តម្លៃមាសអន្តរជាតិធ្លាក់ចុះ ​ក្រោមវឌ្ឍនភាពនៃការចរចាពន្ធអាមេរិក-ចិន

តម្លៃមាសអន្តរជាតិ​បាន​ធ្លាក់ចុះមកត្រឹមជាង ៣ ២៧០ ដុល្លារ/អោន សម្រាប់ថ្ងៃបើកការជួញដូរប្រចាំសប្ដាហ៍នេះ ក្រោយមន្រ្តីជាន់ខ្ពស់សហរដ្ឋអាមេរិក និងចិន​ អះអាងពីវឌ្ឍនភាពនៃការចរចាពន្ធនៅទីក្រុងហ្សឺណែវ ប្រទេសស្វីស កាលពីចុងសប្ដាហ៍កន្លងទៅ។

តម្លៃមាសជួញដូរដោយផ្ទាល់ បាន​ធ្លាក់ចុះ ១,៥៥ ភាគរយ ឬប្រមាណ ៥១,៦៤ ដុល្លារ ដោយជួញដូរនៅតម្លៃ ៣ ២៧៤,៦៦ ដុល្លារ/អោន គិតត្រឹមម៉ោង ២ និង ៤៨ នាទី នារសៀលថ្ងៃចន្ទ នៅទីក្រុងហុងកុង។

អ្នកជំនាញលើកឡើងថា កំណើននៃតម្លៃនេះបណ្ដាលមកពីសញ្ញានៃការបន្ធូរបន្ថយភាពតានតឹងនៃសង្រ្គាមពាណិជ្ជកម្ម ដែលធ្វើឱ្យ​ភាពទាក់ទាញនៃការវិនិយោគលើទ្រព្យសម្បត្តិសុវត្ថិភាពប្រភេទនេះ ថយចុះមកវិញ។

សហរដ្ឋអាមេរិក និងចិន បានបញ្ចប់កិច្ចចរចាពាណិជ្ជកម្ម​កម្រិតខ្ពស់កាលពីថ្ងៃអាទិត្យ ដោយមន្ត្រីអាមេរិកបានលើកឡើងពី «កិច្ចព្រមព្រៀងប្រកបដោយផលិតភាព» ដើម្បីកាត់បន្ថយឱនភាពពាណិជ្ជកម្មរបស់សហរដ្ឋអាមេរិក ខណៈ​មន្ត្រីចិន​លើកឡើងពី «ការឯកភាពគ្នា» ដែលជា «ដំណឹងល្អសម្រាប់ពិភព​លោក»។ ​

កន្លងមក សង្រ្គាមពាណិជ្ជកម្មពន្ធគយរវាងសហរដ្ឋអាមេរិក និងចិន​ បាន​បង្កភាពមិនប្រាដកប្រជាផ្នែកសេដ្ឋកិច្ច ដែលធ្វើឱ្យតម្លៃមាសហក់ឡើងបំបែកកំណត់ត្រាជាបន្តបន្ទាប់ រហូតដល់ ៣ ៥០០ ដុល្លារ/អោន នៅថ្ងៃទី ២២ មេសា។ ទោះបីជាថយចុះមកត្រឹមជាង ៣ ២៧០ ដុល្លារ/អោន ក្ដី វានៅតែខ្ពស់ ធៀប​នឹង​តម្លៃកាលពីដើមឆ្នាំ។

ជាជំនាញខ្លះបាន​ព្យាករថា តម្លៃមាសអាចថយចុះបន្ថែមទៀត ចំពេលដែលហានិភ័យនៃភូមិសាស្រ្តនយោបាយថយចុះ និងកំណើនឡើងវិញនៃប្រាក់ដុល្លារ៕