ទិន្នផលអំបិលកំពត ឆ្នាំនេះ ទទួលបានផលតិច ខណៈមានភ្លៀងធ្លាក់ច្រើន

ប្រធានសមាគមអ្នកផលិតអំបិលកម្ពុជា បានឱ្យដឹងថា ទិន្នផលអំបិលខេត្តកំពត សម្រាប់ឆ្នាំនេះ ទទួលផលបានតិចតួច ខណៈមានភ្លៀងធ្លាក់ច្រើន ទើបធ្វើឱ្យការប្រមូលផលបានតិច។

ថ្លែងប្រាប់ កម្ពុជាថ្មី នៅព្រឹកថ្ងៃទី២៥ ខែមេសានេះ លោក ប៊ុន ណារិន ប្រធានសមាគមអ្នកផលិតអំបិលកម្ពុជា​ បានឱ្យដឹងថា សម្រាប់ឆ្នាំ២០២៥នេះ ផលិតកម្មអំបិលខេត្តកំពត-កែប ទទួលបានផលតិចតួចបំផុត ខណៈមានភ្លៀងធ្លាក់ច្រើន ទើបធ្វើការប្រមូលផលអំបិលរបស់កសិករបានតិចខុសឆ្នាំកន្លងទៅដែលទទួលបានទិន្នផលសរុបជាង ១២ម៉ឺនតោន។

ទាក់ទងនឹងការប្រមូលផលបានតិច លោក ប៊ុន ណារិន បានប្រាប់ឱ្យដឹងដែរថា មូលហេតុដែលអំបិលឆ្នាំនេះ ទទួលបានផលតិច នេះក៏ដោយសារតែមានភ្លៀងធ្លាក់ចាប់ពីចុងខែមីនា រហូតមកដល់ខែមេសានេះ ក្នុងកម្រិតខ្លាំងបំផុត ទើបនាំឱ្យកសិករជាអ្នកផលិតអំបិលទាំងអស់មិនអាចប្រមូលផលច្រើន។

លោក ប៊ុន ណារិន បញ្ជាក់ថា គិតដល់ថ្ងៃទី២០ខែមេសានេះ ផលិតកម្មអំបិលដែលប្រមូលបានគឺមានត្រឹមតែ ១ម៉ឺន ៨ម៉ឺនតោន តែប៉ុណ្ណោះ។ ចំណែកតម្លៃវិញ អំបិល អាចលក់ចេញទៅកាន់ទីផ្សារបានប្រមាណ ៨ពាន់រៀល ក្នុងមួយបាវ ៥០គីឡូ។

គួរជម្រាបថា ខេត្តកំពតមានផ្ទៃដីស្រែអំបិលសរុបចំនួន ៣៤៨៩ ហិកតា ក្នុងនោះផ្ទៃដីប្រមូលផល ២៦៤០ ហិកតា និងទទួលបានទិន្នផលសរុបចំនួន ១២៨ ៤៧៥ ហិកតានៅឆ្នាំ ២០២៤។ នេះបើយោងតាមរបាយការណ៍របស់រដ្ឋបាលខេត្តកំពត៕

អត្ថបទ ៖ សួស សិត