យុទ្ធនាការ «រដូវកាលបៃតង» កម្ពុជាផ្ដើមទាក់ទាញភ្ញៀវ​ទេសចរពីតំបន់មជ្ឈិមបូព៌ា

ក្រសួងទេសចរណ៍កាលពីពេលថ្មីៗនេះ បានប្រកាសដាក់ចេញនូវយុទ្ធនាការ «រដូវកាលបៃតង» (Green Season) ជំនួសឱ្យពាក្យរដូវខ្សត់ភ្ញៀវ (Low Season) ដែលពង្រាយ​របាយ​ភ្ញៀវ​ទេសចរឱ្យបានគ្រប់ខែទោះ​បី​នៅ​​ក្នុងរដូវ​ភ្ញៀវតិច។

លោក ហួត ហាក់ រដ្ឋមន្ត្រីក្រសួងទេសចរណ៍ មានប្រសាសន៍នៅថ្ងៃទី ១៩ ខែមីនា ឆ្នាំ ២០២៥ ថា រដូវកាលបៃតងនេះ ក្រសួងទេសចរណ៍មានមូលដ្ឋានច្បាស់លាស់ ដែលដាក់ចេញចាប់​ពីខែ​មេ​សា​រហូតដល់ខែតុលា ដែលជារដូវភ្លៀងធ្លាក់។

បើតាមលោក ហួត ហាក់ ដើម្បីឱ្យរដូវកាលបៃតងជំនួសឱ្យរដូវខ្សត់ភ្ញៀវ គឺរដ្ឋាភិបាលបានបើកយុទ្ធនាការ «Muslim Friendly» ដើម្បីទាក់ទាញភ្ញៀវទេសចរអន្តរជាតិ ដែលជាជនជាតិមូស្លីម​ពីបណ្ដា​ប្រទេសមូស្លីមមកកម្ពុជា។

លោក ហួត ហាក់ បញ្ជាក់ថា៖ «បងប្អូនទេសចរមូស្លីមដែលអញ្ជើញមកពីតំបន់មជ្ឈិមបូព៌ា ពីព្រោះនៅតំបន់មជ្ឈិមបូព៌ា តាមស្ថានភាពភូមសាស្ត្រ ជាតំបន់ដែលមានអាកាសធាតុក្ដៅ ខ្សត់ភ្លៀង អញ្ចឹងទេ នៅទីនោះបរិបូណ៌ដោយវាលខ្សាច់ ដើមឈើរុក្ខជាតិ មិនសូវ​លូត​លាស់​ដោយ​សារទឹកមានកម្រិត ហើយមួយទៀត បងប្អូនមូស្លីមនៅតាមបណ្ដាប្រទេសទាំងនោះ គាត់​ចូល​ចិត្ត​ធ្វើ​ដំណើរ​នៅរដូវកាលភ្លៀង ដោយសារទី១ គាត់យល់ថា ត្រជាក់ ទី២គាត់យល់ថា ជារដូវកាល​មួយដែល មានទេសភាពស្រស់បំព្រងគ្រប់ទីកន្លែង កន្លែងណាមើលទៅក៏ឃើញពណ៌បៃតង ទាំងដើមឈើ រុក្ខជាតិ ហើយ​ជា​ពិសេសគាត់ចាត់ទុកថា ដំណក់ទឹកភ្លៀងសម្រាប់ គឺជាពរជ័យមួយសម្រាប់ពួកគាត់»។

បើតាមលោករដ្ឋមន្ត្រី ហួត ហាក់ យុទ្ធនាការ Muslim Friendly ក្រសួងទេសចរណ៍​បានផ្សព្វផ្សាយចេញ​ជាវីដេអូខ្លីប ដើម្បីបង្ហាញសក្ដានុពលទេសចរកម្ពុជា​ ដើម្បីបង្ហាញពីអ្វីដែល​កម្ពុជាបានធ្វើសម្រាប់ត្រៀមទទួលទេសចរណ៍មូស្លីម។

លោក ហួត ហាក់ បន្ថែថា៖ «យើងមានតាំងពីភោជនីយដ្ឋានអាហារហាឡាល់ តាមបណ្ដាសណ្ឋាគារ យើងក៏បានធ្វើការជាមួយវិស័យឯកជនឱ្យមានរៀបចំជាបន្ទប់ដែលបានដាក់សញ្ញាសម្រាប់បងប្អូនមូស្លីម គាត់ថ្វាយបង្គំ និងមានផលិតផលជាច្រើនទៀតសម្រាប់បម្រើឱ្យយុទ្ធនាការនេះ»។

ក្រ​សួងទេចរណ៍បានធ្វើការព្យាករណ៍ថា កម្ពុជារំពឹងស្វាគមន៍ភ្ញៀវ​ទេចរអន្តជាតិ ​៧,៥ លាននាក់​នៅឆ្នាំ២០២៥ ដែលនឹងបង្កើតចំណូល​ចូល​សេដ្ឋកិច្ច​​ជាង៥ពាន់លានដុល្លារ​។

យោងតាមក្រសួងទេសចរណ៍នៅក្នុងឆ្នាំ ២០២៤ កម្ពុជាទទួលបាន​ទេស​ចរណ៍​​​អន្តរជាតិជាង ៦,៧ លាននាក់ កើនឡើង ២៣% ធៀបនឹងឆ្នាំ ២០២៣ ក្នុងនោះ​ទទួល​បាន​ចំណូលសរុបជាង ៣,៦៣ ពាន់លានដុល្លារ កើនជាង ១៧%។

ក្នុងចំណោមភ្ញៀវទេសចរជាង ៦,៧ លាន​នាក់ ទេសចរណ៍ថៃឈរនៅ​លំដាប់​លេខរៀងទី ១ មាន​ចំនួន ២,១៤ លាននាក់ កើនជិត ១៨% វៀតណាមចំនួន ១,៣៤ លាននាក់ កើន ៣១,៥% ចិនជាង ៨៤ ម៉ឺននាក់ កើន ៥៥% ភ្ញៀវទេស​ចរឡាវចំនួនជាង ៣៣ ម៉ឺននាក់ ធ្លាក់ចុះ ១០% និងភ្ញៀវទេសចរអាមេរិកជាង ២១ ម៉ឺននាក់ កើនឡើង ១៦%៕

អត្ថបទ៖ ឡេង ដេត