បណ្តាក្រុមហ៊ុនកូរ៉េ​បង្ហាញឆន្ទៈពង្រីកការវិនិយោគលើវិស័យសក្តានុពលនៅកម្ពុជា

ក្រុមហ៊ុន​មូលបត្រកូរ៉េខាងត្បូង ក្រុមហ៊ុន SK Securities និង KB Financial Group ស្វែងការគាំទ្រពី រដ្ឋាភិបាលកម្ពុជាលើកគម្រោងវិនិយោគរបស់ខ្លួននៅកម្ពុជា ជាពិសេក្រុងហ៊ុនទាំងនោះនឹងចូលរួមចំណែកដល់ការកសាងប្រទេសកម្ពុជាជាប្រទេសដែល​មានគម្រោងវិនិយោគបៃតងដ៏ច្រើនមួយនៅក្នុងតំបន់។

​លោក Jung Jun-Ho ប្រធាន និងជានាយកប្រតិបត្តិ ក្រុមហ៊ុន SK Securities បានជួបសម្តែងការគួរសមជាមួយសម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃ​កម្ពុជាកាលពីព្រឹកថ្ងៃទី ១១ ខែកញ្ញានេះ​​ ស្របពេលដែលសម្តេចបានដឹកនាំគណៈប្រតិភូទៅ​បំពេញទស្សនកិច្ចនៅកូរ៉េ។ នេះបើយោងតាមសភាពាណិជ្ជកម្មកម្ពុជា។

លោក​ Jung Jun-Ho បានលើក​ថា ក្រុមហ៊ុនរបស់លោកមិនទាន់បានបង្កើតក្រុមហ៊ុននៅកម្ពុជានៅឡើយទេ ហើយតាមរយៈជំនួបនៅថ្ងៃនេះ ក្រុមហ៊ុនរបស់លោកចាប់អារម្មណ៍នឹងវិនិយោគនៅកម្ពុជា ហើយធ្វើការទៅលើវិស័យជាច្រើន។

លោកក៏បានលើកឡើងថា ក្រុមហ៊ុន SK Securities គឺជាក្រុមហ៊ុនមូលបត្រដែលទទួលស្គាល់ពីអង្គការសហប្រជាជាតិ ដែលទទួលបានអាជ្ញាប័ណ្ណហិរញ្ញវត្ថុដែលផ្ដោតទៅលើបរិស្ថាន។ ក្រុមហ៊ុន SK Securities កំពុងតែអនុវត្តគម្រោងមួយ គឺការអភិរក្សនៅព្រៃកោងកាង ក្នុងខេត្តកំពត ទំហំ៥០ហិកតា នៅក្នុងក្របខ័ណ្ឌនៃការ​ពង្រឹងបរិស្ថាន។

លោក​បានលើកឡើងថា៖« ក្រុមហ៊ុនរបស់លោក គឺចាប់អារម្មណ៍ទៅលើប្រទេសកម្ពុជា ពីព្រោះប្រទេសកម្ពុជា មានទីតាំងល្អ និងមានធនធាន       មនុស្ស។ ក្នុងទិសដៅនេះ ​ SK Securities ​សុំការគាំទ្រពីសម្ដេចតេជោ ដល់ក្រុមហ៊ុនរបស់លោកដែលនឹងអាចឈានទៅដល់ការវិនិយោគនៅកម្ពុជា»។

​សម្ដេចតេជោហ៊ុនសែន ស្វាគមន៍ចំពោះគោលបំណងរបស់ក្រុមហ៊ុនពីការមានវត្តមាននៅកម្ពុជា។ ប្រទេសកម្ពុជាត្រូវការវិនិយោគបន្ថែមពីសំណាក់ក្រុមហ៊ុនកូរ៉េ។ ដើម្បីវិនិយោគបានចំគោលដៅ សម្ដេចតេជោបានផ្ដល់អនុសាសន៍ថា ឱ្យសិក្សាលម្អិតថាតើចាប់យកចំណុចអ្វីដែលជាគោលដៅនៃការវិនិយោគ។

សម្តេចតេជោ​ បន្ថែមថា ៖«កម្ពុជាត្រូវការវិនិយោគលើឧស្សាហកម្មកែច្នៃ ពីព្រោះកម្ពុជា មានវត្ថុធាតុដើមច្រើន ដែលសមត្ថភាពនៃការកែច្នៃនៅមានកម្រិត។ ដោយទីផ្សារកូរ៉េ ត្រូវការនាំចូលផលិតផលជាស្បៀង, ដូច្នេះបណ្តាក្រុមហ៊ុនកូរ៉េអាចធ្វើការសិក្សាអំពីការកែច្នៃលើផលិតផលស្បៀង។

