ព័ត៌មានជាតិ

សហគមន៍កសិកម្មទំនើបស្វាយចន្ទីខេត្តកំពង់ធំ ទទួលបានទុនបំពេញបន្ថែមជាង ១ លានដុល្លារ បង្កើនសមត្ថភាពផលិតរបស់ខ្លួន

បានផុស

២៧ វិនាទី មុន

នៅ

ថ្ងៃសុក្រ ២ ឧសភា ២០២៥

ដោយ

នៅថ្ងៃទី០១ ខែឧសភា ឆ្នាំ២០២៥ នេះ សហគមន៍កសិកម្មទំនើបស្វាយចន្ទីនៅខេត្តកំពង់ធំ បានចុះកិច្ចព្រមព្រៀងទទួលហិរញ្ញប្បទានឥតសំណងចំនួន ១,១២លានដុល្លារ ពីគម្រោងពិពិធកម្មកសិកម្មកម្ពុជា ដើម្បីធ្វើផលិតកម្មកសិកម្មរបស់ខ្លួនប្រកបដោយប្រសិទ្ធភាព ក្រោមអធិបតីភាពលោករដ្ឋមន្ត្រី ឌិត ទីណា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ឃឹម ហ្វីណង់ អ្នកនាំពាក្យក្រសួងកសិកម្ម បានឱ្យដឹងថា ការចុះកិច្ចសន្យាលើកនេះគឺជាជំនួយឥតសំណងពីគម្រោងពិពិធកម្មកសិកម្មកម្ពុជា ដែលជាផ្នែកមួយនៃកម្មវិធីដែលគាំទ្រថវិកាហិរញ្ញប្បទានដោយធនាគារពិភពលោកសម្រាប់ជាទុនបំពេញបន្ថែម ៤០% លើការវិនិយោគរបស់សហគមន៍ជាឃ្លាំងស្តុកគ្រាប់ស្វាយចន្ទី ទីលានហាលសម្ងួត គ្រឿងម៉ាស៊ីន និងឧបករណ៍សម្ភារៈផលិតកម្មនានា រួមទាំងការកសាងផ្លូវលំជនបទប្រវែង ១០គីឡូម៉ែត្រ ដែលនឹងអនុញ្ញាតឱ្យសហគមន៍អាចបង្កើនសមត្ថភាពកែច្នៃគ្រាប់ស្វាយចន្ទី និងតភ្ជាប់ទៅកាន់ទីផ្សាររឹតតែមានប្រសិទ្ធភាពជាងមុន។

លោកបានលើកឡើងថា ពីមុនមកសហគមន៍ប្រាសាទសម្បូររុងរឿងមិនមានឃ្លាំង មិនមានទីលានហាលសម្ងួត វាជាហេតុធ្វើឱ្យប្រជាសហគមន៍មិនអាចលក់ស្ងួតបានទេ ដែលត្រូវបង្ខំចិត្តលក់សើម។ បច្ចុប្បន្ន ក្រោយពីមានការជួយវិនិយោគទៅលើទីលានហាលសម្ងួត និងឃ្លាំង សហគមន៍មានលទ្ធភាពហាល ហើយអាចស្តុកទុកលក់ក្នុងតម្លៃល្អនៅពេលគ្រាប់ស្ងួត។

«ក្នុងនោះប្រសិនជាគ្រាប់ស្ងួត ហើយពិបាកនៅក្នុងការដឹកជញ្ជូនទៅកាន់ទីផ្សារទៀតនោះ គឺគម្រោងបានធ្វើការវិនិយោគទៅលើផ្លូវថ្នល់ដើម្បីតភ្ជាប់ ពីចម្ការទៅកាន់ទីផ្សារតែម្តង ដែលទាំងអស់នេះហើយ សុទ្ធសឹងតែជាការគិតគូរយ៉ាងម៉ត់ចត់បំផុតពីសំណាក់រាជរដ្ឋាភិបាល ពីសំណាក់ក្រសួងកសិកម្មដើម្បីធានាបានថា យើងធ្វើផលិតកម្មគឺមានការប្រកួតប្រជែងខ្ពស់មិនថាទៅលើថ្លៃដើម គុណភាព និងបរិមាណ»។ លោក ឃឹម ហ្វីណង់ បន្ថែមបែបនេះ។

តាមរយៈកិច្ចសន្យានេះ លោកសង្ឃឹមថា អ្នកដែលទទួលបានផលពីជំនួយឥតសំណងនេះនិងមិនមែនត្រឹមតែសមាជិកប្រាសាទសម្បូររុងរឿងនៃសហគមន៍ស្វាយចន្ទីប៉ុណ្ណោះទេ ប៉ុន្តែគឺសមាជិកនៅក្នុងសហគមន៍ផ្ទាល់តែម្តង៕