វៀតណាម អាចសម្រេចគោលដៅនាំចេញគ្រឿងសមុទ្រ ៩ ពាន់លានដុល្លារក្នុងឆ្នាំនេះ

ការនាំចេញអាហារសមុទ្ររបស់វៀតណាមនឹងអាចសម្រេចបានគោលដៅកំណត់ ៩ ពាន់លានដុល្លារក្នុងឆ្នាំ ២០២៣ នេះ ដោយសារតែសញ្ញានៃការនាំចេញអាហារសមុទ្រសំខាន់ៗមានសន្ទុះងើបឡើងវិញក្នុងរយៈពេល ៣ ខែចុងក្រោយនេះ ។

យោងតាមសមាគមអ្នកនាំចេញ និងផលិតអាហារសមុទ្រវៀតណាមបានបង្ហាញថា ការនាំចេញបង្គាបានធ្លាក់ចុះ ២៨ ភាគរយនៅក្នុងត្រីមាសទី ២ ប៉ុន្តែការធ្លាក់ចុះនេះត្រូវបានកាត់បន្ថយមកត្រឹម ១៣ ភាគរយប៉ុណ្ណោះនៅក្នុងត្រីមាសទី ៣ ។

ការនាំចេញត្រីប្រាបានធ្លាក់ចុះមកនៅ ១២ ភាគរយក្នុងត្រីមាសទី ៣ ធៀបនឹង ៤១ ភាគរយនៅក្នុងត្រីមាសទី ២ ហើយត្រីធូណា បានធ្លាក់ចុះ​មកនៅ ៨ ភាគរយពីត្រីមាសទី ២ ដែលមានដល់ ៣១ ភាគរយ ។ ចំណែកក្តាមវិញ បានកើនឡើង ២ ភាគរយ បើប្រៀបធៀបនឹងឆ្នាំមុន ។

សម្រាប់ការនាំចេញ​គ្រឿងសមុទ្រ​ទូទៅនៅត្រីមាសទី ៣ វិញ បានធ្លាក់ចុះ ១២ ភាគរយ ដែលជាការធ្លាក់ចុះតិចតួចបំផុតប្រចាំត្រីមាសនៅក្នុងឆ្នាំនេះ ។

ប៉ុន្តែអ្នកនាំចេញបានមើលឃើញពីការកើនឡើងនៃតម្រូវការនៅមជ្ឈិមបូព៌ាក្នុងប៉ុន្មានឆ្នាំថ្មីៗនេះ ស្របពេលមានភាពតានតឹងផ្នែកភូមិសាស្ត្រនយោបាយសកល និងអតិផរណាដែលកំពុងកើតមាននាពេលបច្ចុប្បន្នផង ។

តំបន់នេះបាននាំចូលអាហារសមុទ្រពីប្រទេសវៀតណាមច្រើនជាង ២ ភាគរយនៅក្នុងត្រីមាសទី ៣ បើប្រៀបធៀបទៅនឹងរយៈពេលដូចគ្នាកាលពីឆ្នាំមុន ខណៈដែលទីផ្សារសំខាន់ៗដូចជា សហរដ្ឋអាមេរិក ចិន និងកូរ៉េខាងត្បូងបានធ្លាក់ចុះក្នុងតួលេខចំនួន ២ ខ្ទង់ ។

ប៉ុន្តែយោងតាមសមាគមនេសាទរំពឹងថា នឹងមានការកើនឡើងនៃតម្រូវការពីសហរដ្ឋអាមេរិក និងចិននៅក្នុងត្រីមាសទី ៤ ពោលអាចចំគោលដៅ​ប្រចាំ​ឆ្នាំ​ចំនួន ៩ ពាន់​លាន​ដុល្លារ​ បើ​ទោះ​ជា​មានការ​ធ្លាក់​ចុះ​នៃ​ការ​នាំ​ចេញ​ចំនួន ១៧ ភាគរយពី​ឆ្នាំ ២០២២ ក៏ដោយ ៕​

ប្រែសម្រួល៖ នាង រតនៈ

ប្រភព៖ VN Express