទីផ្សារខុនដូនៅកម្ពុជា ចាប់ផ្តើមបង្ហាញសញ្ញាវិជ្ជមានឡើងវិញបណ្តើរៗហើយ។ នេះបើតាមរបាយការណ៍របស់ក្រុមហ៊ុនអចលនទ្រព្យ CBRE Cambodia។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របាយការណ៍ដដែល បានឱ្យដឹងថា នៅរាជធានីភ្នំពេញក្នុងត្រីមាសទី២ ឆ្នាំ ២០២២ មានគម្រោងអភិវឌ្ឍន៍ខុនដូចំនួន ៤ ប្រភេទតម្លៃមធ្យម(Mid-Range) និងប្រភេទតម្លៃសមរម្យ (Affordable) បានបញ្ចប់ការសាងសង់ និងដាក់ចូលក្នុងទីផ្សារ ដែលគម្រោងទាំង ៤ នេះមានបន្ទប់ស្នាក់នៅសរុប ៣ ២០៤ យូនីត។ គិតត្រឹមចុងត្រីមាសទី ២ ឆ្នាំ ២០២២ ចំនួនបន្ទប់ខុនដូក្នុងរាជធានីភ្នំពេញ បានកើនដល់ជាង ៣៦ ០០០ យូនីត។ ពោលគឺចំនួននេះកើនឡើង ៩,៥ ភាគរយ បើធៀបនឹងត្រីមាសទី១ ឆ្នាំ ២០២២ ខណៈតម្លៃទិញ-លក់ និងជួលខុនដូ មានកំណើនឡើងវិញ បន្ទាប់ពីធ្លាក់ចុះប្រមាណ ២ ឆ្នាំ ដោយសារវិបត្តិនៃការឆ្លងរាលដាលជំងឺកូវីដ ១៩។

សម្រាប់បន្ទប់ខុនដូប្រណីត (High-End) មានតម្លៃលក់ជាមធ្យម ២ ៦៧១ ដុល្លារក្នុង ១ ម៉ែត្រការ៉េ កើនឡើង ១,៥ ភាគរយបើធៀបនឹងត្រីមាសទី១ ឆ្នាំ ២០២២, បន្ទប់ខុនដូតម្លៃមធ្យម (Mid-Range) មានតម្លៃមធ្យម ២ ០៩៦ ដុល្លារ កើន ២,៧ ភាគរយ និងប្រភេទតម្លៃសមរម្យ (Affordable) មានតម្លៃ ១ ៤១២ ដុល្លារកើនឡើង ០,៧ ភាគរយ។
រីឯតម្លៃជួលគឺខុនដូប្រណីត (High-End) មានតម្លៃជាមធ្យម ១១ ដុល្លារក្នុង ១ ម៉ែត្រការ៉េសម្រាប់ ១ ខែ កើនឡើង ២,៣ ភាគរយ, ប្រភេទតម្លៃមធ្យម (Mid-Range) មានតម្លៃ ៩,៦ ដុល្លារ កើន ៣,៣ ភាគរយ និងប្រភេទតម្លៃសមរម្យ (Affordable) មានតម្លៃ ៧,៩ ដុល្លារ កើនឡើង ១,២ ភាគរយ។

សូមបញ្ជាក់ថា ក្រសួងរៀបចំដែនដី នគរូបនីយកម្ម និងសំណង់ បានអនុម័តលើគម្រោងសាងសង់សរុប ២ ០០០ គម្រោង ដែលមានផ្ទៃក្រឡាសំណង់ ២ ៨៥៩ ៨៧៧ ម៉ែត្រការ៉េ និងមានទុនវិនិយោគ ១ ២០៦ លានដុល្លារ។ ចំនួនអគារខ្ពស់ៗ ចាប់ពី ៥ ជាន់ឡើងនៅទូទាំងប្រទេសមានចំនួន ២ ៤៧២ អគារ ចំណែកបុរីលំនៅឋាន និងបណ្តុំលំនៅឋានមានលក្ខណៈជាបុរី មានចំនួន ៤៨២ គម្រោង។ នេះបើយោងតាមទិន្នន័យចុងក្រោយរបស់ក្រសួងរៀបចំដែនដី នគរូបនីយកម្ម និងសំណង់ នៅក្នុងឆមាសទី ១ ឆ្នាំ ២០២២នេះ៕

Related Topics:អចលនទ្រព្យ