មន្រ្តីជាន់ខ្ពស់​ធនាគារជាតិនៃកម្ពុជាលើកទឹកចិត្តដល់សហគ្រាសនានាប្រើប្រាស់គណនីសហគ្រាស

ទេសាភិបាល ធនាគារជាតិនៃកម្ពុជា លោកស្រីបណ្ឌិត ជា សិរី ​ ទេសាភិបាល គាំទ្រដល់សមាជិកនៃសមាគមពាណិជ្ជករ គ្រឿងអលង្ការ និងត្បូងមានតម្លៃកម្ពុជា (CGJT) និងបណ្តាយសហគ្រាសខ្នាតមីក្រូ តូច និងមធ្យមលើការប្រើប្រាស់គណនីសហគ្រាសនឹងជួយបង្កើនទំនុកចិត្តរបស់អតិថិជនកាន់តែខ្លាំងបន្ថែមទៀតលើគុណភាព​និងគុណតម្លៃផលិតផលរបស់ខ្លួន។

ការលើកឡើងរបស់លោកស្រី ជា សិរីធ្វើឡើងក្នុងជំនួបជាមួយលោកស្រី ញ៉ែត ស្រីអូនដែលជាប្រធានសមាគម នារសៀលថ្ងៃទី១១ ខែកក្កដា ឆ្នាំ២០២៤ នៅធនាគារជាតិនៃកម្ពុជា។

លោកស្រី  ញ៉ែត ស្រីអូនបានលើកឡើងអំពីសាវតារ និងដំណើរវិវឌ្ឍន៍របស់សមាគមដែលមានសមាជិកសរុបជាង ៩០០នាក់។

លោកស្រីបានស្នើសុំការគាំទ្រពី ធនាគារជាតិនៃកម្ពុជា ក្នុងការសម្របសម្រួលនីតិវិធីនានាដើម្បីអាចឱ្យសមាជិកសមាគមបង្កើតគណនីសហគ្រាសជាមួយគ្រឹះស្ថានធនាគារនិងហិរញ្ញវត្ថុផ្លូវការបានដោយរលូនផងដែរ។

លោកស្រីញ៉ែត ស្រីអូន​បានបញ្ជាក់ថា៖« គិតមកទល់ពេលនេះសមាជិកសមាគមភាគច្រើននៅបន្តប្រើប្រាស់គណនីបុគ្គល សម្រាប់ការទូទាត់នៅឡើយ»។

​លោកស្រីបណ្ឌិតទេសាភិបាល បានថ្លែងគណៈប្រតិភូសមាគមថា ការប្រើប្រាស់គណនីសហគ្រាសនឹងជួយបង្កើនទំនុកចិត្តរបស់អតិថិជនកាន់តែខ្លាំងបន្ថែមទៀតលើគុណភាពទំនិញ តាមរយៈការបង្កើតភស្តុតាងកាន់តែរឹងមាំ និងតម្លាភាពក្នុងប្រតិបត្តិការទិញ-លក់គ្រឿងអលង្ការ ឬត្បូងមានតម្លៃ។

លោកស្រីបណ្ឌិតជា សិរី បន្ថែមថា៖« ការជំរុញឱ្យសហគ្រាសខ្នាតមីក្រូ តូច និងមធ្យម អាចបើកគណនីក្នុងនាមសហគ្រាសនឹងជួយឱ្យចំនួនអាជីវកម្មក្នុងប្រព័ន្ធផ្លូវការមានកាន់តែច្រើនឡើង ស្របតាមយុទ្ធសាស្រ្តរបស់រាជរដ្ឋាភិបាលក្នុងការកៀងគរអាជីវកម្មក្រៅប្រព័ន្ធ ឱ្យចូលក្នុងប្រព័ន្ធផ្លូវការ ដើម្បីដាក់ចេញយុទ្ធសាស្រ្តអភិវឌ្ឍន៍ប្រកបដោយប្រសិទ្ធភាព និងមានយន្តការការពារត្រឹមត្រូវដល់បុគ្គលិកក្នុងសហគ្រាស»។

លោកស្រីបណ្ឌិតក៏បញ្ជាក់ថា ធនាគារជាតិនៃកម្ពុជានឹងយកសំណើរនេះទៅពិភាក្សាជាមួយក្រសួង-ស្ថាប័នពាក់ព័ន្ធដើម្បីធ្វើការសម្របសម្រួលស្របតាមនីតិវិធីនានា។

យោងទៅតាមរបាយការណ៍របស់ក្រសួងពាណិជ្ជកម្ម​ក្នុងឆ្នាំ២០២៣ កម្ពុជារកចំណូលបាន ពីការនាំចេញគ្រឿងអលង្ការ និងត្បូងមានតម្លៃ ទៅកាន់ទីផ្សារអន្ដរជាតិនានានៅលើពិភពលោក មានទឹកប្រាក់ជាង៨៥១លានដុល្លារ កើន២៦១% បើធៀបទៅនឹងឆ្នាំ២០២២៕