ក្រុមហ៊ុន ADE ​របស់ម៉ាឡេស៊ីទទួលបានសិទ្ធិ​ក្នុងការផ្តល់សេវា AMO នៅកម្ពុជា

​ភ្នំពេញ៖ ក្រុមហ៊ុនម៉ាឡេស៊ី Asia Digital Engineering (ADE) បានប្រកាសថា ADE Cambodia ដែលជាក្រុមហ៊ុនបណ្តាក់ទុនរួមគ្នាជាមួយ Sivilai Asia Co Ltd បានទទួលវិញ្ញាបនប័ត្រផ្តល់សេវាថែទាំនិងត្រួតពិនិត្យយន្តហោះ (AMO) ពីរដ្ឋលេខាធិការដ្ឋានអាកាសចរណ៍ស៊ីវិលកម្ពុជា (SSCA)ក្នុងការផ្តល់សេវាកម្មនេះដល់បណ្តាក្រុមហ៊ុនអាកាសចរណ៍នានានៅកម្ពុជា។

យោងតាមសេចក្តីប្រកាសព័ត៌មានរបស់ក្រុមហ៊ុន សម្រាប់ការទទួលបាននូវវិញ្ញាបនប័ត្រគឺជាលើកដំបូងសម្រាប់ ADE ដែលផ្តល់សេវានេះ​ក្រៅប្រទេសម៉ាឡេស៊ី។ ADE Cambodia នឹងផ្តល់សេវាកម្ម MRO មិនត្រឹមតែដល់ក្រុមហ៊ុន AirAsia Cambodia ប៉ុណ្ណោះទេ ថែមទាំងដល់ក្រុមហ៊ុនអាកាសចរណ៍ផ្សេងទៀតដែលប្រតិបត្តិការនៅក្នុងព្រលានយន្តហោះសំខាន់ៗរបស់កម្ពុជា។

លោក Mahesh Kumar នាយកប្រតិបត្តិនៃ Asia Digital Engineering មានប្រសាសន៍ថា៖« យើងរីករាយណាស់ដែលបានទទួលការយល់ព្រមដើម្បីចាប់ផ្តើមប្រតិបត្តិការរបស់ ADE Cambodia ។ យើងទន្ទឹងរង់ចាំក្នុងការផ្តល់នូវដំណោះស្រាយ MRO កម្រិតខ្ពស់ដល់ក្រុមហ៊ុនអាកាសចរណ៍ដែលកំពុងប្រតិបត្តិការ និងមកពីប្រទេសកម្ពុជា បន្ថែមពីលើការជួយដល់ឧស្សាហកម្មអាកាសចរណ៍ដែលកំពុងរីកចម្រើនរបស់កម្ពុជា ដែលនឹងជះឥទ្ធិពលជាវិជ្ជមានដល់សេដ្ឋកិច្ចក្នុងស្រុក និងបង្កើតឱកាសការងារក្នុងប្រទេស។ យើងខ្ញុំសូមថ្លែងអំណរគុណយ៉ាងស្មោះស្ម័គ្រចំពោះរដ្ឋលេខាធិការដ្ឋានអាកាសចរស៊ីវិលកម្ពុជា (SSCA) និងរដ្ឋាភិបាលកម្ពុជាសម្រាប់ការស្វាគមន៍យ៉ាងកក់ក្តៅ និងការទទួលស្គាល់ពីសមត្ថភាពរបស់យើង»។ លោកបានថ្លែងបន្តទៀតថា ទៅពេលអនាគត ក្រុមហ៊ុននឹងពង្រីកការវិនិយោគបន្ថែមទៀតលើបច្ចេកវិទ្យាទំនើប បង្កើនសមត្ថភាព​ និងអភិវឌ្ឍកម្លាំងពលកម្មជំនាញ​​។

លោកថា៖«នេះក៏ជាការចាប់ផ្តើមនៃដំណើររីកចម្រើនរបស់យើងនៅឆ្នាំ ២០២៤ នៅពេលដែលយើងត្រៀមខ្លួនដើម្បីពង្រីកទៅកាន់ប្រទេសផ្សេងទៀតក្នុងពេលឆាប់ៗនេះ»។

ក្រុមហ៊ុនបានលើកឡើងថា ប្រតិបត្តិការ ADE Cambodia នឹងមានទីស្នាក់ការនៅអាកាសយានដ្ឋានអន្តរជាតិភ្នំពេញ ​និងបន្តពង្រីកទៅកាន់អាកាសយានដ្ឋានផ្សេងទៀតក្នុងប្រទេសកម្ពុជាផង​ដែរ។ ទីតាំងយុទ្ធសាស្ត្រនេះកំណត់ទីតាំង ADE Cambodia ដើម្បីបម្រើឱ្យមានប្រសិទ្ធភាពនូវតម្រូវការអាកាសចរណ៍ក្នុងតំបន់ ដោយប្រើប្រាស់តួនាទីដ៏សំខាន់របស់ព្រលានយន្តហោះក្នុងការភ្ជាប់ប្រទេសកម្ពុជាជាមួយពិភពលោក។

លោក Tony Fernandes នាយកប្រតិបត្តិនៃ Capital A មានប្រសាសន៍ថា​ លោកទទួល​ស្គាល់ចំពោះ​ស្នាដៃរបស់ក្រុមហ៊ុន Asia Digital Engineering ​ ជាមួយនឹងបទពិសោធន៍ជាង ២០ ឆ្នាំនៃអ្នកជំនាញដែលបានបញ្ជាក់ពីការធ្វើការជាមួយក្រុមហ៊ុន AirAsia គោលដៅរបស់ពួកគេក្នុងការក្លាយជាអ្នកផ្តល់សេវា MRO ឈានមុខគេនៅក្នុងអាស៊ាន។

លោកបានថ្លែងថា៖«វាជាព្រឹត្តិការណ៍ដ៏សំខាន់ដែលបានកើតឡើងតែប៉ុន្មានសប្តាហ៍ប៉ុណ្ណោះបន្ទាប់ពីការបើកដំណើរការហោះហើររបស់ក្រុមហ៊ុន AirAsia Cambodia ​ ដោយបញ្ជាក់ពីការប្តេជ្ញាចិត្តយ៉ាងមុតមាំរបស់ Capital A ក្នុងការពង្រីកការបោះជំហានរបស់យើងសម្រាប់​អាជីវកម្មដែលពាក់ព័ន្ធទាំងអស់របស់យើង»​។

យោងតាមរបាយការណ៍របស់ក្រសួងទេសចរណ៍​ ប្រទេសកម្ពុជាបានទាក់ទាញភ្ញៀវទេសចរអន្តរជាតិចំនួន ១,៥៨ លាននាក់នៅក្នុងត្រីមាសទី១ឆ្នាំ ២០២៤កើនឡើង ២២,៥ ភាគរយពីចំនួន ១,២៩ លាននាក់ក្នុងរយៈពេលដូចគ្នាក្នុងឆ្នាំ ២០២៣៕