សេដ្ឋកិច្ច

ការសងត្រឡប់យឺតលើសពី ៣០ ថ្ងៃ របស់អាជីវកម្មខ្នាតតូច កើនឡើងខ្ពស់

បានផុស

១ year មុន

នៅ

ថ្ងៃព្រហស្បតិ៍ ៨ ឧសភា ២០២៥

ដោយ

យោងតាមរបាយការណ៍របស់ក្រុមហ៊ុនក្រេឌីត ប្យួរ៉ូ ខេមបូឌា (CBC) បានបង្ហាញថា គិតត្រឹមរយៈពេល ៣ ខែត្រីមាសទី១ ឆ្នាំ២០២៥គុណភាពឥណទានរបស់អាជីវកម្មខ្នាតតូចមានការធ្លាក់ចុះ ជាមួយនឹងការកើនឡើងគណនីប្រាក់កម្ចី និងការសងត្រឡប់យឺតលើសពី ៣០ ថ្ងៃ(30+DPD) បានកើនឡើងរហូតដល់ជាង ៩%។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អឿ សុធារ័ត្ន ប្រធាននាយកប្រតិបត្តិនៃក្រុមហ៊ុន ក្រេឌីត ប្យួរ៉ូ ខេមបូឌា (CBC) បានបញ្ជាក់ថា ការស្នើសុំឥណទានបុគ្គល ប្រើប្រាស់សម្រាប់អាជីវកម្មខ្នាតតូច មានការកើនឡើង ៥,៧% ប៉ុន្តែការអនុម័តផ្ដល់ឥណទានបានធ្លាក់ចុះ ៤,៤% នៅក្នុងត្រីមាសទី១ ឆ្នាំ ២០២៥ ធៀបនឹងត្រីមាសទី ៤ ក្នុងឆ្នាំ ២០២៤។ កម្ចីអាជីវកម្មខ្នាតតូច មានទំហំទឹកប្រាក់ឥណទានសរុបជាង ១៣,១៦ លានដុល្លារនៅក្នុងត្រីមាសទី១ ឆ្នាំ២០២៥។

យោងតាមរបាយការណ៍ចេញផ្សាយនៅថ្ងៃទី០៧ ខែឧសភា ឆ្នាំ ២០២៥ បង្ហាញថា ពាក្យស្នើសុំឥណទាន សម្រាប់អាជីវកម្មខ្នាតតូច ដែលមានកម្ចីទុនបង្វិល កសិកម្ម សំណង់ កើនឡើង ៥,៧% នៃចំនួនពាក្យស្នើសុំ។ ដំណើរការឥណទានលក្ខណៈអាជីវកម្ម គិតត្រឹមត្រីមាសទី១ ឆ្នាំ ២០២៥ បានធ្លាក់ចុះ ០,៨%។

លោក តូច ចៅចេក សមាជិកក្រុមប្រឹក្សានៃសមាគមធនាគារនៅកម្ពុជា (ABC) បានលើកឡើងថា ស្ថិតក្នុងបរិបទនៃស្ថានភាពសេដ្ឋកិច្ចសកល និងក្នុងតំបន់ហាក់មានភាពមិនច្បាស់លាស់ វិស័យហិរញ្ញវត្ថុនៅកម្ពុជារងឥទ្ធិពលដែលនឹងប៉ះពាល់ដល់អត្រាកំណើនក្នុងវិស័យនេះទាបជាងការរំពឹងទុក។

លោក តូច ចៅចេក បានគូសបញ្ជាក់ថា វិស័យធនាគារមានការប្រយ័ត្នប្រយែងនៃការបញ្ចេញឥណទានចាប់តាំងពីក្រោយការគ្រប់គ្រងបាននៃការរីករាលដាលជំងឺកូវីដ១៩ ដោយសារតែអត្រាឥណទានមិនដំណើការកើនឡើង។

លោកថា៖ «ប៉ុន្តែមិនមែនន័យថាយើងមិនបញ្ចេញឥណទាននោះទេ យើងហាក់បញ្ចេញច្រើនដោយសារយើងត្រូវការប្រាក់ចំណូលដើម្បីទប់ទាល់នឹងចំណាយប្រតិបត្តិការ ប៉ុន្តែគ្រាន់តែយើងមានការកំណត់លក្ខខណ្ឌមួយចំនួនតឹងតែង និងប្រុងប្រយ័ត្នខ្ពស់ជាងមុន ប៉ុន្តែអតិថិជនអាចទទួលបានឥណទានច្រើនជាងមុន និងអត្រាការប្រាក់ល្អជាងមុនផងដែរ»។

យោងតាម CBC គិតត្រឹមដំណាច់ឆ្នាំ ២០២៤ ប្រជាពលរដ្ឋកម្ពុជាចំនួន ៥,០៤ លាននាក់ កំពុងប្រើប្រាស់កម្ចីពីប្រព័ន្ធធនាគារ ដែលមានទំហំទឹកប្រាក់ប្រមាណ ៥៩ ពាន់លានដុល្លារ។

CBC បង្ហាញថា ក្នុងចំណោមសមតុល្យឥណទានដែលមាន ៥៩ ពាន់លានដុល្លារ ក្នុងឆ្នាំ ២០២៤ គឺមានឥណទានប្រមាណ ៦០ ភាគរយ ត្រូវបានគ្រឹះស្ថានធនាគារ និងហិរញ្ញវត្ថុ ផ្ដល់ទៅឱ្យប្រជាជននៅរាជធានីខេត្តចំនួន ៣ គឺរាជធានីភ្នំពេញាមានអ្នកខ្ចីច្រើនជាងគេរហូតដល់ ១១៩ ០២១ ៩៤៧ លានរៀល ប្រមាណ ២៩,៧ ពាន់លានដុល្លារ និងស្មើនឹង ៥០% នៃទំហំឥណទានទូទាំងប្រទេសដោយមានអ្នកខ្ចីសរុបចំនួន ៦៩,៦ ម៉ឺនាក់។

លោកស្រី ជា សិរី ទេសាភិបាលធនាគារជាតិនៃកម្ពុជា បានលើកឡើងថា ប្រព័ន្ធធនាគារនៅកម្ពុជា បន្តរក្សាវឌ្ឍនភាព និងមានស្ថិរភាព ដែលបានរួមចំណែកគាំទ្រការងើបឡើងនៃសេដ្ឋកិច្ច។

លោកស្រីថា ទ្រព្យសកម្មរបស់ប្រព័ន្ធធនាគារមានកំណើន ៧% រហូតដល់ ៩១,១ ពាន់លានដុល្លារ ខណៈឥណទានបន្តមានកំណើនទាប ៣% ប្រមាណ ៥៩,៩ ពាន់លានដុល្លារ ក្នុងពេលដែលប្រាក់បញ្ញើបានកើនឡើង ១៦,៣% ប្រមាណ ៥៧ ពាន់លានដុល្លារ៕

អត្ថបទ៖ ឡេង ដេត