ចិន ប្រកាសផែនការការពារផលប្រយោជន៍ក្រុមហ៊ុនបរទេសដើម្បីទាញការ​វិនិយោគ

បើយោងតាមការចុះផ្សាយពីទូរទស្សន៍ CCTV បានឲ្យដឹងថា ប្រធានាធិបតីចិន លោក ស៊ី ជីនពីង បានប្រកាសផែនការបង្កើតច្បាប់ដ៏រឹងមាំមួយដើម្បីជួយការពារផលប្រយោជន៍របស់ក្រុមហ៊ុនបរទេស និងថែមទាំងផ្តល់ការគាំទ្របន្ថែមទៀតដល់វិនិយោគិនផងដែរដើម្បីជំរុញដល់ការវិនិយោគ ។

ក្នុង​កិច្ចប្រជុំកំពូលជាមួយ​ថ្នាក់ដឹកនាំបក្សកម្មុយនីស្ត ស្តីពីការពង្រឹងការអភិវឌ្ឍន៍ប្រព័ន្ធច្បាប់ដែលទាក់ទងនឹងបរទេស លោក ស៊ី ជីនពីង បានបញ្ជាក់ថា​ វាជាកិច្ចការងារបន្ទាន់​ដែលចិនត្រូវតែចាំបាច់លើកកម្ពស់ឲ្យមានស្តង់ដាខ្ពស់សម្រាប់ការពារវិនិយោគិនបរទេស ។

បន្ថែមពីនេះ លោកក៏បានសង្កត់ធ្ងន់លើតម្រូវការ ការពារសិទ្ធិ និងផលប្រយោជន៍ស្របច្បាប់របស់សហគ្រាសដែលវិនិយោគដោយបរទេស និងផ្តល់ភាពងាយស្រួលបន្ថែមទៀតដល់ជនបរទេសដែលរស់នៅក្នុងប្រទេសចិន ។ ទន្ទឹមនឹងនេះ គោលបំណងជាមូលដ្ឋាននៃការជំរុញអភិបាលកិច្ចផ្អែកលើច្បាប់ក្នុងកិច្ចការពាក់ព័ន្ធបរទេស គឺដើម្បីការពារផលប្រយោជន៍របស់ចិនទាំងមូល ។

ទាក់ទិនជាមួយផែនការនេះ ​ត្រូវបានគេជឿជាក់ថា ចិន​​កំពុងព្យាយាមទប់ស្កាត់ការធ្លាក់ចុះនៃការវិនិយោគបរទេស ចំពេលមានទស្សនវិស័យមិនច្បាស់លាស់សម្រាប់សេដ្ឋកិច្ចរបស់ខ្លួន ។

ប៉ុន្តែវានៅតែមិនទាន់ច្បាស់នៅឡើយទេថា តើផែនការនេះនឹងជួយចិនទាក់ទាញក្រុមហ៊ុនបរទេសកម្រិតណានោះ ខណៈចិនបានកែប្រែច្បាប់ប្រឆាំងចារកម្មកាលពីខែកក្កដា ក្នុងសញ្ញាមួយបង្ហាញថា ចិនបានដាក់អាទិភាពលើការធានាសន្តិសុខជាតិជាចម្បង ៕

ប្រែសម្រួល៖ នាង រតនៈ

ប្រភព៖ NHK