ព័ត៌មានអន្ដរជាតិ

ឥណ្ឌូណេស៊ី៖ ការប្ដេជ្ញាវិនិយោគរបស់ Apple មានត្រឹម ២០០ លានដុល្លារ ប៉ុណ្ណោះ មិនមែន ១ ប៊ីលានដុល្លារទេ

បានផុស

១ year មុន

នៅ

ថ្ងៃព្រហស្បតិ៍ ២៣ មករា ២០២៥

ដោយ

ក្រសួងឧស្សាហកម្មឥណ្ឌូណេស៊ី បានអះអាងថា ក្រុមហ៊ុនបច្ចេកវិទ្យាយក្សរបស់អាមេរិក Apple មានគម្រោងវិនិយោគត្រឹមតែប្រមាណ ២០០ លានដុល្លារ ប៉ុណ្ណោះ លើគម្រោងសាងសង់រោងចក្រផលិតឧបករណ៍តាមដានសម្ភារៈ AirTag នៅលើកោះបាតាំ។ ចំនួននេះ គឺទាបជាងឆ្ងាយ ធៀបនឹងការសន្យាវិនិយោគ ១ ប៊ីលានដុល្លារ ដែលគេរាយការណ៍កាលពីលើកមុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារសារព័ត៌មានរដ្ឋឥណ្ឌូណេស៊ី Antara បានចុះផ្សាយការណ៍នេះនៅថ្ងៃព្រហស្បតិ៍ ដោយស្រង់សម្ដីអ្នកនាំពាក្យរបស់ក្រសួងដែលនិយាយថា ការវាយតម្លៃដំបូងនៃសំណើវិនិយោគរបស់ក្រុមហ៊ុន Apple បានបង្ហាញពីការកាត់បន្ថយនៃតួលេខ។

អ្នកនាំពាក្យក្រសួង លោក Febri Hendri Antoni Arif បាននិយាយកាលពីថ្ងៃពុធថា៖ «ផ្អែកលើការវាយតម្លៃបច្ចេកទេសរបស់យើង តម្លៃនៃការវិនិយោគសម្រាប់រោងចក្រ AirTag របស់ក្រុមហ៊ុន Apple នៅកោះបាតាំ (Batam) មានត្រឹមតែ ២០០ លានដុល្លារប៉ុណ្ណោះ ពោលគឺទាបជាងការប្តេជ្ញាចិត្តចំនួន ១ ប៊ីលានដុល្លារ ដែលមានចែងក្នុងសំណើដាក់ជូនយើង»។

យោងតាម Febri តួលេខ ២០០ លានដុល្លារនេះ រួមបញ្ចូលទាំងការចំណាយដើមទុនដូចជាការទិញដី ថ្លៃសាងសង់ និងថ្លៃលទ្ធកម្មឧបករណ៍សម្រាប់រោងចក្រ។

លោកបានពន្យល់ថា ភាពខុសគ្នានេះបានកើតឡើងដោយសារតែការគណនារបស់រដ្ឋាភិបាល មិនមានការប៉ាន់ស្មានតម្លៃនាំចេញ និងការផ្គត់ផ្គង់វត្ថុធាតុដើម ដែលមានក្នុងសំណើរបស់ Apple នោះទេ ។

Febri បានបន្ថែមថា ការវិនិយោគ 1 ប៊ីលានដុល្លាររបស់ក្រុមហ៊ុន Apple នឹងល្អកាន់តែខ្លាំង ប្រសិនបើវាត្រូវបានចំណាយទាំងស្រុងលើការចំណាយមូលធន (Capital expenditure)។

គួរគូសបញ្ជាក់ថា ក្នុងការរាយការណ៍កាលពីលើកមុន ក្រុមហ៊ុន Apple បានប្ដេជ្ញាវិនិយោគនៅឥណ្ឌូណេស៊ីចំនួន ១ ប៊ីលានដុល្លារ ដើម្បីជាថ្នូរឱ្យរដ្ឋាភិបាលនេះបញ្ឈប់ការហាមឃាត់ការរឹតត្បឹតការលក់ទូរស័ព្ទម៉ាក iPhone 16 របស់ខ្លួន។ រដ្ឋាភិបាលឥណ្ឌូណេស៊ីលើកឡើងថា ក្រុមហ៊ុន Apple មិនបានចំណាយតាមការសន្យាវិនិយោគ ហើយថា ក្រុមហ៊ុននេះមិនបានប្រើប្រាស់សមាធាតុក្នុងស្រុកឥណ្ឌូណេស៊ី ដើម្បីផលិត iPhone 16 ស្របតាមច្បាប់កំណត់៕