តម្លៃទំនិញប្រើប្រាស់នៅ ចិន ធ្លាក់ចុះ ០.៥ ភាគរយក្នុងខែវិច្ឆិកា

សន្ទស្សន៍តម្លៃទំនិញប្រើប្រាស់របស់ចិន (CPI) បានធ្លាក់ចុះ ០.៥ ភាគរយនៅក្នុងខែវិច្ឆិកា បើប្រៀបធៀបនឹងឆ្នាំមុន ហើយបានធ្លាក់ចុះ ០.៥ ភាគរយនៅក្នុងខែតុលា ដោយសារតែការថយចុះនៃតម្លៃថាមពល ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមទិន្នន័យពីការិយាល័យស្ថិតិជាតិចិនបង្ហាញថា ការថយចុះនៃសន្ទស្សន៍តម្លៃទំនិញប្រើប្រាស់ គឺដោយសារតែកត្តារួម ដូចជា ការចុះថ្លៃ ក៏ដូចជាការប្រែប្រួលតម្លៃអាហារ និងថាមពលជាដើម ប៉ុន្តែតម្លៃស្នូលរបស់ CPI នៅតែមានស្ថេរភាពក្នុងកំឡុងខែនេះ ។

បើយោងតាមអ្នកស្ថិតិរបស់ NBS លោក Dong Lijuan បានបញ្ជាក់ថា សម្រាប់សន្ទស្សន៍ CPI ដែលមិនរាប់បញ្ចូលតម្លៃអាហារ និងថាមពល បានកើនឡើង ០.៦ ភាគរយ បើប្រៀបធៀបនឹងឆ្នាំមុន ដោយរក្សាបាននូវការកើនឡើងកម្រិតមធ្យមដូចគ្នានឹងខែមុន ។

ទន្ទឹមនឹងនេះ សន្ទស្សន៍តម្លៃអ្នកផលិត (PPI) បានធ្លាក់ចុះ ៣ ភាគរយ បើប្រៀបធៀបនឹងឆ្នាំមុន ដោយសារតែរងផលប៉ះពាល់ពីការធ្លាក់ចុះនៃតម្លៃប្រេងអន្តរជាតិ និងតម្រូវការខ្សោយនៅទូទាំងទីផ្សារផលិតផលឧស្សាហកម្ម ។

ដោយឡែកលោក Tian Yun ជាអ្នកសេដ្ឋវិទូបានប្រាប់សារព័ត៌មាន Global Times ថា កត្តាដែលរួមចំណែកដល់ការធ្លាក់ចុះតម្លៃនៅក្នុងខែវិច្ឆិកា អាចត្រូវបានសន្មតថា ជាហានិភ័យជាប់លាប់នៃសម្ពាធបរិត្តផរណាពីខាងក្រៅ ខណៈការកាត់បន្ថយតារាងលំនឹងរបស់ធនាគារកណ្តាលអាមេរិក បាននាំឲ្យមានការធ្លាក់ចុះនៃតម្លៃទំនិញ ជាពិសេសតម្លៃប្រេង និងកសិកម្ម ។

ទោះបីជា សន្ទស្សន៍ CPI ធ្លាក់ចុះក៏ដោយ ប៉ុន្តែការនាំចេញរបស់ចិននៅក្នុងវិច្ឆិកា បែរជាមានកំណើនឡើងវិញជាលើកដំបូង ចាប់តាំងពីខែមេសា ខណៈការនាំចូលបានធ្លាក់ចុះ​ ៕​

ប្រែសម្រួល៖ នាង រតនៈ

ប្រភព៖​ Global Times