សិង្ហបុរីបណ្ដាក់ទុនវិនិយោគប្រមាណ ៤០០ លានដុល្លារនៅកម្ពុជា

យោងតាមទិន្នន័យរបស់ក្រុមប្រឹក្សាអភិវឌ្ឍន៍កម្ពុជា ប្រភពទុនវិនិយោគពីសិង្ហបុរី ស្ថិតក្នុង​ចំណោម ប្រភពទុនវិនិយោគផ្ទាល់ពីបរទេសឈានមុខទាំង ១០ ដោយបានបណ្ដាក់​ទុនវិនិ​យោគ​​សរុបប្រមាណ ៤០០ លានដុល្លារអាមេរិក ក្នុងរយៈពេល ៥ ឆ្នាំកន្លងមក។

លោក ជា វុទ្ធី អគ្គលេខាធិការ គណៈកម្មាធិការវិនិយោគ នៃក្រុមប្រឹក្សាអភិវឌ្ឍន៍កម្ពុជា​មានប្រ​សាស​ន៍ថា ប្រទេសសិង្ហបុរី គឺជាដៃគូពាណិជ្ជកម្ម និងវិនិយោគដ៏សំខាន់របស់កម្ពុជា។ ហើយថា ការ​វិនិ​យោគ​របស់សិង្ហបុរី បានដើរតួនាទីយ៉ាងសំខាន់​ក្នុងការអភិវឌ្ឍសេដ្ឋកិច្ចកម្ពុជា ជាពិសេស​ក្នុង​វិស័យ​​​កាមន្តសាល អចលនទ្រព្យ និងបដិសណ្ឋារកិច្ច។

រាជរដ្ឋាភិបាលកម្ពុជា កំពុងយកចិត្តទុកដាក់ ក្នុងការអភិវឌ្ឍវិស័យកសិកម្ម កសិឧស្សាហកម្ម ជា​ពិ​សេសដាំណាំកៅស៊ូ និងការកែច្នៃជ័រកៅស៊ូ ព្រមទាំងបានវិនិយោគ ក្នុងគម្រោងហេដ្ឋា​រចនា​សម្ព័ន្ធសំខាន់ៗ ដូចជាផ្លូវល្បឿនលឿនភ្នំពេញ-បាវិត និងផ្លូវល្បឿនលឿនភ្នំពេញ-សៀមរាប- ប៉ោយ​​ប៉ែត។

សូមជំរាបផងដែរថា លោក ជា វុទ្ធី អគ្គលេខាធិការ គណៈកម្មាធិការវិនិយោគ នៃក្រុមប្រឹក្សាអភិវឌ្ឍន៍កម្ពុជា នៅព្រឹក​ថ្ងៃទី ១៦ ខែសីហា ឆ្នាំ ២០២៤ បានចូលរួមបើកពិព័រធុរកិច្ចសិង្ហបុរី ២០២៤ នៅផ្សារ​ទំនើប​អូឡាំព្យា រាជធានីភ្នំពេញ ដែលរៀបចំដោយវេទិ​ការធុរកិច្ចសិង្ហបុរី ដោយមានការចូលរួម​ពីធុរ​ជន​ និងវិនិយោគិន ១២០ នាក់៕