កម្ពុជារកចំណូលបានជាង ២,៨៥ ពាន់លានដុល្លារ ពីការនាំចេញកសិផលទៅទីផ្សារអន្តរជាតិនៅ០១ ឆមាស

នៅក្នុងឆមាសទី០១ ឆ្នាំ ២០២៤ កម្ពុជានាំចេញផលិតផលកសិផលជាង ៦,០១ លានតោនទៅ​កាន់ទីផ្សារអន្តរជាតិចំនួន ៨០ ប្រទេស គិតជាទឹកប្រាក់ជាង ២,៨៥ ពាន់លានដុល្លារ កើនឡើង ៥៧% ធៀបនឹងរយៈពេលដូចគ្នានៅឆ្នាំ ២០២៣។ នេះបើយោងតាមរបាយការណ៍របស់​អគ្គនា​យកដ្ឋាន​​កសិកម្មចេញផ្សាយនៅថ្ងៃទី ០២ ខែកក្កដា ឆ្នាំ ២០២៤។

លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ មានប្រសាសន៍នៅថ្ងៃទី ០១ ខែក្កដា ឆ្នាំ ២០២៤ នេះថា រាជរដ្ឋាភិបាលបានខិតខំប្រឹងប្រែងជំរុញ កម្មវិធីគោលនយោបាយ​ សំដៅ អភិវឌ្ឍវិស័យកសិកម្ម លើកស្ទួយផលិត​កម្ម រកទីផ្សារ និងរក្សាលំនឹងថ្លៃកសិផល ដើម្បីធនាសន្តិ​សុខស្បៀង និងទ្រទ្រង់កំណើនសេដ្ឋកិច្ចជាតិ។

​អនុប្រធាន​សភាពាណិជ្ជកម្ម​កម្ពុជា អ្នកឧកញ៉ា លឹម ហេង មានប្រសាសន៍ថា​​ ប្រទេសនៅ​អាស៊ីមួយ​​ចំនួនកំពុងជួប​វិបត្តិផ្នែក​​សន្តិសុខ និងនយោបាយ ធ្វើឱ្យរោងចក្រមួយចំនួនបានរុះរើ​មកកម្ពុជា​ដែលធ្វើឱ្យមានការ​ផលិត​កែច្នៃ និងនាំចេញ កើនឡើង។

លោកថា ការនាំចេញ​ផលិតផលកសិកម្មកម្ពុជាបានកើនឡើងពីមួយឆ្នាំទៅមួយឆ្នាំ ​ទៅប្រទេសវៀតណាម ​និងប្រទេសថៃ។

យោងតាមរបាយការណ៍របស់​អគ្គនា​យកដ្ឋាន​​កសិកម្ម ផលិតផលកសិកម្មដែលកម្ពុជានាំចេញរួមមាន ស្រូវ ជិត ២ លានតោន (១,៩២ លានតោន) គិតជាទឹកប្រាក់ជាង ៤ រយ ៥ លានដុល្លារ នាំចេញ​អង្ករជាង ៣៣ ម៉ឺនតោន គិតជាទឹកប្រាក់ ២៨៧ លានដុល្លារ។

ក្រៅពីនេះ ទឹកប្រាក់ ២ ពាន់ ១៦៥ លានដុល្លារ បានមកពីកសិផលផ្សេងៗ ដូចជាស្វាយចន្ទី ដំឡូងមី ផ្លែមៀនស្រស់ ចេក ស្វាយ ម្រេចជាដើម និងកសិផលចម្រុះផ្សេងៗទៀត។​ប្រទេសដែលជា​ទីផ្សារ​កសិផល​កម្ពុជារួមមាន ប្រទេស​វៀតណាម ថៃ ចិន និងកូរ៉េ៕

អត្ថបទ៖ ឡេង ដេត