ធនាគារពិភពលោកប្តេជ្ញាបន្តជួយអភិវឌ្ឍន៍វិស័យហិរញ្ញវត្ថុកម្ពុជា

លោកស្រី Lalita M. Moorty នាយក ធនាគារពិភពលោកប្រចាំតំបន់អាស៊ីខាងកើត និងប៉ាស៊ីហ្វិកបានលើកឡើងថា ធនាគារពិភពលោកនៅតែបន្តការផ្តល់នូវជំនួយបច្ចេកទេសនានាដើម្បីចូលរួមចំណែកដល់បន្តការរីកលូតលាស់នៃវិស័យហិរញ្ញវត្ថុរបស់កម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកឡើងរបស់លោកស្រី Lalita ក្នុងជំនួបជាមួយលោកស្រីបណ្ឌិត ជា សិរី ទេសាភិបាលធនាគារជាតិនៃកម្ពុជា ​កាលពីថ្ងៃទី១៣ ខែកុម្ភៈ ឆ្នាំ២០២៥ នៅធនាគារជាតិនៃកម្ពុជា អគារវត្តភ្នំ។

​លោកស្រី Lalita M. Moorty បានលើកឡើងអំពី ស្ថានភាពទូទៅនៃសេដ្ឋកិច្ចពិភពលោក បេសកកម្មរបស់ធនាគារពិភពលោក វឌ្ឍនភាពនៃវិស័យហិរញ្ញវត្ថុក្នុងតំបន់ និងលទ្ធភាពរបស់ធនាគារពិភពលោកក្នុងការផ្តល់ជំនួយបច្ចេកទេសនានាជូនធនាគារជាតិនៃកម្ពុជាតាមការចាំបាច់ ប្រសិនបើត្រូវការ និងព្រមទាំងចង់ស្វែងយល់បន្ថែមពីស្ថានភាពទូទៅនៃប្រព័ន្ធធនាគារនៅកម្ពុជា។

លោកស្រីបណ្ឌិត ជា សិរីបានថ្លែងា កន្លងមក ធនាគារជាតិនៃកម្ពុជាក៏បានដាក់ចេញនូវគោលនយោបាយជាច្រើន ដូចជា គោលនយោបាយម៉ាក្រូប្រុងប្រយ័ត្ន និងការដាក់ឲ្យប្រើប្រាស់នូវប្រព័ន្ធឌីជីថល ជាពិសេសប្រព័ន្ធទូទាត់បាគង ដែលមិនត្រឹមតែត្រូវបានប្រើប្រាស់ជាប្រព័ន្ធទូទាត់ប៉ុណ្ណោះទេ ថែមទាំងបានប្រើប្រាស់ជាសូចនាករនៃលំហូរសាច់ប្រាក់របស់សហគ្រាសធន់តូចនិងមធ្យមសម្រាប់ការវាយតម្លៃផ្នែកឥណទាន ដែលនេះ ជាជំហានថ្មីមួយសម្រាប់វិស័យធនាគារនៅកម្ពុជា។

លោកស្រីបណ្ឌិតក៏បានគួសបញ្ជាក់អំពីតួនាទីរបស់ក្រុមហ៊ុនក្រេឌីតប៊ុយរ៉ូកម្ពុជា ក្នុងការជួយលើកកម្ពស់ប្រសិទ្ធភាពនៃការវិភាគឥណទានរបស់គ្រឹះស្ថានធនាគារនិងហិរញ្ញវត្ថុ ដែលជាចំណែកមួយនៃវិធានការពារនិងរក្សាស្ថិរភាពហិរញ្ញវត្ថុ។

​លោកស្រីបណ្ឌិត ជា សិរីក៏បានឡើងពីការរួមចំណែករបស់ធនាគារពិភពលោកក្នុងការអភិវឌ្ឍវិស័យធនាគារនិងហិរញ្ញវត្ថុនៅកម្ពុជា ហើយធនាគារជាតិនៃកម្ពុជាក៏នឹងបន្តកិច្ចសហប្រតិបត្តិការល្អជាមួយធនាគារពិភពលោកនិងដៃគូអភិវឌ្ឍនានា ផងដែរ ស្របតាមតម្រូវការនិងបរិបទរបស់កម្ពុជា៕