ព័ត៌មានជាតិ

លោក សុខ ឥសាន៖ ថវិកាដែលបានមកពីតំណក់ប្រេង រាជរដ្ឋាភិបាលជាអ្នកគ្រប់គ្រង ក្រុមក្រៅ ច្បាប់គ្មានវាសនាទេ

បានផុស

៥ years មុន

នៅ

ថ្ងៃសៅរ៍ ២ មករា ២០២១

ដោយ

អ្នកនាំពាក្យគណបក្សប្រជាជនកម្ពុជា លោក សុខ ឥសាន បានអះអាងថា ថវិកាដែលបានមកពីតំ ណក់ប្រេងនាពេលនេះ គឺរាជរដ្ឋាភិបាលគណបក្សប្រជាជនកម្ពុជា ជាអ្នកគ្រប់គ្រង និងទុកដាក់ ចាយវាយសម្រាប់ផលប្រយោជន៏ជាតិ និងប្រជាជនកម្ពុជា ចំណែកក្រុមឧទ្ទាមក្រៅច្បាប់គ្មានវាសនាបានកាន់លុយនេះទេ។

លោក សុខ ឥសាន បញ្ជាក់យ៉ាងនេះថា “តំណក់ប្រេងបានមក គឺរាជរដ្ឋាភិបាលកម្ពុជារបស់ គណ បក្សប្រជាជនកម្ពុជា ជាអ្នកគ្រប់គ្រង និងចាយវាយសម្រាប់ផលប្រយោជន៍ជាតិ និងប្រជាជនកម្ពុជា។ ក្រុមឧទ្ទាមក្រៅច្បាប់គ្មានវាសនាបានកាន់លុយបានពីថ្លៃប្រេងនោះទេ?”។ បើតាមលោក សុខ ឥសាន អ្នកព្រួយបារម្ភពីការចាយវាយលុយប្រេង គ្រាន់តែមនុស្សម្នាក់ ក្នុងចំណោម១៦លាននាក់ប៉ុណ្ណោះ មិនមែនតំណាងប្រជាជនកម្ពុជាទេ។

ការលើកឡើងរបស់លោក សុខ ឥសាន បានធ្វើឡើងតាមរយៈសារអេឡិកត្រូនិកតេឡេក្រាម នៅព្រឹកថ្ងៃទី០២ ខែមករា ឆ្នាំ២០២១នេះ និងបន្ទាប់ពីក្រុមប្រឆាំងផ្កាប់មុខ ដែលកំពុងនីរទេសខ្លួននៅក្រៅបរទេស ហើយដែលត្រូវបានចាត់ទុកថា ជាក្រុមឧទ្ទាមក្រៅច្បាប់ បានស្រែកក្តែងៗតាមរយៈបណ្តាញផ្សព្វផ្សាយ ដែលបំរើឲ្យនយោបាយពួកគេ អំពីប្រាក់ចំណូលដែលបានមកពីដំណក់ប្រេងរបស់កម្ពុជា។

សូមបញ្ជាក់ថា កម្ពុជាបានទទួលផលពីតំណក់ប្រេងជាលើកដំបូងរបស់ខ្លួន ដោយចាប់ផ្តើមផលិតចេញពីអណ្តូងប្រេងទី១ឈ្មោះ A-0ID នៃផ្លាតហ្វម A នៅក្នុងប្លុក នៃឈូងសមុទ្រកម្ពុជា កាលពីថ្ងៃទី២៩ ខែធ្នូ ឆ្នាំ២០២០ ហើយការទទួលបានតំណក់ប្រេងជាលើកដំបូងនេះ ក៏គាប់ជួនជាមួយខួបលើកទី២២ នៃការបញ្ចប់សង្គ្រាមនាំមកនូវការឯកភាពជាតិ ឯកភាពទឹកដី តាមរយៈនយោបាយឈ្នះ ឈ្នះ (២៩ធ្នូ ១៩៩៨-២៩ ធ្នូ ២០២០) របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជាផងដែរ។

សម្ដេចតេជោ ហ៊ុន សែន បានបញ្ជាក់ដែរថា ថវិកាបានពីការលក់ប្រេងដំបូងរបស់កម្ពុជា នឹងយកទៅប្រើប្រាស់ក្នុងវិស័យអាទិភាព២ គឺវិស័យអប់រំ និងវិស័យសុខាភិបាល ដែលជាវិស័យសំខាន់សម្រាប់កម្ពុជា ហើយក៏សម្ដេចបានចាត់ទុកដំណក់ប្រេងលើកដំបូងរបស់កម្ពុជា ជាពរជ័យជូនចំពោះប្រជាជាតិកម្ពុជាផងដែរ៕

អត្ថបទ ៖ កោះកែវ