ព័ត៌មានអន្ដរជាតិ

ម៉ាឡេស៊ីស៊ើបអង្កេតការលក់បង្ខូចតម្លៃលើដែកថែបស្រោបស័ង្កសីវៀតណាម

បានផុស

១ year មុន

នៅ

ថ្ងៃព្រហស្បតិ៍ ១៣ កុម្ភៈ ២០២៥

ដោយ

ក្រសួងវិនិយោគ ពាណិជ្ជកម្ម និងឧស្សាហកម្មរបស់ម៉ាឡេស៊ី (MITI) បានផ្តួចផ្តើមការស៊ើបអង្កេតប្រឆាំងការលក់បង្ខូចតម្លៃលើដែកស្រោបស័ង្កសី ឬដែកថែបស្រោបស័ង្កសី មានប្រភព ឬនាំចូលពីប្រទេសវៀតណាម។ នេះបើតាមការឱ្យដឹងពីអាជ្ញាធរដោះស្រាយពាណិជ្ជកម្មវៀតណាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាសែត Viet Nam News បានផ្សាយថា ម៉ាឡេស៊ីក៏បើកការស៊ើបអង្កេតលើប្រភេទដែកដូចគ្នាមានប្រភពមកពីចិន និងកូរ៉េខាងត្បូងផងដែរ។ វិធានការរបស់ម៉ាឡេស៊ីធ្វើឡើងក្រោយមានការប្ដឹងពីក្រុមហ៊ុនឧហ្សាហកម្មក្នុងស្រុករបស់ប្រទេសនេះ។

ដើម្បីឆ្លើយតបភ្លាមៗចំពោះករណីនេះ អាជ្ញាធរដោះស្រាយពាណិជ្ជកម្មបានផ្តល់ស្នើឱ្យសមាគមឧស្សាហកម្មជូនដំណឹងដល់ក្រុមហ៊ុនផលិត និងអ្នកនាំចេញដែលពាក់ព័ន្ធ និងលើកទឹកចិត្តឱ្យមានការចូលរួមក្នុងការស៊ើបអង្កេតប្រសិនបើចាំបាច់។

គួរគូសបញ្ជាក់ថា ឧស្សាហកម្មដែកថែប និងផលិតផលដែកថែបរបស់វៀតណាម បានរងការស៊ើបអង្កេតពាណិជ្ជកម្ម រួមទាំងការលក់បង្ខូចតម្លៃ ជាបន្តបន្ទាប់ ពីប្រទេសក្នុងតំបន់ និងក្រៅតំបន់ដូចជាឥណ្ឌា សហភាពអឺរ៉ុប និងសហរដ្ឋអាមេរិកជាដើម។

ក្នុងចំណាត់ការបែបនេះ ឥណ្ឌាបានដាក់ពន្ធប្រមាណ ៣០ ភាគរយ លើដែកថែបរបស់វៀតណាម ខណៈប្រទេសកំពុងត្រួតពិនិត្យលើពន្ធគយប្រឆាំងការលក់បង្ខូចតម្លៃលើដែកថែបនាំចូលពីវៀតណាមដូចគ្នា។ ក្រៅពីនេះ ឧស្សាហកម្មដែកថែបក៏រងវិធានការពន្ធថ្មី ២៥ ភាគរយ របស់សហរដ្ឋអាមេរិក បន្ថែមពីលើអត្រាពន្ធដែលមានស្រាប់បច្ចុប្បន្ន ២៥ ភាគរយ ផងដែរ៕