អ្នកឧកញ៉ា លឹម ហេង៖ អនុស្សរណៈយោគយល់កម្ពុជា-ហុងកុង បង្ហាញសក្ដានុពលកិច្ច​សហប្រតិបត្តិ​ការវិនិយោគ

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា មានប្រសាសន៍នៅថ្ងៃទី ២៨ ខែតុលា ឆ្នាំ ២០២៤ នេះថា អនុស្សរណៈយោគយល់រវាង សភាពាណិជ្ជកម្មកម្ពុជាជាមួយសមាគមពាណិជ្ជកម្មចិននៅកម្ពុជាគឺធ្វើឡើងដើម្បីជំរុញកិច្ចសហប្រតិបត្តិ​ការទ្វេភាគីពាណិជ្ជករហុងកុង ដែលមានបំណងវិនិយោគ ខណៈសមាគមនេះ មានសមាជិករហូតដល់ ជាង ១ ពាន់នាក់ ចម្រុះជាតិសាសន៍ ដូច្នេះ វាជាសក្ដានុពលមួយសម្រាប់កិច្ចសហប្រតិបត្តិការផ្នែក​ធុរកិច្ចពាណិជ្ជកម្ម។

អ្នកឧកញ៉ា លឹម ហេង លើកឡើងថា៖ «អ្នកខ្លះកំពុងតែ​រកស៊ីនៅកម្ពុជាស្រាប់ ដោយពួកគាត់​មានបំណងពង្រីកមុខរបរពួកគាត់ ពីប្រទេសគាត់​មកកាន់កម្ពុជាផងដែរ ដោយសារកម្ពុជា​មាន​ស្ថិរ​ភាពនយោបាយ និងកិច្ច​ព្រមព្រៀង​ពាណិជ្ជកម្មសេរីផ្សេងៗជាច្រើន ដែលមានលទ្ធភាព​អាចឱ្យគាត់​វិនិយោគ​ក្នុងប្រទេស​របស់យើង»។

អ្នកឧកញ៉ា លឹម ហេង បញ្ជាក់ថា ពាណិជ្ជករដែលចាប់អារម្មណ៍ខ្លាំង និងជំរុញកិច្ចជំនូបពាណិជ្ជកម្ម និងជំរុញធុរជនទៅហុងកុង ពីហុងកុងមកវិញ ខណៈកម្ពុជាបានធ្វើជំនួញជាមួយហុងកុងច្រើន មានវិស័យកាត់ដេរ កសិកម្ម និងគ្រឿងបង្គំផ្សេងៗ ដែលមាន​ផ្នែក​អគ្គិសនី និងទោចក្រ​យានយន្ត។

សភាពាណិជ្ជកម្មកម្ពុជា និងសមាគមពាណិជ្ជកម្មចិននៅកម្ពុជានៅព្រឹកថ្ងៃទី ២៨ ខែតុលា ឆ្នាំ២០២៤ បានចុះអនុស្សរណៈយោគយល់គ្នា ដើម្បីចូលរួមលើកកម្ពស់កិច្ចសហប្រតិបត្តិការសេដ្ឋកិច្ច និងជំរុញការរីកចម្រើនរួមគ្នា។

ពិធីចុះអនុស្សរណៈយោគយល់នេះ ប្រព្រឹត្តទៅនៅសភាពាណិជ្ជកម្មកម្ពុជា និងចុះហត្ថលេខាដោយអ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានក្រុមប្រឹក្សាពិគ្រោះយោបល់ធុរកិច្ចអាស៊ានសម្រាប់កម្ពុជា និងលោកបណ្ឌិត បិន លី (Ben Li) ប្រធានសមាគមពាណិជ្ជកម្មចិននៅកម្ពុជា និងមានការអញ្ជើញចូលរួមពីអនុប្រធានសភាពាណិជ្ជកម្មកម្ពុជា សមាជិកសមាជិកាសភាពាណិជ្ជកម្មកម្ពុជា និងពាណិជ្ជករចិននិងកម្ពុជាជាច្រើនរូប។

សូមជំរាបថា អនុស្សរណៈយោគយល់នេះ ផ្តោតជាសំខាន់លើកិច្ចសហប្រតិបត្តិការរបស់ស្ថាប័នទាំងពីរលើផ្នែកសំខាន់ៗរួមមាន៖ ការកំណត់កាលានុវត្តភាពធុរកិច្ច ការផ្លាស់ប្តូរព័ត៌មាននិងធនធាន និងការសហការរៀបចំព្រឹត្តិការណ៍ធុរកិច្ចនិងកម្មវិធីរួមគ្នា ក្នុងគោលបំណងជំរុញពាណិជ្ជកម្ម និងវិនិយោគពីចិនមកកម្ពុជា ជាពិសេស តំបន់រដ្ឋបាលពិសេសហុងកុង៕

អត្ថបទ៖ ឡេង ដេត