ព័ត៌មានជាតិ

រោងម៉ាស៊ីនកិនស្រូវធំមួយក្នុងស្រុកថ្មគោល សម្រេចការនាំចេញអង្ករជាង ៣ ម៉ឺនតោន ទៅទីផ្សារអន្តរជាតិ

បានផុស

១ year មុន

នៅ

ថ្ងៃសុក្រ ១៨ មេសា ២០២៥

ដោយ

ម្ចាស់រោងម៉ាស៊ីនកិនស្រូវ ស៊ីធីរ៉ាយស៍ អ៉ីមផត អិចផត ខូ អិលធីឌី (City Rice Import Export Co., Ltd) លោកឧកញ៉ា ឡាយ ឈុនហួបានឱ្យដឹងថា រយៈពេល ៣ ខែ ដើមឆ្នាំ២០២៥ រោងម៉ាស៊ីនរបស់លោកសម្រេចការនាំចេញអង្ករទៅទីផ្សារអន្តរជាតិជាង ៣ ម៉ឺនតោន គិតជាទឹកប្រាក់ប្រមាណ ២០លានដុល្លារអាមេរិក។

ថ្លែងមកកាន់ «កម្ពុជាថ្មី» នៅថ្ងៃទី១៨ ខែមេសា ឆ្នាំ២០២៥ នេះ លោក ឧកញ៉ា ឡាយ បានមានប្រសាសន៍ថា ក្នុងរយៈពេល ៣ខែដំបូងនៃដើមឆ្នាំ២០២៥ នេះ រោងម៉ាស៊ីនកិនស្រូវរបស់លោក សម្រេចការនាំចេញអង្ករទៅកាន់ទីផ្សារអន្តរជាតិប្រមាណ ៣ ម៉ឺនតោន ដែលមានការកើនឡើងប្រមាណជិត ៣០% បើប្រៀបធៀបទៅនិងរយៈពេលដូចគ្នាកាលពីឆ្នាំ មុន។

សរុបទាំង ៣ ម៉ឺនតោន ក្នុងនោះរោងម៉ាស៊ីនបាននាំចេញទៅលើប្រភេទអង្ករមួយចំនួនដូចជា អង្ករផ្ការំដួល, សែនក្រអូប, អង្ករស្រង៉ែ និងប្រភេទអង្ករ ៥៤ ៥១ ជាដើមទៅកាន់ទីផ្សារ។

ជាមួយគ្នានេះ លោកឧកញ៉ា ក៏បានបញ្ជាក់ផងដែរថា កត្តាដែលធ្វើការឱ្យការនាំចេញអង្ករទៅកាន់ទីផ្សារអន្តរជាតិមានការកើនឡើងខ្ពស់ជាងឆ្នាំមុន ដោយសារតែឆ្នាំនេះការប្រមូលផលបានច្រើនជាងឆ្នាំមុន ហើយតម្លៃរបស់ប្រទេសជិតខាងធ្លាក់ចុះខ្លាំង ដូច្នេះនៅពេលដែលអង្ករត្រឡប់ទៅមានតម្លៃដើមវិញដូចក្នុងរយៈពេល ២ ឆ្នាំមុន ធ្វើឱ្យការជួញដូរមានដំណើរការជាធម្មតាវិញ។

គួរជម្រាបថា រយៈពេល ៨ ខែ ឆមាសទី១ ឆ្នាំ២០២៤ ក្រុមហ៊ុន «City Rice Import Export» បាននាំចេញអង្ករប្រមាណជិត ៥ ម៉ឺនតោន ទៅកាន់ទីផ្សារអន្តរជាតិដូចជា ប្រទេសនៅសហភាពអឺរ៉ុប ប្រទេសចិន ម៉ាឡេស៊ី សិង្ហបុរី ឥណ្ឌូណេស៊ី អូស្ត្រាលី ណូវេហ្សេឡង់ ចក្រភពអង់គ្លេស បណ្ដាប្រទេសក្នុងទ្វីបអាហ្វ្រិក និងកោះ New Caledonia ដែលគិតជាទឹកប្រាក់សរុបចំនួន ៣៣ លានដុល្លារអាមេរិក ខណៈបរិមាណនាំចេញមានការកើនឡើងប្រមាណ ១៦% បើប្រៀបធៀបទៅរយៈពេលដូចគ្នាកាលពីឆ្នាំ២០២៣៕