ព័ត៌មានអន្ដរជាតិ

សិស្សចូលរៀនវិទ្យាសាស្ត្រកុំព្យូទ័រនៅកូរ៉េខាងត្បូង ធ្លាក់ចុះ ដោយសារ AI

បានផុស

១ year មុន

នៅ

ថ្ងៃចន្ទ ១៧ មីនា ២០២៥

ដោយ

ចំនួននិស្សិតកូរ៉េខាងត្បូងដែលដាក់ពាក្យចូលរៀនផ្នែកវិទ្យាសាស្ត្រកុំព្យូទ័រផ្សេងៗបានធ្លាក់ចុះ ចំពេលការរីកចម្រើននៃបញ្ញាសិប្បនិម្មិត (AI) ដែលជំរុញស្វ័យប្រវត្តិកម្មការងារ កាត់បន្ថយតម្រូវការវិស្វករផ្នែកបច្ចេកវិទ្យាព័ត៌មាន (IT)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទិន្នន័យនៃការចូលរៀននៅសាកលវិទ្យាល័យកូរ៉េខាងត្បូង ដែលចេញផ្សាយកាលពីសប្ដាហ៍មុន បានបង្ហាញថា សិស្សថ្មីចំនួន ២៧ ២៦៦ នាក់ បានដាក់ពាក្យសម្រាប់ការសិក្សាផ្នែកវិទ្យាសាស្ត្រកុំព្យូទ័រសម្រាប់ឆ្នាំសិក្សា ២០២៥ ពោលគឺតិចជាងឆ្នាំមុនប្រមាណ ២ ២២៩ នាក់។ នេះបើតាមការចុះផ្សាយរបស់កាសែត Chosun Biz ។

កាលពីមុនមកនៅកូរ៉េខាងត្បូង មុខវិជ្ជាវិទ្យាសាស្ត្រកុំព្យូទ័រ បានទាក់ទាញសិស្សកំពូលៗឱ្យចូលរៀន ដោយជួនកាលច្រើនជាងសិស្សចូលរៀនមុខវិជ្ជាវេជ្ជសាស្រ្តទៀតផង។ ជាប្រពៃណី សិស្សនៅកូរ៉េខាងត្បូងនិយមចង់ចូលសាលាពេទ្យ ព្រោះអាជីពជាវេជ្ជបណ្ឌិតត្រូវបានគេមើលឃើញថាទទួលបានប្រាក់ខែច្រើន និងស្ថិរភាព នេះបើយោងតាមទស្សនាវដ្ដី Times Higher Education ។

ក្នុងឆ្នាំ ២០២៤ សិស្សកំពូលៗបានជ្រើសរើសការប្រឡងចូលមហាវិទ្យាល័យ សម្រាប់មុខវិជ្ជាវិទ្យាសាស្ត្រកុំព្យូទ័រនៅសាកលវិទ្យាល័យជាតិសេអ៊ូល ជាជាងសាលាពេទ្យ។ យ៉ាងណាមិញ ការរីកចម្រើនយ៉ាងរហ័សនៃ AI បច្ចុប្បន្ន កំពុងជះឥទ្ធិពលលើការសម្រេចចិត្តចូលរៀនមុខវិជ្ជានេះ រួមទាំងវិស្វករកម្មបច្ចេកវិទ្យាព័ត៌មាន (IT)។

កាលពីពេលថ្មីនេះ នាយកប្រតិបត្តិនៃក្រុមហ៊ុនបញ្ញាសិប្បនិម្មិត Anthropic លោក Dario Amodei បានព្យាករថា AI អាចនឹងរួមចំណែក ៩០ ភាគរយ លើការសរសេរកូដ ក្នុងរយៈពេល ៦ ខែខាងមុខ និងស្ទើរតែទាំងស្រុងក្នុងរយៈពេល ១ ឆ្នាំ។

ការស្ទង់មតិខ្លះបានបង្ហាញផងដែរថា ក្រុមហ៊ុនផ្សេងៗកាត់បន្ថយការជ្រើសរើសបុគ្គលិកផ្នែក AI ខណៈងាកទៅប្រើប្រាស់ AI ជំនួសវិញ។ យ៉ាងណាមិញ អ្នកជំនាញមើលឃើញថា អ្នកឯកទេសក្នុងការគ្រប់គ្រង និងបង្កើនប្រសិទ្ធភាព AI នឹងនៅតែមានតម្រូវការ៕