សភាពាណិជ្ជកម្មកម្ពុជាអំពាវនាវ ដល់សប្បុរស​ជនបរិច្ចាគថវិកាសាងសង់ផ្លូវក្រវាត់ព្រំដែន

សភាពាណិជ្ជកម្មកម្ពុជា បានអំពាវនាវដល់សប្បុរសជនចូលរួមបរិច្ចាគថវិកាក្នុង មូល​និធិកសាង​ហេដ្ឋារចនា​សម្ព័ន្ធតាមព្រំដែនដោយផ្ដោតលើការកសាងផ្លូវក្រវាត់ព្រំដែន ក្នុងបុព្វហេតុការពារ និងអភិវឌ្ឍជាតិ ដើម្បីថែរ​ក្សា​សុខសន្តិភាព អធិ​ប​តេយ្យ និងបូរណភាពទឹកដី ក៏ដូចជាការ​ជំរុញ​ការអភិវឌ្ឍ នៅតាមតំបន់​ព្រំ​ដែន​​ឱ្យកាន់តែរឹងមាំ និងប្រកបដោយចីរភាព។

កាលពីថ្ងៃទី ២២ ខែសីហា ឆ្នាំ ២០២៤ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានប្រកាសបង្កើត«មូល​និធិកសាង​ហេដ្ឋារចនា​សម្ព័ន្ធតាមព្រំដែន» ដើម្បីកៀរគរថវិកាបន្ថែម សម្រាប់កសាងហេដ្ឋារចនាសម្ព័ន្ធនានាតាមបណ្ដោយព្រំដែន ព្រមទាំងផ្ដល់ឱកាសឱ្យប្រជាពលរដ្ឋខ្មែរបានចូលរួមចំណែក ដោយផ្ទាល់ជាមួយរាជរដ្ឋាភិបាល ក្នុងបុព្វហេតុរួមគ្នាកសាង និងការពារមាតុភូមិរបស់យើង។

សេចក្ដីអំពាវនាវរបស់សភាពាណិជ្ជកម្មកម្ពុជាបញ្ចាក់ថា៖ «ដើម្បីបង្ហាញនូវឆន្ទៈ និងស្មារតីរួបរួម​ជាតិតែមួយ សភា​ពាណិជ្ជកម្មកម្ពុជា មានកិត្តិយស សូមអំពាវនាវដល់ លោកអ្នកឧកញ៉ា អ្នក​ឧកញ៉ា ឧកញ៉ា លោកជំទាវ លោក លោកស្រី អ្នកនាង កញ្ញា ជនរួមជាតិទាំងអស់ ទាំងក្នុង​ស្រុក និងក្រៅស្រុក ដែលជាអាជីវករ ពាណិជ្ជករ ម្ចាស់សហគ្រាស និងក្រុមហ៊ុន នៅទូទាំង​រាជធានី-ខេត្ត និងការិយាល័យតំណាងសភាពាណិជ្ជកម្មកម្ពុជាក្រៅប្រទេសទាំងអស់ មេត្តាចូលរួម បរិច្ចាគ​វិភាគទានឱ្យបានច្រើនផុលផុសតាមការស្ម័គ្រចិត្តក្នុង “មូលនិធិកសាងហេដ្ឋារចនា​សម្ព័ន្ធ​តាម​ព្រំដែន” ក្នុងបុព្វហេតុការពារ និងអភិវឌ្ឍជាតិ ក្នុងស្មារតីមហាសាមគ្គីជាតិខ្មែរ ដើម្បីថែរក្សា សុខ​សន្តិភាព អធិបតេយ្យ និងបូរណភាពទឹកដី ក៏ដូចជាការជំរុញការអភិវឌ្ឍ នៅតាមតំបន់​ព្រំដែន​ឱ្យបានកាន់តែរឹងមាំ និងប្រកបដោយចីរភាព»៕