ព័ត៌មានជាតិ

ខេត្តកំពតប្រមូលទិន្នផលស្វាយកែវរមៀតបានជាង ១០ ម៉ឺនតោនក្នុងឆ្នាំ២០២៤

បានផុស

២ ខែ មុន

នៅ

ថ្ងៃអង្គារ ២១ មករា ២០២៥

ដោយ

រយៈពេល ១២ខែ ឆ្នាំ២០២៤ ខេត្តកំពត ប្រមូលទិន្នផលស្វាយកែវរមៀតបានជាង ១០ ម៉ឺនតោន (១០៥ ៩៣០តោន) សម្រាប់ការនាំចេញទៅកាន់ទីផ្សារក្រៅប្រទេស និងក្នុងស្រុក។ នេះបើតាមការឱ្យដឹងពីលោក ខេន ថាញ់ ប្រធានការិយាល័យ ក្សេត្រសាស្ត្រ និងផលិតភាពកសិកម្ម នៃមន្ទីរកសិកម្ម រុក្ខាប្រមាញ់ និងនេសាទខេត្តកំពតថ្លែងមកកាន់ កម្ពុជាថ្មី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមលោក ខេន ថាញ់ បានឱ្យដឹងថា ក្នុងឆ្នាំ២០២៤កន្លងទៅនេះ ដំណាំស្វាយកែវរមៀត អាចប្រមូលផលបានសរុបជាង ១០ ម៉ឺនតោន (១០៥.៩៣០តោន) ក្នុងនោះ ទទួលបាន ១៥ តោន/មួយហិតា ដែលបាននាំចេញទៅកាន់ទីផ្សារប្រទេស វៀតណាម (តាមច្រកទ្វេភាគីតន់ហន់ មានចំនួនសរុប ១ ៦៥០៥ តោនក្នុងឆ្នាំ២០២៤) ព្រមទាំងប្រទេសថៃ និងចូលរោងចក្រកែច្នៃក្នងស្រុក តាមរយៈឈ្មួញកណ្តាលប្រមូលទិញពីកសិករ។

លោកក៏បានបញ្ជាក់បន្ថែមដែរថា បើយោងរបាយការណ៍របស់ការិយាល័យគយ និង រដ្ឋាករតន់ហន់ ខេត្តកំពត តម្លៃក្នុងឆ្នាំ២០២៣ (គិតជាមធ្យមប្រចាំឆ្នាំ ៧៣៦.៣៦៤ រៀល/គ.ក) មានភាពល្អប្រសើរជាងក្នុងឆ្នាំ២០២៤ (គិតជាមធ្យមប្រចាំឆ្នាំ ៦២៥ រៀល/គ.ក)។

ជាមួយនិងការនាំចេញទៅតាមបណ្តាប្រទេសមួយចំនួននេះ ប្រធានការិយាល័យរូបនេះក៏បានបញ្ជាក់ដែរថា «កំឡុងពេលប្រមូលផល ស្វាយក៏មានបញ្ហាប្រឈមមួយចំនួនផងដែរ ដូចជាកត្តាអាកាសធាតុមានការប្រែប្រួល តម្លៃមិនមានស្ថិរភាព ប្រែប្រួលទៅតាមទីផ្សារ»។

នៅខេត្តកំពតមានស្រុកចំនួន ៩ ដែលបានប្រកបរបរដាំដុះស្រាវកែវរមៀត ដែលក្នុងនោះមានស្រុកអង្គរជ័យ, បន្ទាយមាស, ឈូក, ជុំគិរី, ដងទង់, កំពង់ត្រាច, ទឹកឈូ, ក្រុងកំពត និងក្រុងបូកគោ ដែលមានផ្ទៃដីដាំដុះសរុបប្រមាណ ៧ ៧៩៦ ហិតា។ ក្នុងនោះ ចំណោមផ្ទៃដៃដាំដុះសរុប ឆ្នាំ២០២៤ ផ្ទៃដីប្រមូលផលមានប្រមាណ ៧ ០៦២ ហិតា៕