ព័ត៌មានអន្ដរជាតិ

តម្លៃមាសអន្តរជាតិបំបែកកំណត់ត្រាថ្មី ជិត ៣ ០០០ ដុល្លារ/អោន

បានផុស

២ សប្តាហ៍ មុន

នៅ

ថ្ងៃសុក្រ ១៤ មីនា ២០២៥

ដោយ

តម្លៃមាសជួញដូរលើទីផ្សារអន្តរជាតិ បានបំបែកកំណត់ត្រាខ្ពស់បំផុតថ្មី ជិត ៣ ០០០ ដុល្លារ/អោន ដោយសារតែកំណើនភាពតានតឹងនៃសង្រ្គាមពាណិជ្ជកម្ម ដោយសារតែគោលនយោបាយពន្ធគយរបស់អាមេរិក។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តម្លៃមាសជួញដូរដោយផ្ទាល់ បានកើនឡើង ១,៦ ភាគរយ ដោយជួញដូរនៅ ២ ៩៨៦ ដុល្លារ/អោន គិតត្រឹមម៉ោង គិតត្រឹមម៉ោង ១០ និង ៤០ នាទីយប់ ថ្ងៃព្រហស្បតិ៍ ក្រុងញូវយ៉ក (ម៉ោង ១០ និង ៤០ នាទីព្រឹកថ្ងៃសុក្រ នៅសិង្ហបុរី)។ តម្លៃមាសនេះ បានកើនដល់ចំណុចខ្ពស់បំផុត ២ ៩៩០ ដុល្លារ/អោន កាលពីវគ្គមុន ខណៈគេរំពឹងថា តម្លៃប្រចាំសប្ដាហ៍នឹងបន្តកើនឡើងទៀត។

តម្លៃមាសនាពេលអនាគតរបស់អាមេរិក ត្រូវបានជួញដូរនៅតម្លៃ ២ ៩៩៦,៧ ដុល្លារ/អោន ដោយកើនឡើង ០,២ ភាគរយ។

អ្នកជំនាញលើកឡើងថា តម្លៃមាសកើនឡើងនៅពេលវិនិយោគិនបង្កើនការជួញដូរទ្រព្យសម្បត្តិសុវត្ថិភាពប្រភេទនេះ ចំពេលមានការព្រួយបារម្ភពាក់ពន្ធនឹងគោលនយោបាយពន្ធគយរបស់ប្រធានាធិបតីអាមេរិក លោក ដូណាល់ ត្រាំ។

នាពេលកន្លងមក ពន្ធរបស់ ត្រាំ បង្កការព្រួយបារម្ភពីអតិផរណា និងភាពមិនច្បាស់លាស់នៃសេដ្ឋកិច្ចអាមេរិក និងធ្វើឱ្យតម្លៃមាសបំបែកកំណត់ត្រាជាច្រើនដង រាប់តាំងពីលោកឡើងកាន់អំណាចចុងខែមករា មក។

កត្តាជំរុញតម្លៃមាសសំខាន់មួយផ្សេងទៀតគឺថា មានកំណើននៃការរំពឹងទុកដែលថា ធនាគារកណ្ដាលសហរដ្ឋអាមេរិកអាចនឹងបន្តកាត់បន្ថយអត្រាការប្រាក់របស់ខ្លួន។

គេមើលឃើញថា ការបំបែកកំណត់ត្រាចុងក្រោយ កំពុងធ្វើឱ្យតម្លៃមាសហក់ទៅកាន់តែជិត ៣ ០០០ ដុល្លារ/អោន តាមអ្វីដែលអ្នកជំនាញ និងធនាគារអាមេរិកធំៗ បានព្យាករទុកនាពេលកន្លងមក៕