ព័ត៌មានអន្ដរជាតិ

ឥណ្ឌូណេស៊ីចង់ផ្លាស់ប្តូរទីតាំងកំពង់ផែនាំចូល ទៅកាន់ភាគខាងកើតប្រទេស ដើម្បីកាត់បន្ថយការនាំចូល

បានផុស

១១ ខែ មុន

នៅ

ថ្ងៃសុក្រ ៣០ សីហា ២០២៤

ដោយ

ក្រសួងពាណិជ្ជកម្មឥណ្ឌូណេស៊ី នៅតែវាយតម្លៃលើសំណើរផ្លាស់ប្តូរទីតាំងកំពង់ផែនាំចូលពីកោះជ្វាទៅកាន់តំបន់ភាគខាងកើតនៃប្រទេស ដែលជាវិធានការមួយក្នុងគោលបំណងដោះស្រាយបញ្ហាលំហូរចូលនៃទំនិញសំខាន់ៗ និងជំរុញការប្រកួតប្រជែងក្នុងឧស្សាហកម្មក្នុងស្រុក។ នេះបើតាមការចុះផ្សាយរបស់កាសែត Jakarta Globe កាលពីពេលថ្មីៗនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អគ្គនាយកនៃពាណិជ្ជកម្មក្នុងស្រុក លោក Moga Simatupang បានមានប្រសាសន៍ថា ការសម្រេចចិត្តនេះតម្រូវឱ្យមានការវិភាគយ៉ាងហ្មត់ចត់ និងការវាយតម្លៃផលប៉ះពាល់ផ្នែកនិយតកម្ម (RIA) មុនពេលការសម្រេចចិត្តចុងក្រោយណាមួយត្រូវបានធ្វើឡើង។

លោកថ្លែងកាលពីថ្ងៃពុធថា៖ «វានៅតែស្ថិតក្រោមការត្រួតពិនិត្យ។ យើងត្រូវដឹកនាំ RIA ដើម្បីកំណត់ថាតើវាចាំបាច់ឬអត់ ហើយលទ្ធផលនឹងទៅជាយ៉ាងណា»។

កន្លងមក រដ្ឋមន្ត្រីពាណិជ្ជកម្មឥណ្ឌូណេស៊ី លោក Zulkifli Hasan បានស្នើឱ្យផ្លាស់ប្តូរច្រកនាំចូលពីកោះជ្វាទៅកាន់តំបន់ភាគខាងកើត ដើម្បីបង្កើនថ្លៃដឹកជញ្ជូន និងអាចកាត់បន្ថយលំហូរនៃទំនិញនាំចូល។

សំណើដែលផ្តោតលើមុខទំនិញចំនួន៧មុខនេះ គ្របដណ្ដប់លើផលិតផលវាយនភ័ណ្ឌ សេរ៉ាមិច ស្បែកជើង សម្លៀកបំពាក់ដែលផលិតរួច គ្រឿងសំអាង អេឡិចត្រូនិក និងសំលៀកបំពាក់ផ្សេងទៀត ហើយវាត្រូវបានពិភាក្សាជាមួយរដ្ឋមន្ត្រីឧស្សាហកម្ម លោក Agus Gumiwang Kartassmita ដែលគាំទ្រផែនការសម្រាប់សក្តានុពលរបស់ឥណ្ឌូណេស៊ីក្នុងការពង្រឹងឧស្សាហកម្មក្នុងស្រុក។

បើតាម Jakarta Globe កំពង់ផែថ្មីអាចសាងសង់ឡើងនៅក្រុង Sorong នៅខេត្ត West Papua ក្រុង Bitung នៅខេត្ត North Sulawesi និងក្រុង Kupang នៅខេត្ត East Nusa Tenggara ជាដើម៕