ព័ត៌មានអន្ដរជាតិ

ពលរដ្ឋថៃ ១ ០០០ នាក់ ធ្វើបាតុកម្មប្រឆាំងការនាំចូលសាច់ជ្រូកពីអាមេរិក

បានផុស

២ ខែ មុន

នៅ

ថ្ងៃព្រហស្បតិ៍ ១០ មេសា ២០២៥

ដោយ

កសិករចិញ្ចឹមជ្រូកថៃជាង ១ ០០០ នាក់ បានប្រមូលផ្តុំគ្នានៅមុខក្រសួងហិរញ្ញវត្ថុក្នុងទីក្រុងបាងកក នាថ្ងៃព្រហស្បតិ៍នេះ ដោយអំពាវនាវឱ្យមានការការពារឧស្សាហកម្មសាច់ជ្រូកក្នុងស្រុក ប្រឆាំងនឹងការនាំចូលសាច់ជ្រូក និងគ្រឿងក្នុងជ្រូកពីសហរដ្ឋអាមេរិក។ នេះបើតាមការចុះរបស់កាសែត The Nation។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បាតុកម្មតវ៉ានេះ បានធ្វើឡើងក្រោយគណៈរដ្ឋមន្ត្រីថៃអនុម័តលើការនាំចូលសាច់ជ្រូកពីសហរដ្ឋអាមេរិក ដើម្បីជាផ្នែកមួយនៃកិច្ចខិតខំប្រឹងប្រែងបន្ធូរបន្ថយផលប៉ះពាល់នៃពន្ធគយបដិការ ៣៦ ភាគរយ លើទំនិញថៃនាំចេញទៅសហរដ្ឋអាមេរិករបស់ប្រធានាធិបតី ដូណាល់ ត្រាំ។

កាលពីថ្ងៃអង្គារ សមាគមអ្នកចិញ្ចឹមជ្រូកថៃ (SRAT) និងបណ្តាញកសិករពាក់ព័ន្ធ បានដាក់ការជំទាស់ជាផ្លូវការនៅឯវិមានរដ្ឋាភិបាល។

ប្រធាន SRAT លោក Sitthiphan Thanakiatpinyo បានថ្លែងថា ការចិញ្ចឹមជ្រូក គឺជាផ្នែកសំខាន់មួយនៃកសិកម្មថៃតាំងពីយូរយារណាស់មកហើយ ដោយវាផ្តល់ប្រាក់ចំណូលដល់គ្រួសារកសិករនៅគ្រប់ជំនាន់។

លោកបានបន្តថា៖ «ទោះបីជាមានបញ្ហាប្រឈមជាច្រើនក៏ដោយ កសិករ និងភ្នាក់ងាររដ្ឋាភិបាលពាក់ព័ន្ធនៅតែប្តេជ្ញាចិត្តក្នុងការកែលម្អ និងអភិវឌ្ឍវិស័យនេះ ដើម្បីផលិតសាច់ជ្រូកស្អាត និងសុវត្ថិភាពសម្រាប់អ្នកប្រើប្រាស់ថៃ»។

លោក Sitthiphan បានព្រមានថា ការនាំចូលសាច់ជ្រូក និងគ្រឿងក្នុងពីសហរដ្ឋអាមេរិក នឹងប៉ះពាល់យ៉ាងធ្ងន់ធ្ងរដល់កសិករក្នុងស្រុក និងឧស្សាហកម្មពាក់ព័ន្ធ។ លោកអំពាវនាវឱ្យរដ្ឋមន្ត្រីក្រសួងហិរញ្ញវត្ថុការពារការចិញ្ចឹមជ្រូកជាមធ្យោបាយរក្សាសន្តិសុខស្បៀងជាតិ។

យ៉ាងណាមិញ លោកបានសម្តែងការគាំទ្រចំពោះផែនការរបស់រដ្ឋាភិបាល ក្នុងការនាំចូលពីសហរដ្ឋអាមេរិក នូវគ្រឿងផ្សំចំណីសត្វសំខាន់ៗដែលកំពុងមានការខ្វះខាតដូចជាពោត និងសណ្ដែកជាដើម។ លោកបានអះអាងថា គោលនយោបាយនេះ នឹងបង្កើតពាណិជ្ជកម្មដែលមានតម្លៃ ៨៤ ប៊ីលានបាត ជារៀងរាល់ឆ្នាំសម្រាប់សហរដ្ឋអាមេរិក ខណៈមិនបង្កគ្រោះថ្នាក់ដល់កសិករដំណាំថៃ។

លោកបានបន្ថែមថា៖ «ការផលិតសាច់ជ្រូកនាពេលបច្ចុប្បន្នរបស់ថៃ ត្រូវគ្នានឹងកម្រិតនៃការប្រើប្រាស់ក្នុងស្រុក។ ការអនុញ្ញាតឱ្យសាច់ជ្រូករបស់អាមេរិកចូលទៅក្នុងទីផ្សារ នឹងបង្កើតការផ្គត់ផ្គង់លើសតម្រូវការ ដែលរំខានដល់ខ្សែសង្វាក់ផ្គត់ផ្គង់ទាំងមូល»៕