តម្លៃភាគហ៊ុន របស់សាជីវកម្មផលិតអាវុធ ក្នុងរដ្ឋសមាជិកណាតូ ហក់ឡើងខ្ពស់

តម្លៃភាគហ៊ុនរបស់សាជីវកម្មយោធា និងការពារធំៗនៃរដ្ឋសមាជិកណាតូ មានការកើនឡើង ២១,៥% ក្នុងឆ្នាំ២០២២ ចំពេលប្រតិបត្តិការយោធានៅអ៊ុយក្រែន និងការបំពាក់អាវុធឡើងវិញនៅតំបន់អឺរ៉ុបខាងលិច។ នេះបើតាមការចុះផ្សាយរបស់កាសែត Moscow Daily Vedomosti នៅថ្ងៃព្រហស្បតិ៍ទី១២ខែមករា ដោយដកស្រង់ទិន្នន័យពី Defense News និង Tradingview analytics។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការប៉ាន់ស្មាន មូលធននីយកម្មទីផ្សាររួមរបស់សាជីវកម្មទាំងនោះ បានកើនឡើងពី៥៧៩ពាន់លានដុល្លារក្នុងខែធ្នូឆ្នាំ២០២១ ដល់៧០៣ពាន់លានដុល្លារក្នុងខែធ្នូឆ្នាំ២០២២។

អ្នកនិពន្ធនៃរបាយការណ៍នេះ បានដាក់ឈ្មោះក្រុមហ៊ុនផលិតអាវុធអាល្លឺម៉ង់ Rheinmetall ថាជាអ្នកទទួលបានតម្លៃភាគហ៊ុនច្រើនជាងគេក្នុងរយៈពេល១២ខែចុងក្រោយ ពោលគឺកើនឡើង ១២២%។

ស្របពេលជាមួយគ្នានោះ តម្លៃភាគហ៊ុនរបស់ក្រុមហ៊ុនផលិតដ្រូននិងមីស៊ីលបារាំងឈ្មោះ Thales មានការកើនឡើង៥៤%។ ចំណែកភាគហ៊ុនរបស់ក្រុមហ៊ុនម៉ៅការការពារជាតិអាមេរិក Northrop Grumman មានការកើនឡើង៤៤% ខណៈក្រុមហ៊ុនផលិតឧបករណ៍បាញ់រ៉ុកកែត HIMARS គឺ Lockheed Martin កើនឡើង ៤២%។

តម្លៃភាគហ៊ុនគួរឲ្យកត់សម្គាល់ផ្សេងទៀតនៅក្នុងរបាយការណ៍នេះរួមមាន ក្រុមហ៊ុន BAE Systems (កើនឡើង៤០%), Kongsberg Gruppen (កើនឡើង៣៧%), General Dynamics (កើនឡើង២៤%) និង Raytheon Technologies (កើនឡើង១៩%)៕

ប្រែសម្រួល៖ Vann Vann

ប្រភព៖ RT

ចុចអាន៖ ណាតូ និង EU ប្តេជ្ញាគាំទ្រ អ៊ុយក្រែន បន្ថែមទៀត