សាជីវកម្មមួយរបស់ អាមេរិក ផ្ដល់កម្ចី ៥០០ លានដុល្លារដល់ក្រុមហ៊ុន VinFast វៀតណាម

សាជីវកម្មហិរញ្ញវត្ថុអភិវឌ្ឍន៍អន្តរជាតិរបស់សហរដ្ឋអាមេរិក (DFC) បានចុះហត្ថលេខាលើកិច្ចព្រមព្រៀងមួយជាមួយក្រុមហ៊ុនផលិតរថយន្តអគ្គិសនីវៀតណាម VinFast ដើម្បីពិចារណាលើសំណើរសម្រាប់ប្រាក់កម្ចីចំនួន ៥០០ លានដុល្លារ ក្នុងការពង្រីក​សកម្មភាពរោងចក្រឡានអគ្គិសនី។

ក្រុមហ៊ុន VinFast បញ្ជាក់ថា ប្រាក់កម្ចីនេះនឹងប្រើដើម្បីគាំទ្រដល់ការបង្កើតរោងចក្រផលិតថ្ម lithium-ion របស់ក្រុមហ៊ុននៅក្នុងប្រទេសវៀតណាម ហើយក៏ស្ថិតនៅក្រោមការត្រួតពិនិត្យ និងដំណើរការអនុម័តយ៉ាងទូលំទូលាយដោយ DFC ផងដែរ ។

ស្របពេលជាមួយគ្នានេះ លោក Le Thi Thu Thuy ប្រធានក្រុមហ៊ុន VinFast លើកឡើងថា ការផ្តល់ហិរញ្ញប្បទានដោយ DFC នឹងកំណត់ផ្លូវឆ្ពោះទៅមុខសម្រាប់យុទ្ធសាស្រ្តពង្រីកទីផ្សារសកលរបស់ក្រុមហ៊ុន ក៏ដូចជាដំណើរឆ្ពោះទៅកាន់អនាគតបៃតងសម្រាប់មនុស្សជាតិ ។

ខណៈមកដល់បច្ចុប្បន្ន ក្រុមហ៊ុនសាជីវកម្មហិរញ្ញវត្ថុអភិវឌ្ឍន៍អន្តរជាតិរបស់សហរដ្ឋអាមេរិក (DFC) បានផ្តល់ជំនួយចំនួន ៧៣៧ លានដុល្លារដល់គម្រោងអភិវឌ្ឍន៍ក្នុងប្រទេសវៀតណាម ដែលធ្វើឲ្យប្រទេសនេះមានទីផ្សារធំបំផុតនៅអាស៊ីអាគ្នេយ៍ ។

សូមបញ្ជាក់ថា ក្រុមហ៊ុន VinFast ត្រូវបានបង្កើតឡើងក្នុងឆ្នាំ ២០១៧ និងគាំទ្រដោយក្រុមហ៊ុន Vingroup ដែលជាក្រុមហ៊ុនធំជាងគេរបស់វៀតណាម ហើយបានចាប់ផ្តើមចែកចាយរថយន្តអគ្គិសនីនៅរដ្ឋកាលីហ្វ័រញ៉ាក្នុងខែមីនា ក្រោយពេលបង្ហាញខ្លួនជាលើកដំបូងនៅ​ផ្សារហ៊ុន Nasdaq របស់អាមេរិកនៅចុងខែសីហា ៕

ប្រែសម្រួល៖ នាង រតនៈ

ប្រភព៖ VN Express