ព័ត៌មានអន្ដរជាតិ

តម្លៃប្រេងសកលបន្តធ្លាក់ចុះ ដល់កម្រិតទាបបំផុតរាប់តាំងពីខែធ្នូ ឆ្នាំមុន

បានផុស

២ years មុន

នៅ

ថ្ងៃពុធ ៤ កញ្ញា ២០២៤

ដោយ

តម្លៃប្រេងឆៅសកលក្នុងការជួញដូរនាថ្ងៃពុធនេះ បានបន្តធ្លាក់ចុះដល់កម្រិតទាបបំផុតរាប់ចាប់តាំងពីខែធ្នូ ឆ្នាំមុន ដោយសារតែភាពធូរស្រាលនៃជម្លោះនយោបាយនៅលីប៊ី ដែលជាប្រទេសនាំចេញប្រេងកាតមួយ ទន្ទឹមនឹងការបន្តខ្សោយនៃតម្រូវការពីប្រទេសប្រើប្រេងធំៗរួមមានចិន និងសហរដ្ឋអាមេរិក។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តម្លៃប្រេងឆៅនាពេលអនាគត ម៉ាក Brent បានធ្លាក់ចុះ ៤៣ សេន ឬ ០,៦ ភាគរយ ដោយជួញដូរនៅត្រឹម ៧៣,៣២ ដុល្លារ/បារ៉ែល ខណៈតម្លៃប្រេងនាពេលអនាគតរបស់អាមេរិក ម៉ាក West Texas Intermediate (WTI) បានធ្លាក់ចុះ ៤៩ សេន ឬ ០,៧ ភាគរយ ដោយជួញដូរនៅ ៦៩,៨៥ ដុល្លារ/បារ៉ែល។

កាលពីថ្ងៃអង្គារ តម្លៃរបស់ Brent បានធ្លាក់ចុះប្រមាណ ៤,៩ ភាគរយ ខណៈតម្លៃ WTI បានធ្លាក់ចុះប្រមាណ ៤,៤ ភាគរយ។

ម៉ាកទាំង២ បានធ្លាក់ចុះដល់កម្រិតទាបបំផុតចាប់តាំងពីខែធ្នូ ដោយសារតែសញ្ញានៃកិច្ចព្រមព្រៀងដោះស្រាយជម្លោះនយោបាយរវាងបក្សពួកគូប្រជែងក្នុងប្រទេសលីប៊ី ដែលបានកាត់បន្ថយផលិតកម្មប្រេងប្រហែលពាក់កណ្តាល ហើយបង្កការរាំងស្ទះដល់ការនាំចេញ។

អ្នកជំនាញក៏បានគូសបញ្ជាក់ផងដែរថា ការបន្តធ្លាក់ចុះកើតឡើងផងដែរនៅពេលទីផ្សារប្រេងបន្តរងសម្ពាធ ដោយសារក្ដីព្រួយបារម្ភអំពីតម្រូវការប្រេងធ្លាក់ចុះ ក្រោយសូចនាករសេដ្ឋកិច្ចរបស់ចិន និងអាមេរិក ដែលជាប្រទេសប្រើប្រេងធំៗរបស់សកល បានបង្ហាញពីកម្សោយ ក្នុងនោះរួមមានទាំងការធ្លាក់ចុះនៃសកម្មភាពរោងចក្រ៕