Microsoft នឹង​វិនិយោគ ១,៧ ពាន់​លាន​ដុល្លារ​លើ Cloud, AI នៅ​ឥណ្ឌូនេស៊ី​

រដ្ឋធានីហ្សាការតា៖ ក្រុមហ៊ុន Microsoft នឹងបោះទុនវិនិយោគចំនួន១,៧ ​ពាន់លានដុល្លារក្នុងប្រទេសឥណ្ឌូនេស៊ី ដើម្បីផ្តល់លទ្ធភាពដល់ប្រទេសអាស៊ីអាគ្នេយ៍មួយនេះជាមួយនឹងសេវាកម្មពពក និងបញ្ញាសិប្បនិមិត្ត​(AI)  រួមទាំងការសាងសង់មជ្ឈមណ្ឌលទិន្នន័យផងដែរ។ នេះបើយោងតាមលោកនាយកប្រតិបត្តិ​ Satya Nadella ថ្លែងកាលពីថ្ងៃអង្គារ។

យោងតាមសារព័ត៌មានរបស់សិង្ហបុរី ទីក្រុងហ្សាការតាគឺជាកន្លែង​ដំបូងគេរបស់លោក Nadella ក្នុងដំណើរទស្សនៈកិច្ចរបស់គាត់មកកាន់បណ្តាប្រទេសអាស៊ីអាគ្នេយ៍ ខណៈដែលក្រុមហ៊ុនអាមេរិកមួយនេះកំពុងផ្សព្វផ្សាយអំពីបច្ចេកវិទ្យា AI ជំនាន់ថ្មីរបស់ខ្លួនដើម្បីជំរុញកំណើន។ លោក​នឹង​ទៅ​បំពេញ​ទស្សនកិច្ច​នៅ​ប្រទេស​ម៉ាឡេស៊ី និង​ថៃ​នៅ​ចុង​សប្តាហ៍​នេះផងដែរ។

លោក Nadella បាននិយាយថា៖« ក្រុមហ៊ុន Microsoft នឹងពង្រីកការវិនិយោគលើការសាងសង់មជ្ឈមណ្ឌលទិន្នន័យកុំព្យូទ័រលើពពកនៅក្នុងប្រទេសឥណ្ឌូនេស៊ីដែលមានទុនវិនិយោគចំនួន ១,៧ ពាន់លានដុល្លារ ​ដើម្បីនាំយកហេដ្ឋារចនាសម្ព័ន្ធ AI ចុងក្រោយ​ និងអស្ចារ្យបំផុតមកកាន់ប្រទេសឥណ្ឌូនេស៊ី»។

​លោក Nadella បាននិយាយថា Microsoft នឹងបណ្តុះបណ្តាលមនុស្ស ២,៥ លាននាក់នៅអាស៊ីអាគ្នេយ៍លើការប្រើប្រាស់ AI នៅឆ្នាំ ២០២៥ ៕