មុខរបរលក់ស្រាពាងមានការធ្លាក់ចុះ ខណៈអ្នកលក់កាន់តែច្រើន

អាជីវករដែលជាអ្នកលក់ស្រាពាងដែលជាផលិតផលរបស់បងប្អូនជនជាតិដើមភាគតិច ស្ថិតនៅក្នុងបានលុង ខេត្តរតនគិរី បានឱ្យដឹងថា បច្ចុប្បន្នអាជីកម្មលក់ស្រាពាង ហាក់រៀងស្ងាត់ភ្ញៀវខ្លាំង ខណៈសម្បូរអ្នកលក់ក៏ច្រើនជាងមុន។

លោក លី រតនៈ អាយុ២៥ឆ្នាំ ជាម្ចាស់អាជីកម្ម ស្រាពាងណាងចាន់ រតនគិរី បានប្រាប់ កម្ពុជាថ្មី ថា មុខរបរលក់ស្រាពាងនេះ គ្រួសាររបស់លោកបានចាប់ផ្ដើមធ្វើវាឡើងមកប្រហែលជាង២០មកហើយ។ លោក បន្តថា សម្រាប់ពេលបច្ចុប្បន្ន របរលក់ស្រាពាងនេះ ហាក់រៀងស្ងាត់ភ្ញៀវខ្លាំង ខណៈស្រាពាងឥឡូវក៏មានអ្នកលក់ច្រើនបើធៀបនឹងជាង១០ឆ្នាំមុន។

លោក លី រតនៈ បានឱ្យដឹងទៀតថា ស្រាពាង អាចលក់ដាច់ទៅបាន នៅពេលណាដែលមានបុណ្យទានម្ដងៗ​ ដូ​ចជា៖ បុណ្យចូលឆ្នាំខ្មែរ បុណ្យភ្ជុំបិណ្ឌ និងបុណ្យចូលឆ្នាំសកល ក៏ព្រោះតែថ្ងៃទាំងអស់នេះសម្បូរទៅដោយភ្ញៀវទេសចរដើរកម្សាន្តតាមតំបន់នានាក្នុងខេត្តរតនគិរីច្រើនជាងថ្ងៃធម្មតា។

ម្ចាស់អាជីវកម្មស្រាពាងរូបនេះ បានបញ្ជាក់ដែរថា ចំពោះថ្ងៃធម្មតា ស្រាពាងះអាចលក់បានក្នុងចំនួនតិចបំផុត ពោលគឺត្រឹមតែ៤ពាង ទៅ៥ពាង តែប៉ុណ្ណោះ។ ក្រៅពីលក់ស្រាពាងនៅផ្ទះ រតនៈ និងក្រុមគ្រួសារ ក៏បានដាក់លក់ប្រភេទស្រាពាងនេះ តាមរយៈអនឡាញ ពិសេសនៅពេលណាដែលអតិថិជន ឬភ្ញៀវចង់ភ្លក្សរសជាតិ ពួកគាត់ក៏អាចកម្មុងតាមហ្វេសប៊ុកផេក ឬលេខទូរសព្ទរបស់លោកបាន។

គួរឱ្យដឹងថា បច្ចុប្បន្នស្រាពាង ត្រូវបានដាក់លក់ជាហូរហែលនៅតាមតំបន់រមណីយដ្ឋានផ្សេងៗក្នុងខេត្តរតនគិរី ក្នុងនោះមានដូចជា៖ បឹងយក្សឡោម បឹងកន្សែង និងតំបន់ទេសចរណ៍ខ្លះទៀត ដែលស្ថិតនៅក្នុងខេត្តរតនគិរី ផងដែរ៕

អត្ថបទ ៖​ សួស សិត