ព័ត៌មានអន្ដរជាតិ

ចិនដាក់ពន្ធសងសឹកលើកាណាដា ខណៈសង្រ្គាមពាណិជ្ជកម្មតានតឹង

បានផុស

១ ខែ មុន

នៅ

ថ្ងៃចន្ទ ១០ មីនា ២០២៥

ដោយ

ប្រទេសចិនកាលពីថ្ងៃសៅរ៍ បានប្រកាសពន្ធសងសឹកលើទំនិញកសិកម្មមួយចំនួនរបស់កាណាដា ដើម្បីជាការសងសឹកបន្ទាប់ពីរដ្ឋាភិបាលក្រុងអូតាវ៉ា បានដាក់ពន្ធនាំចូលលើរថយន្តអគ្គិសនី ផលិតផលដែក និងអាលុយមីញ៉ូមចិន។ នេះបើតាមការចុះផ្សាយរបស់បណ្ដាញទូរទស្សន៍ CNBC។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចិនបានប្រកាសថា ពន្ធ ១០០ ភាគរយ នឹងដាក់លើប្រេងចម្អិនអាហារប្រេងកាណូឡារបស់កាណាដា នំ Oil Cakes និងសណ្ដែក ខណៈដែលពន្ធ ២៥ ភាគរយ នឹងដាក់លើផលិតផលទឹក និងសាច់ជ្រូក ដែលមានប្រភពពីកាណាដា។

យោងតាមសេចក្តីថ្លែងការណ៍ពីគណៈកម្មការពន្ធគយចិននៃក្រុមប្រឹក្សារដ្ឋ វិធានការពន្ធគយនេះនឹងចូលជាធរមានចាប់ពីថ្ងៃទី ២០ ខែមីនា តទៅ។

ការចាត់វិធានការរបស់ចិន ធ្វើឡើងចំពេលដែលសង្គ្រាមពាណិជ្ជកម្មពិភពលោកផ្ទុះឡើង បន្ទាប់ពីសហរដ្ឋអាមេរិកប្រកាសពន្ធជាច្រើនលើកាណាដា ម៉ិកស៊ិក និងចិន ដែលធ្វើឱ្យមានការសងសឹកគ្នាទៅវិញទៅមក។

កាណាដា បានដាក់ពន្ធនាំចូល ១០០ ភាគរយ លើរថយន្តអគ្គិសនីចិន ចាប់ពីថ្ងៃទី ១ ខែតុលា ឆ្នាំមុន ដោយដើរតាមគន្លងរបស់សហរដ្ឋអាមេរិក និងសហភាពអឺរ៉ុប ជុំវិញការព្រួយបារម្ភទាក់ទងនឹងការប្រកួតប្រជែងមិនស្មើភាពគ្នា។ កាណាដា ក៏បានដាក់ពន្ធ ២៥ ភាគរយ លើការនាំចូលផលិតផលដែក និងអាលុយមីញ៉ូមពីចិនផងដែរ ដោយចូលជាធរមានចាប់ពីថ្ងៃទី ១៥ ខែតុលា ឆ្នាំមុនដូចគ្នា។

អាជ្ញាធរគយរបស់ចិន បាននិយាយក្នុងសេចក្តីថ្លែងការណ៍ប្រកាសពន្ធសងសឹកថា៖ «ការដាក់ពន្ធគយជាឯកតោភាគីរបស់កាណាដា ដែលមិនគោរពតាមច្បាប់របស់អង្គការពាណិជ្ជកម្មពិភពលោក គឺជាការអនុវត្តពាណិជ្ជកម្មបែបការពារនិយម បង្កើតជាវិធានការរើសអើងប្រឆាំងនឹងចិន ហើយរំលោភយ៉ាងធ្ងន់ធ្ងរលើសិទ្ធិ និងផលប្រយោជន៍ស្របច្បាប់របស់ចិន និងធ្វើឱ្យខូចទំនាក់ទំនងសេដ្ឋកិច្ច និងពាណិជ្ជកម្មចិន-កាណាដា»៕