រដ្ឋមន្ត្រីកសិកម្ម ណែនាំឱ្យថ្នាក់ដឹកនាំវិទ្យាស្ថាន CDRI ពង្រីកទំហំអភិវឌ្ឍវិស័យកសិកម្ម ធានាផលចំណេញសម្រាប់កសិករ

លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានណែនាំឱ្យថ្នាក់ដឹក​នាំ​វិទ្យា​​​ស្ថានបណ្តុះបណ្តាល​ និងស្រាវជ្រាវដើម្បីអភិវឌ្ឍន៍កម្ពុជា​ (CDRI) ស្វែង​យល់​ពីតម្រូវការចាំបាច់ និងកង្វល់របស់កសិករ ដោយណែនាំបច្ចេក​ទេសឱ្យចំគោលដៅ មានភាពប្រាកដនិយម ដោយពង្រីកទំហំនៃការអភិវឌ្ឍវិស័យកសិកម្ម ដើម្បីធានាឱ្យប្រជាកសិករ​ទទួលបានផលចំណេញ ប្រកបដោយនិរន្តរភាព។

លោក ឌិត ទីណា លើកឡើងក្នុងជំនូបពិភាក្សាការងារជាមួយថ្នាក់ដឹកនាំវិទ្យាស្ថាន CDRI នៅរសៀលថ្ងៃទី ២៧ ខែកញ្ញា ឆ្នាំ ២០២៤ នៅទីស្តីការក្រសួងកសិកម្ម។

លោក ឌិត ទីណា បានបន្តថា ថ្នាក់ដឹកនាំវិទ្យាស្ថាន CDRI ត្រូវគិតគូរឱ្យបានច្បាស់លាស់ ស៊ីជម្រៅ នូវរាល់ការអនុវត្តគម្រោងនានារបស់ខ្លួន ដោយត្រូវមានទិសដៅរួមគ្នា ជាពិសេសត្រូវ​គិតគូរ​​ពីនិរន្តរភាពសេដ្ឋកិច្ច និងបរិស្ថានធ្វើយ៉ាង​ណា​ឱ្យប្រជាកសិករ មានហូប មានប្រើ មាន​បាន និងមានរហូត។

លោករដ្ឋមន្ត្រីក៏ បានលើកទឹកចិត្តឱ្យវិទ្យាស្ថាន CDRI សិក្សាស្រាវជ្រាវដើម្បីជួយជំរុញការកែច្នៃ តាមរយៈការបង្កើតផែនការ​ដែលគិតគូរពីប្រសិទ្ធភាពសេដ្ឋកិច្ច និងកាត់បន្ថយចំនាយមិនចាំបាច់ផ្សេងៗ។

បើតាមលោក​រដ្ឋមន្ត្រី ការសិក្សានេះមានសារៈសំខាន់ណាស់ ដើម្បីជួយឱ្យប្រជាកសិករទទួល​បានផលចំណេញពីកសិផល ជាជាងការលក់វត្ថុធាតុដើម ដែលនាំឱ្យបាត់បង់តម្លៃបន្ថែម៕