អាល្លឺម៉ង់ចង់វិនិយោគលើថាមពលជីវម៉ាស និងឥណទានកាបូននៅកម្ពុជា

លោក Martin Herma អ្នកអភិវឌ្ឍន៍គម្រោងនៃអង្គការ Atmosfair មានបំណង​ក្នុងការស្វែងរកដៃគូក្នុងស្រុកដើម្បីសហការវិនិយោគលើគម្រោងថាមពលជីវម៉ាស​ និងការទាញយកឥណទានកាបូនដើម្បីផ្គត់ផ្គង់ដល់សហគ្រាសរបស់​អាល្លឺម៉ង់។

ការលើកឡើងរបស់លោក Martin ​ធ្វើឡើងក្នុងជំនួបជាមួយលោក សួន សុផល អគ្គលេខាធិការរងគណៈកម្មាធិការវិនិយោគកម្ពុជានៅព្រឹកថ្ងៃទី១២ ខែកញ្ញានៅទីស្តី​ការក្រុមប្រឹក្សាអភិវឌ្ឍន៍កម្ពុជា។

Atmosfair បានថ្លែងបញ្ជាក់អំពីគោលបំណងរបស់ខ្លួនក្នុងការស្វែងរកដៃគូក្នុងស្រុកដើម្បីសហការវិនិយោគលើគម្រោងថាមពលជីវម៉ាសសំដៅចូលរួមចំណែកដល់ការបង្កើនបរិមាណនៃថាមពលបៃតងនៅក្នុងស្រុក, តំបន់, និងសកល។

ជាមួយគ្នានេះ សមភាគីក៏បានបង្ហាញចំណាប់អារម្មណ៍យ៉ាងខ្លាំងអំពីសក្តានុពលនៃឥណទានកាបូននៅកម្ពុជាដែលអាចមានលទ្ធភាពផ្គត់ផ្គង់ជូនសហគ្រាសអាល្លឺម៉ង់ ហើយបានបង្ហាញជំនឿចិត្តថានឹងមានឱកាសក្នុងការសហការជាមួយភាគីពាក់ព័ន្ធលើកិច្ចការនេះនាពេលអនាគត។

លោក សួន សុផល បានថ្លែងអំណរគុណ​ចំពោះសមភាគីដែលបានអញ្ជើញមកកម្ពុជាដោយផ្ទាល់ដើម្បីពិនិត្យ និងស្វែងយល់អំពីកិច្ចការថាមពលបៃតងនៅកម្ពុជា។

លោកបានគូសបញ្ជាក់ថា៖បច្ចុប្បន្នភាពថ្មីនៃរបបវិនិយោគពាក់ព័ន្ធនឹងថាមពលបៃតងដូចមានចែងក្នុងច្បាប់ស្តីពីវិនិយោគនៃព្រះរាជាណាចក្រកម្ពុជាផងដែរ។ លោកក៏បានលើកទឹកចិត្តសមភាគីឱ្យបន្តជួបពិភាក្សាឱ្យបានស៊ីជម្រៅជាមួយក្រសួង ស្ថាប័នពាក់ព័ន្ធសំដៅទទួលបានព័ត៌មានគ្រប់ជ្រុងជ្រោយសម្រាប់បម្រើជាមូលដ្ឋានដល់ការសម្រេចចិត្ត។

កម្ពុជាបានដាក់ជូននូវយុទ្ធសាស្ត្រអភិវឌ្ឍន៍រយៈពេលវែងប្រកបដោយអព្យាក្រឹតកាបូន (LTS4CN)  ទៅកាន់លេខាធិការដ្ឋានអនុសញ្ញាក្របខ័ណ្ឌសហប្រជាជាតិស្ដីពីការប្រែប្រួលអា​កាសធាតុ (UNFCCC) កាលពីថ្ងៃទី៣០ ខែធ្នូ ឆ្នាំ២០២១។​​

កម្ពុជាគឺជាប្រទេសមួយក្នុងចំណោមប្រទេសភាគីនៃអនុសញ្ញា UNFCCC ចំនួន ៤៩  ដែលបានដាក់ជូននូវយុទ្ធសាស្រ្តនេះទៅកាន់លេខាធិការដ្ឋានអនុសញ្ញា UNFCCC គិតត្រឹមពេលបច្ចុប្បន្ន ហើយជាប្រទេសអភិវឌ្ឍន៍តិចតួចទីពីរដែលបានដាក់ជូនយុទ្ធសាស្ត្រនេះដោយកំណត់ គោលដៅច្បាស់លាស់សម្រាប់អព្យាក្រឹតភាពកាបូននៅឆ្នាំ ២០៥០។ ប្រការនេះបញ្ជាក់អំពី​សក្ខីភាព​មួយថ្មី​ទៀត​លើ​ការ​ប្តេជ្ញាចិត្ត​ដ៏​រឹងមាំ សង្គតិភាព និង​មានឆន្ទៈ​នយោបាយ​ខ្ពស់​ក្នុងការ​ដោះស្រាយ​ការប្រែប្រួល​អាកាសធាតុ៕