ពលរដ្ឋកម្ពុជាជាង ៥ លាននាក់ ជំពាក់បំណុលធនាគារជិត $៦០ ពាន់លាន

គិតត្រឹមដំណាច់ឆ្នាំ ២០២៤ ប្រជាពលរដ្ឋកម្ពុជាចំនួន ៥,០៤ លាននាក់ កំពុងប្រើប្រាស់កម្ចីពី​ប្រព័ន្ធ​ធនាគារ ដែលមានទំហំ​ទឹក​ប្រាក់ ២៣៦ ៤២៩ ២៦៦ លានរៀល ស្មើនឹងប្រមាណ ៥៩ ពាន់លានដុល្លារ។ នេះបើយោងតាមរបាយការណ៍ស្ថានភាពឥណទាន​នៅកម្ពុជារបស់ក្រុម​ហ៊ុន ក្រេឌីត ប្យួរ៉ូ ខេមបូឌា (CBC)។

CBC បង្ហាញថា ក្នុងចំណោមសមតុល្យឥណទានដែលមាន ៥៩ ពាន់លានដុល្លារ ក្នុងឆ្នាំ ២០២៤ គឺមានឥណទានប្រមាណ ៦០ ភាគរយ ត្រូវបានគ្រឹះស្ថានធនាគារ និងហិរញ្ញវត្ថុ ផ្ដល់ទៅឱ្យប្រជាជននៅរាជធានីខេត្តចំនួន ៣ គឺរាជធានីភ្នំពេញាមានអ្នកខ្ចីច្រើនជាងគេរហូតដល់ ១១៩ ០២១ ៩៤៧ លានរៀល ប្រមាណ ២៩,៧ ពាន់លានដុល្លារ និងស្មើនឹង ៥០% នៃទំហំឥណទានទូទាំងប្រទេសដោយមានអ្នកខ្ចីសរុបចំនួន ៦៩,៦ ម៉ឺនាក់។

ចំណែកឯ ខេត្តកណ្ដាល មានអ្នកខ្ចីប្រាក់ពីប្រព័ន្ធធនាគារ និងហិរញ្ញវត្ថុចំនួន ៣៩,៤ ម៉ឺននាក់ ដែលមានទំហំឥណទាន ១២ ៦៩៧ ៦៤៩ ប្រមាណ ៣,១៨ ពាន់លានដុល្លារ ស្មើនឹង ៥% នៃសមតុល្យឥណទានទូទាំងប្រទេស។

ដោយឡែក ខេត្តសៀមរាប មានទំហំឥណទានលំដាប់ទី៣ ប្រមាណ ១០ ៣០៧ ៣៥៨ លានរៀល ប្រមាណ ២,៥៧ ពាន់លានដុល្លារ ស្មើនឹង ៤% និងមានអ្នកខ្ចី ៣២,៤ ម៉ឺននាក់។

យោងតាម CBC គិតត្រឹមដំណាច់ឆ្នាំ ២០២៤ អត្រានៃការសងត្រឡប់យឺតលើសពី ៩០ ថ្ងៃ មានចំនួន ៦,០៣ ភាគរយ។

លោក តូច ចៅចេក សមាជិកក្រុមប្រឹក្សាភិបាលនៃសមាគមធនាគារនៅកម្ពុជា និងជាប្រធាន​នា​យក​ប្រតិបត្តិធនាគារ ប្រៃសណីយ៍កម្ពុជា មានប្រសាសន៍ថា នៅដំណាច់ឆ្នាំ ២០២៤ ឥណទានមិន​ដំណើរ​ការធ្លាក់ចុះបន្តិច ហើយទំនងវិស័យនេះ នឹងមានភាពល្អប្រសើរចាប់ពីឆ្នាំ ២០២៥ នេះ។

បើតាមលោក តូច ចៅចេក វិស័យធនាគារនៅក្នុងឆ្នាំ ២០២៤ ជាពិសេសប្រាក់សន្សំធនា​គាររីកចម្រើនច្រើន បើតាមរបាយ​ការណ៍របស់ធនាគារជាតិ កាលពីពាក់កណ្ដាលឆ្នាំ ២០២៤ រីកចម្រើនរហូតដល់ ១៣% ហើយសម្រាប់ឥណទាន គឺរីកចម្រើនជាង ២%។

លោក តូច ចៅចេក បានប្រាប់ថា ប្រាក់កម្ចី និងបញ្ញើ មិនមានហានិភ័យក្នុងវិស័យធនាគារ​នោះទេ ពោលគឺជាសញ្ញាវិជ្ជមានសម្រាប់វិស័យធនាគារទាំងមូល ខណៈ​សមតុល្យប្រាក់​សន្សំ​ទើបតែបាន ៥២ ពាន់លានដុល្លារ រីឯសមតុល្យប្រាក់កម្ចីចំនួន ៥៩ ពាន់លានដុល្លារ។

លោកស្រី ជា សិរី ទេសាភិបាលធនាគារជាតិនៃកម្ពុជា​ បានលើកឡើងថា ប្រព័ន្ធធនាគារនៅកម្ពុជា បន្តរក្សាវឌ្ឍនភាព និងមានស្ថិរភាព ដែលបានរួមចំណែកគាំទ្រការងើបឡើងនៃសេដ្ឋកិច្ច។

លោកស្រីថា ទ្រព្យសកម្មរបស់ប្រព័ន្ធធនាគារមានកំណើន ៧% រហូតដល់ ៩១,១ ពាន់លានដុល្លារ ខណៈឥណទានបន្តមានកំណើនទាប ៣% ប្រមាណ ៥៩,៩ ពាន់លានដុល្លារ ក្នុងពេលដែលប្រាក់បញ្ញើបានកើនឡើង ១៦,៣% ប្រមាណ ៥៧ ពាន់លានដុល្លារ៕

អត្ថបទ៖ ឡេង ដេត