ការសិក្សាផលប៉ះពាល់ពីគម្រោងស្ពានផ្សាររាត្រី-អរិយ​ក្សត្រ បានបិទបញ្ចប់ និងត្រៀមបើកការដ្ឋានឆាប់ៗ

ការសិក្សាផលប៉ះពាល់ពីគម្រោងសាងសង់ស្ពានមិត្តភាពកម្ពុជា-កូរ៉េ​ ភ្ជាប់​ពី​ចំណុច​ផ្សាររាត្រី​ឆ្ពោះ​​​ទៅ​​​តំបន់​អរិយក្សត្រ​​ បានបិទបញ្ចប់របាយការណ៍ចុងក្រោយ និងត្រៀមបើកដ្ឋានសាងសង់ឆាប់ៗនៅពេលខាងមុខនេះ។

លោក សូរ វ៉ិចទ័រ រដ្ឋលេខាធិការ ក្រសួងសាធារណការ និងដឹកជញ្ជូននៅថ្ងៃទី ២៧ ខែសីហា ឆ្នាំ ២០២៤ បានដឹកនាំកិច្ចប្រជុំពិនិត្យបិទបញ្ចប់របាយការណ៍ចុងក្រោយ ស្តីពីផលប៉ះពាល់​បរិ​ស្ថាន និងសង្គម (ESIA) ត្រៀមសម្រាប់គម្រោង​សាងសង់ស្ពានមិត្តភាពកម្ពុជា-កូរ៉េ។

អង្គប្រជុំបានពិភាក្សាលើរបាយការណ៍ បន្ទាប់ពីបញ្ចប់ការសិក្សាលម្អិត ចំពោះផលប៉ះពាល់ បរិស្ថាន និងសង្គម (ESIA) នៅក្នុងរាជធានី ដើម្បីធ្វើយ៉ាងណាឱ្យទទួលបាននូវធាតុចូល និងស្វែងរកដំណោះស្រាយរួម ព្រមទាំងសម្រេចបានការឯកភាពគ្នាចុងក្រោយ សម្រាប់ភាពច្បាស់លាស់​នៅពេលគម្រោងចាប់ផ្តើម​សាង​សង់។

គម្រោងសាងសង់ស្ពានថ្មីនេះគឺទទួលបានប្រាក់កម្ចីពីប្រទេសកូរ៉េ និងបានចុះហត្ថលេខាក្នុង​ទំហំទឹកប្រាក់ជិត ២៤៦ លានដុល្លារ កាលថ្ងៃទី៩ ខែធ្នូ ឆ្នាំ២០២២។

លោក ផាក ជុងវ៉ុក ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋកូរ៉េ ប្រចាំ​កម្ពុជាបានឱ្យដឹងកាលពីពេលកន្លងទៅថា គម្រោងសាងសង់ស្ពានមិត្តភាពកម្ពុជា-សាធារណ​រដ្ឋកូរ៉េ រំពឹងថា នឹងបើកការដ្ឋាននៅ​ដើម​ឆ្នាំ ២០២៥ ខាងមុខ​។

​​តាមគម្រោងស្ពានមិត្ដភាពកម្ពុជា-កូរ៉េ នឹងត្រូវសាងសង់ចំនួន ២ ខ្សែ ដោយខ្សែទី១​តភ្ជាប់ពីខាង​មុខ​ផ្សាររាត្រីឆ្លងកាត់ទន្លេសាបទៅកាន់តំបន់ជ្រោយចង្វារ និងខ្សែទី២ តភ្ជាប់ពីជ្រោយចង្វារឆ្លង​កាត់ទន្លេ​មេគង្គទៅអរិយក្សត្រ៕

អត្ថបទ៖ ឡេង ដេត