ប្រាក់បញ្ញើក្នុងធនាគារ កើនឡើងដល់ជិត ៤៨ ប៊ីលានដុល្លារ

ប្រាក់បញ្ញើអតិថិជនក្នុងវិស័យធនាគា និងហិរញ្ញវត្ថុ មានចំនួន ៤៧,៩ ប៊ីលានដុល្លារ នៅក្នុងឆ្នាំ ២០២៣​ ដែលមានការ​កើនឡើងចំនួន ១៣,១% បើធៀបនឹងឆ្នាំ ២០២២។ នេះបើយោងតាមរបាយ​ការណ៍​របស់​ធនាគារ​ជាតិ​នៃកម្ពុជាចេញផ្សាយកាលពីពេលថ្មីៗនេះ។

លោក​ រ័ត្ន សោភ័ណ ប្រធានសមាគមធនាគារនៅកម្ពុជាបានឱ្យដឹងថា កត្តាមួយចំនួនបាន​ធ្វើឱ្យកំណើនប្រាក់បញ្ញើមានការ​កើនឡើងជាងឥណទានជិត ៣ ដង នោះគឺទំនុកចិត្តរបស់សាធារណជន​នៅក្នុងវិស័យ​ធនាគារ និង​ភាពងាយស្រួលក្នុងការធ្វើប្រតិបត្តិការ នៅពេលដែលអតិថិជនដាក់​ប្រាក់នៅធនាគារ ជាពិសេស​សម្រាប់សេវា និងផលិតផលដែលធនាគារមាន វាមានភាពទូលំទូលាយជាងមុន ជាពិសេស​លើវិស័យ​ឌីជីថល។

លោក​ រ័ត្ន សោភ័ណបញ្ជាក់ថា៖ «ប្រព័ន្ធបាគងបានដើរតួសំខាន់ ដើម្បីសម្រួលក្នុងការទូ​ទាត់ ទាំងក្នុងធនាគារ និងឆ្លងធនាគារ អ្នកដែលមានគណនីក្នុងធនាគារជិត ២០ លានគណនី រីឯការ​ទូទាត់បានកើនឡើង ២ លានប្រតិបត្តិការនៅឆ្នាំ ២០២៣»។

លោក​ រ័ត្ន សោភ័ណ បញ្ជាក់ថា ការដាក់ប្រាក់បញ្ញើសន្សំក្នុងធនាគារ ក៏ជាការចូលរួម​ចំណែក​ក្នុងសេដ្ឋកិច្ចជាតិតាមរយៈការបង្កើនការប្រើប្រាស់សាច់ប្រាក់ ខណៈអ្នកសន្សំក៏មានសន្តិភាពផ្លូវចិត្ត និងទទួលបានការប្រាក់ផងដែរ៕

អត្ថបទ៖ ឡេង ដេត