ព័ត៌មានអន្ដរជាតិ

ឥណ្ឌូណេស៊ីចេញប្បញ្ញត្តិឱ្យអ្នកនាំចេញធនធានធម្មជាតិ ទុកប្រាក់ចំណូលក្នុងស្រុក

បានផុស

៣ ខែ មុន

នៅ

ថ្ងៃចន្ទ ១៧ កុម្ភៈ ២០២៥

ដោយ

ប្រធានាធិបតីឥណ្ឌូណេស៊ី លោក ប្រាបូវូ ស៊ូប៊ីយាន់តូ នាថ្ងៃចន្ទនេះ បានចុះហត្ថលេខាលើបទប្បញ្ញត្តិថ្មីមួយ ដែលតម្រូវឱ្យអ្នកនាំចេញគ្រប់ធនធានធម្មជាតិ (លើកលែងតែប្រេង និងឧស្ម័ន) រក្សាប្រាក់ចំណូលទាំងអស់របស់ខ្លួនក្នុងប្រទេសយ៉ាងហោចណាស់ ១ ឆ្នាំ ដែលនេះនឹងអាចបន្ថែមប្រាក់ប្រមាណ ៨០ ប៊ីលានដុល្លារ ទៅក្នុងទុនបម្រុងប្រាក់បរទេសរបស់ឥណ្ឌូណេស៊ី។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

លោក ប្រាបូវូ បានប្រាប់សន្និសីទសារព័ត៌មានតាមទូរទស្សន៍ថា៖ «ធនធានធម្មជាតិរបស់ឥណ្ឌូណេស៊ីត្រូវតែផ្តល់ផលប្រយោជន៍ដល់សុខុមាលភាពរបស់ប្រទេស និងប្រជាជន តាមរយៈការផ្តល់មូលនិធិអភិវឌ្ឍន៍ លំហូរសាច់ប្រាក់ក្នុងស្រុក ការបង្កើននៃទុនបម្រុងប្រាក់បរទេស និងស្ថេរភាពនៃអត្រាប្តូរប្រាក់»។

ចាប់តាំងពីឆ្នាំ ២០២៣ ឥណ្ឌូណេស៊ីបានតម្រូវឱ្យអ្នកនាំចេញធនធានធម្មជាតិទាំងអស់រក្សា ៣០ ភាគរយ នៃប្រាក់ចំណូលពីការនាំចេញនីមួយៗ ជាមួយនឹងឯកសារដឹកជញ្ជូនដែលមានតម្លៃយ៉ាងហោចណាស់ ២៥០ ០០០ ដុល្លារ ក្នុងប្រព័ន្ធហិរញ្ញវត្ថុក្នុងស្រុក។ យ៉ាងណាមិញ លោក ប្រាបូវូ លើកឡើងថា អ្នកនាំចេញនៅតែមានទំនោរទុកប្រាក់របស់គេក្នុងធនាគារក្រៅស្រុកឥណ្ឌូណេស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកប្រធានាធិបតីដដែល បានលើកឡើងថា ក្រោមបទប្បញ្ញត្តិថ្មី អ្នកនាំចេញនឹងត្រូវបានអនុញ្ញាតឱ្យប្រើប្រាស់ប្រាក់ចំណូលរបស់ខ្លួន ប្រសិនបើពួកគេបំប្លែងទៅជាប្រាក់រូពៀ ឬសម្រាប់ប្រតិបត្តិការអាជីវកម្ម ដូចជាការទូទាត់ភាគលាភ ការទិញវត្ថុធាតុដើម ឬការទូទាត់សងប្រាក់កម្ចីជាដើម។

បទប្បញ្ញត្តិថ្មីនេះ នឹងចូលជាធរមាននៅថ្ងៃទី ១ មីនា។ ដោយឡែកអ្នកនាំចេញប្រេង និងឧស្ម័ន ត្រូវទុកប្រាក់ចំណូលរបស់ខ្លួនត្រឹមតែ ៣០ ភាគរយ នៃការនាំចេញនីមួយៗប៉ុណ្ណេះ ដោយស្របទៅនឹងបទប្បញ្ញត្តិឆ្នាំ ២០២៣៕