កសិករអាចនឹងរង់ចាំតម្លៃគ្រាប់ស្វាយចន្ទីងើបឡើងវិញដល់ខែសីហាទើបលក់ចេញ

តម្លៃគ្រាប់ស្វាយចន្ទីបានធ្លាក់ចុះចាប់តាំងពីថ្ងៃទី ១៨ ខែមីនា ឆ្នាំ ២០២៣ ធ្វើឱ្យកសិករមួយចំនួនផ្អាកការលក់គ្រាប់​ស្វាយចន្ទីឆៅឱ្យវៀតណាម​ដោយ​ហាលទុកសម្រាប់លក់នៅខែសីហាខាងមុខវិញ។

លោក អួន ស៊ីឡុត ប្រធានសមាគមស្វាយចន្ទីកម្ពុជា បានបញ្ជាក់ឱ្យដឹងថា ​ដោយសារតម្លៃ​ស្រុតចុះខ្លាំង រហូតដល់ ៤០០០ រៀល ធ្វើឱ្យកសិករពិបាកទទួលយកក្នុងតំណាក់កាលនេះ។

លោកថា តម្លៃគ្រាប់ស្វាយចន្ទីសើម មានស្ថិរភាពល្អ នៅឆ្នាំ ២០២៣ ចាប់ពីចុងខែមករា រហូតដល់ ពាក់កណ្ដាលខែមីនា តម្លៃចន្លោះពី ៥ ០០០ រៀល ទៅ ៦ ០០០ រៀល ដែលជាតម្លៃល្អបំផុត​បើប្រៀបធៀបនឹងឆ្នាំមុនៗ ទើបតែដល់ថ្ងៃទី ១៨ ខែមីនា តម្លៃបានធ្លាក់ចុះ។

សមាគមស្វាយចន្ទីរកម្ពុជា បានប្រាប់ដល់សមាជិកចាប់ផ្ដើមហាលគ្រាប់ស្វាយចន្ទី ដូច្នេះ បានជាការនាំចេញរយៈពេល ៣ ខែ មានការធ្លាក់ចុះ។ លោកបញ្ជាក់ថា ការធ្លាក់ចុះ មិនមែនដោយសារ​ការផលិតបានតិចទេ គឺធ្លាក់ចុះដោយសារតែតម្លៃធ្លាក់ចុះ ទើបសមាជិកសមាគមគាត់ឈប់លក់។

ទិន្ន័យពីសមាគមស្វាយចន្ទីរកម្ពុជាបង្ហាញថា នៅក្នុងរយៈពេល ៣ ខែ ដើមឆ្នាំ ២០២៣ កម្ពុជាបាននាំចេញគ្រាប់ស្វាយចន្ទីទៅកាន់ទីផ្សារធំគឺប្រទេសវៀតណាមចំនួន ២៣៣ ០៥០ តោន ដែលមានទឹកប្រាក់ ៣២០ លាន​ដុល្លារ ធ្លាក់ចុះ ១២.៩៥% បើធៀបរយៈពេលដូចគ្នាទៅនឹង២០២២។

លោក អួន ស៊ីឡុត បានបញ្ជាក់ថា មកដល់ចុងខែមេសានេះ ដោយសារតែមានភ្លៀងធ្លាក់ និងខ្យល់កន្ត្រាក់ ធ្វើឱ្យស្វាយចន្ទីអន់គុណ​ភាពហើយតម្លៃរឹតតែធ្លាក់ចុះទៀត ដូច្នេះហើយ សមាគមស្វាយចន្ទីរកម្ពុជា ដែលគាត់មានឃ្លាំង​ហាល​ទុកដើម្បីលក់នៅខែសីហា ដែលសមាគមធ្លាប់លក់ក្នុងតម្លៃល្អ។​

ទោះយ៉ាងណាលោកបញ្ជាក់ថា ប្រសិនបើតម្លៃគ្រាប់ស្វាយចន្ទីរសើម ងើបតម្លៃឡើងវិញនោះ​សមាគមនឹងចាប់ផ្ដើមលក់ចេញផងដែរ៕

អត្ថបទ៖ ឡេង ដេត