​សម្ដេចតេជោ បានបន្ថែមពីការការវិនិយោគក្នុងរូបមន្ត​ ១​+ និងគូសបញ្ជាក់ថា ក្រុមហ៊ុនដែលវិនិយោគ នៅក្នុងប្រទេសអាស៊ាន គួរវិនិយោគផងដែរនៅក្នុងប្រទេសកម្ពុជា ព្រោះថានៅពេលប្រទេសមួយមានបញ្ហា ក្នុងផលិតកម្ម គឺរូបមន្ត ១​+ នេះ អាចធានាច្រវាក់ផលិតកម្មបាន។

នៅព្រឹកថ្ងៃដដែលនោះដែរ  ​ លោក Yang Jong Hee ប្រធាន និងជានាយកប្រតិបត្តិក្រុមហ៊ុន​ KB Financial Group ក៏បានចូលជួបសម្តែងការគួរសមជាមួយសម្តេចតេជោផងដែរ។​ ដោយលោក​ បានលើកឡើថា ក្រោយពេលដែលសម្ដេចតេជោបានភ្ជាប់ទំនាក់ទំនងការទូតកម្ពុជា-កូរ៉េ ឡើងវិញនៅឆ្នាំ១៩៩៧ ក្រុមហ៊ុន KB បានសិក្សាពីប្រទេសកម្ពុជា ហើយជាបន្តបន្ទាប់ បានពង្រឹងវត្តមានរបស់ខ្លួននៅកម្ពុជា និងមានក្រុមហ៊ុនបុត្រសម្ព័ន្ធជាច្រើន។

លោកថា៖«ក្រុមហ៊ុន KB Financial តែងតែដើរលើមាគ៌ាដែលថ្នាក់ដឹកនាំកម្ពុជា ជាពិសេស សម្តេចតេជោ បានត្រួសត្រាយ ក្នុងនោះ ក្រុមហ៊ុនបានធ្វើការជាមួយប្រជាជនកម្ពុជាហើយមានការសហការគ្នាល្អ ដែលធ្វើឱ្យក្រុមហ៊ុនមានការវិវត្តទៅមុខ»។

​សម្ដេចតេជោ ហ៊ុន សែន បានសាទរ ដែលបានឃើញនូវការរីកចម្រើនរបស់វិស័យមីក្រូហិរញ្ញវត្ថុ ដូចជា ប្រាសាក់ និងវិស័យធនាគារផងដែរ ក្នុងនោះស្ថាប័នមីក្រូហិរញ្ញវត្ថុបានផ្ដល់កម្ចីខ្នាតតូចដល់ប្រជាពលរដ្ឋ ដែលអនុញ្ញាតឱ្យប្រជាពលរដ្ឋមួយចំនួនបានប្រើប្រាស់ក្នុងការធ្វើអាជីវកម្មដើម្បីបង្កើនជីវភាពរស់នៅ។

សម្តេចបានគូសបញ្ជាក់ថា នៅក្នុងពេលវិបត្តិកូវីដ១៩ បញ្ហាមីក្រូហិរញ្ញវត្ថុ បានប៉ះពាល់ដល់ជីវភាពប្រជាពលរដ្ឋផងដែរ។ នៅពេលនោះ សម្ដេចតេជោ ក្នុងនាមជានាយករដ្ឋមន្ត្រី ក៏បានស្នើសុំការយោគយល់ពីស្ថាប័នមីក្រូហិរញ្ញវត្ថុ និងធនាគារ ដោយមិនចង់ឱ្យមានការរឹបអូសណាមួយពីប្រជាពលរដ្ឋដែលមិនមានលទ្ធភាពសងប្រាក់កម្ចី និងបានស្នើដល់ធនាគារ និងស្ថាប័នមីក្រូហិរញ្ញវត្ថុឱ្យរៀបចំឥណទានឡើងវិញ។

សម្ដេចតេជោ ក៏បានផ្ដល់អនុសាសន៍ទៅដល់លោកប្រធានក្រុមហ៊ុន KB Financial ​បានណែនាំឱ្យមានការសិក្សាស្រាវជ្រាវទៅលើការខ្ចីប្រាក់ទាំងនោះ ហើយឃើញថា ភាគច្រើននៃកម្ចី គឺសម្រាប់ធ្វើអាជីវកម្ម ដែលត្រូវនឹងគោលដៅ ក៏ប៉ុន្តែក៏មានកម្ចីមួយចំនួនតូចដែលមិនចំគោលដៅ ដោយសារជាកម្ចី​មិនបានបម្រើដល់ផលិតកម្មទេ៕

​​