សេដ្ឋកិច្ច

រដ្ឋបាលខេត្តមណ្ឌលគិរី ទទួលស្គាល់មានលំហូរជនជាតិចិនសម្រុកចុះមកខេត្តមណ្ឌលគិរី

បានផុស

១ year មុន

នៅ

ថ្ងៃសុក្រ ១៤ កុម្ភៈ ២០២៥

ដោយ

អាជ្ញាធរខេត្តមណ្ឌលគិរីបានលើកឡើងពីកំណើនជនជាតិចិនចុះមកខេត្តមណ្ឌលគិរីនៅរយៈប៉ុន្មានខែចុងក្រោយនេះ ដែលនាំឲ្យមានការកើនឡើងតម្រូវការផ្ទះជួលយ៉ាងគំហុក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឆ្លើយតបការសាកសួររបស់ក្រុមអ្នកសារព័ត៌មានពីវត្តមានជនជាតិចិន ក្នុងដំណើរចុះបេសកកម្មទ្រង់ទ្រាយធំទៅកាន់ខេត្តមណ្ឌលគិរី ដើម្បីផ្សព្វផ្សាយព័ត៌មានទ្រង់ទ្រាយធំពីឧស្សាហកម្មរ៉ែ និងកសិឧស្សាហកម្មទេសចរណ៍ លោក ងិន សុវិមាន អភិបាលរងខេត្តមណ្ឌលគិរីទទួលស្គាល់ថា ពិតជាលំហូរជនជាតិចិនបានធ្វើដំណើរមកកាន់ខេត្តមណ្ឌលគិរីនៅមួយរយៈចុងក្រោយនេះ ដោយនាំឲ្យមានតម្រូវការផ្ទះជួល ខណៈនៅតាមរីសតក៏មានការកើនឡើងការកក់ជួលស្នាក់នៅពីភ្ញៀវជនជាតិចិន។

ពាក់ព័ន្ធវត្តមានជនជាតិចិនចុះមកខេត្តមណ្ឌលគិរី លោក ងិន សុវិមាន បានគូសបញ្ជាក់ថា លោកក៏មិនទាន់អាចវាយតម្លៃក្នុងរូបភាពឬក្នុងគោលដៅជាក់លាក់ណាមួយនៅឡើយទេ។

បន្ថែមពីនេះ បើតាមលោក ងិន សុវិមាន ការមកដល់របស់ជនជាតិចិនមកខេត្តមណ្ឌលគិរីយ៉ាងគំហុកនៅប៉ុន្មានខែចុងក្រោយ ដែលទាញការចាប់អារម្មណ៍ពីមជ្ឍដ្ឋានប្រជាពលរដ្ឋក្នុងខេត្ត ក៏មិនទាន់ធ្វើឲ្យប៉ះពាល់ឬនាំឲ្យហាងឆេងដីធ្លីក្នុងខេត្តឡើងថ្លៃឬមានការប្រែប្រួលនោះដែរ៕