សេដ្ឋកិច្ច

កម្ចីនៅក្នុងប្រព័ន្ធធនាគារ និងហិរញ្ញវត្ថុនៅកម្ពុជា កើនដល់ជាង ៦២ ពាន់លានដុល្លារ

បានផុស

៤ ខែ មុន

នៅ

ថ្ងៃពុធ ២៥ មីនា ២០២៦

ដោយ

គិតត្រឹមដំណាច់ឆ្នាំ ២០២៥ ប្រជាពលរដ្ឋកម្ពុជាចំនួន ៥,១៣ លាននាក់ កំពុងប្រើប្រាស់កម្ចីពីប្រព័ន្ធធនាគារ និងហិរញ្ញវត្ថុ ដែលមានទំហំទឹកប្រាក់ ២៤៨ ៩២៦ ៥៧៥ លានរៀល ស្មើនឹងប្រមាណ ៦២ ពាន់លានដុល្លារ។ នេះបើយោងតាមរបាយការណ៍ស្ថានភាពឥណទាននៅកម្ពុជារបស់ក្រុមហ៊ុន ក្រេឌីត ប្យួរ៉ូ ខេមបូឌា (CBC)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

CBC បង្ហាញថា ក្នុងចំណោមសមតុល្យឥណទានដែលមានជាង ៦២ ពាន់លានដុល្លារ គឺមានឥណទានប្រមាណ ៦១ ភាគរយ ត្រូវបានគ្រឹះស្ថានធនាគារ និងហិរញ្ញវត្ថុ ផ្ដល់ទៅឱ្យប្រជាជននៅរាជធានីខេត្តចំនួន ៣ គឺរាជធានីភ្នំពេញាមានអ្នកខ្ចីច្រើនជាងគេប្រមាណ ១២៦ ៨៦០ ៥៤៦ លានរៀល ប្រមាណ ៣១,៧ ពាន់លានដុល្លារ ស្មើនឹង ៥១% នៃទំហំឥណទានទូទាំងប្រទេសដោយមានអ្នកខ្ចីសរុបចំនួន ៧២,៣ ម៉ឺននាក់។

បន្ទាប់មកគឺខេត្តកណ្ដាល មានអ្នកខ្ចីប្រាក់ពីប្រព័ន្ធធនាគារ និងហិរញ្ញវត្ថុចំនួនជិត ៤០,៩ ម៉ឺននាក់ ដែលមានទំហំឥណទាន ១៣ ៤៥០ ៨៥០ លានរៀលប្រមាណ ៣,៣៦ ពាន់លានដុល្លារ ស្មើនឹង ៥,៤% នៃសមតុល្យឥណទានទូទាំងប្រទេស។

ខេត្តកំពង់ស្ពឺ គឺជាខេត្តដែលមានបរិមាណឥណទានខ្ពស់លំដាប់ទី៣ មានទំហំ ១០ ៦០៨ ៦៩៣ លានរៀល ប្រមាណ ២,៦ ពាន់លានដុល្លារ ស្មើនឹង ៤,៣% នៃសមតុល្យឥណទានទូទាំងប្រទេស និងមានអ្នកខ្ចី ៣៩,២ ម៉ឺននាក់។

លោកស្រី ជា សិរី ទេសាភិបាលធនាគារជាតិនៃកម្ពុជា មានប្រសាសន៍ថា ប្រព័ន្ធធនាគារនៅកម្ពុជានៅតែមានភាពធន់និងរឹងមាំព្រមទាំងបន្តទទួលបានជំនឿទុកចិត្តពីសាធារណជនទោះបីជាស្ថានភាពសេដ្ឋកិច្ចពិភពលោកនៅតែមិនប្រាកដប្រជាក៏ដោយ។

លោកស្រី ជា សិរី បញ្ជាក់ថាភាពធន់ និងរឹងមាំរបស់ធនាគារដោយសារស្ថានភាពរឹងមាំនៃដើមទុន និងលទ្ធភាពខ្ពស់ក្នុងការបញ្ចេញសាច់ប្រាក់ដោយឆ្នាំ ២០២៥ ឥណទានដែលផ្តល់ដោយប្រព័ន្ធធនាគារបន្តកើនឡើងសន្សឹមៗក្នុងអត្រា ៤.១% ខ្ពស់ជាងឆ្នាំ ២០២៤ ដែលរួមចំណែកគាំទ្រដោយកំណើនតម្រូវការទុនរបស់ SMEs ក្នុងការពង្រីកអាជីវកម្ម។ ចំណែកប្រាក់បញ្ញើក្នុងប្រព័ន្ធធនាគារបានបន្តកើនឡើងល្អប្រសើរ ជាមួយនឹងអត្រាកំណើន ១៤.៧ភាគរយ។

យោងតាមទស្សនវិស័យរបស់ធនាគារកណ្តាល សេដ្ឋកិច្ចកម្ពុជាត្រូវបានគេព្យាករថា នឹងកើនឡើងប្រហែល ៥ ភាគរយ និងអតិផរណាដល់ ២,៣ ភាគរយនៅឆ្នាំ ២០២៦ ដែលឆ្លុះបញ្ចាំងពីភាពធន់ក្នុងចំណោមភាពមិនប្រាកដប្រជាសកល និងបញ្ហាប្រឈមក្នុងស្រុកដែលកំពុងបន្ត។

លោកបណ្ឌិត គី សេរីវឌ្ឍ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា បានឱ្យដឹងថា ប្រជាពលរដ្ឋកម្ពុជាប្រមាណ ៦៣% ជំពាក់បំណុលធនាគារ។

លោកបណ្ឌិតយល់ឃើញថា៖ «ប្រាក់សន្សំនៅក្នុងធនាគារ ហើយនឹងបំណុល ធនាគារគាត់នៅធនាគារគាត់នៅអន្តរការី អ្នកយកលុយទៅផ្ញើ ៦០ ពាន់លានដុល្លារ ខ្ចីពីធនាគារវិញ ៦០ ពាន់លាន ចុះបើអ្នកខ្ចីអត់សង អ្នកផ្ញើក៏អត់មានលុយដែរ ព្រោះក្នុងធនាគារអត់មានផង ព្រោះ ៦០ ពាន់ដូចគ្នា អញ្ចឹងនេះគឺជាហានិភ័យ»៕

អត្ថបទ៖ ឡេង ដេត