ព័ត៌មានជាតិ

តម្លៃស្ពៃក្តោប ដាំក្នុងផ្ទះសំណាញ់នៅស្រុកភ្នំព្រឹកធ្លាក់ចុះបន្តិច

បានផុស

២ សប្តាហ៍ មុន

នៅ

ថ្ងៃសុក្រ ១៤ មីនា ២០២៥

ដោយ

លោក ហ៊ុន វត្ថា ប្រធានសហគមន៍កសិកម្មពន្លឺថ្មីពេជ្រចិន្តា បានប្រាប់ថា បច្ចុប្បន្នស្ពៃក្តោបក្នុងសហគមន៍ដាំដុះនៅក្នុងផ្ទះសំណាញ់ អាចលក់ចេញបានក្នុងតម្លៃ ២ ពាន់រៀល ក្នុងមួយគីឡូក្រាម ដែលតម្លៃនេះ មានការធ្លាក់ចុះបន្តិច បើធៀបតម្លៃកាលពីឆ្នាំមុន។ សហគមន៍កសិកម្មពន្លឺថ្មីពេជ្រចិន្តា មានទីតាំងស្ថិតក្នុងភូមិ ភ្នំតូច ឃុំពេជ្រចិន្តា ស្រុកភ្នំព្រឹក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហ៊ុន វត្ថា បានឱ្យដឹងនៅថ្ងៃទី ១៤ ខែមីនា ឆ្នាំ ២០២៥ថា នៅរយៈពេល ៣ ខែ នៃដើមឆ្នាំ២០២៥ នេះ តម្លៃស្ពៃក្តោបនៅក្នុងផ្ទះសំណាញ់ មានការធ្លាក់ថ្លៃជាងឆ្នាំមុនៗ ដោយសារតែអាកាសធាតុអំណោយផលដល់ផលដំណាំ ដូច្នេះកសិករនាំគ្នាដាំដុះនៅខាងក្រៅបានច្រើនជាងមុន ជាហេតុធ្វើឱ្យលើសតម្រូវទីផ្សារ។

បើទោះជាបែបនេះក្តី បន្លែស្ពៃក្តោបផ្ទះសំណាញ់នៅក្នុងសហគមន៍ពេជ្រចិន្តា នៅតែអាចលក់ចេញបាននៅក្នុងតម្លៃមួយដែលកសិករអាចទទួលយកបាន គឺលក់ចេញក្នុងតម្លៃ ២ ពាន់រៀល ក្នុងមួយគីឡូក្រាម ដោយបាននាំចេញទៅតាមតម្រូវការទីផ្សារចន្លោះពី ៣០០-៥០០ គីឡូក្រាមក្នុងមួយថ្ងៃ។

ដោយឡែកបន្លែស្ពៃក្តោប ដែលដាំក្រៅផ្ទះសំណាញ់ធម្មតា គឺ លក់ចេញបានក្នុងតម្លៃចន្លោះពី ៨០០ ទៅ ១ ២០០ រៀល ប៉ុណ្ណោះក្នុងមួយគីឡូក្រាម។

លោកបានពន្យល់ថា «តម្លៃស្ពៃក្តោប លក់បានតម្លៃផ្សេងៗគ្នាទៅតាមខែនីមួយៗ ដោយចាប់ពីខែមករា ដល់ខែមីនា តម្លៃផ្សេង, ខែមីនា ដល់ខែមិថុនា តម្លៃផ្សេង និងចាប់ពីខែកញ្ញា ដល់ខែធ្នូ តម្លៃផ្សេង ដោយស្ពៃក្តោបយើងទិញពីកសិករមានតម្លៃចន្លោះពី ១៥០០ រៀល ដល់ ៣៥០០ រៀល។ ក្នុងនោះ តម្លៃស្ពៃក្តោបមានតម្លៃខ្ពស់ជាងគេដល់ ៣៥០០ រៀល ក្នុងមួយគីឡូក្រាម គឺចន្លោះពីខែកញ្ញា រហូតដល់ខែធ្នូ»។

ជាមួយគ្នានេះ លោកបានប្រាប់ថា៖ «តម្លៃស្ពៃក្តោបក្នុងផ្ទះសំណាញ់ ២ ពាន់រៀលក្នុងមួយគីឡូ ទើបតែធ្លាក់ចុះនៅដើមឆ្នាំ២០២៥ នេះតែប៉ុណ្ណោះ ព្រោះតែកសិករដាំដុះមិនមានផែនការច្បាស់លាស់ ដាំខាងក្រៅផ្ទះសំណាញ់ យើងមិនអាចគ្រប់គ្រងបាន»។

បើទោះបីតម្លៃបច្ចុប្បន្នរាងទាបបន្តិចក្តីតែម្ចាស់សហគមន៍រូបនេះ បានមើលឃើញថា តម្លៃស្ពៃក្តោបនឹងហក់ឡើងវិញនៅចុងខែមីនា នេះ ព្រោះ បន្លែដែលពលរដ្ឋបានដាំនឹងចាប់អស់ជាបណ្ដើរៗ ឬចាប់ផ្តើមរលួយព្រោះដល់អាយុកាល។

បច្ចុប្បន្នស្ពៃក្តោប នៅក្នុងសហគមន៍ នៅពេលចាល់ខ្លាំង គឺនាំចេញទៅកាន់ផ្សារមួយចំនួនដូចជា ផ្សារពូពុយ ផ្សារព្រំដែនកំរៀង-ភ្នំព្រឹក ប៉ុន្តែតម្លៃល្អ គឺនាំចេញមកកាន់ទីផ្សាររាជធានីភ្នំពេញ។

បើតាមលោក ហ៊ុន វត្ថា ដដែល សព្វថ្ងៃ នៅក្នុងសហគមន៍កសិកម្មពន្លឺថ្មីពេជ្រចិន្តា ធ្វើការនាំចេញបន្លែចម្រុះប្រមាណជាង ១០ មុខដែលមានដាំក្នុងសំណាញ់ លក់លើទីផ្សារចន្លោះពី ២ តោន ទៅ ២,៥ តោន ក្នុងមួយថ្ងៃ៕