ក្រុមហ៊ុនអាមេរិកជាង ១ ០០០ ប្ដឹង លោក​ ត្រាំ ជុំវិញការដាក់ពន្ធរបស់លោក

ក្រុមហ៊ុននៅសហរដ្ឋអាមេរិក​ជាង ១ ០០០ កំពុងប្តឹងលោកប្រធានាធិបតី​​ ដូណាល់ ត្រាំ ជុំវិញពន្ធគយដែលលោកបាន​​ដាក់​លើការនាំចូល​កាលពីឆ្នាំ ២០២៥ កន្លងទៅ ក្រោមច្បាប់អំណាចគ្រាអាសន្នឆ្នាំ ១៩៧៧។ នេះបើតាមការចុះផ្សាយរបស់សារព័ត៌មាន​ Bloomberg កាលពីថ្ងៃព្រហស្បតិ៍។

សេចក្ដីរាយការណ៍ពីបញ្ហានេះ ធ្វើឡើងខណៈតុលាការកំពូល​អាមេរិកអាចនឹងសម្រេច​នៅថ្ងៃសុក្រថាតើពន្ធគយភាគច្រើនស្របច្បាប់ ឬអត់។ ប្រសិនបើមិនស្របច្បាប់ ការដាក់ពន្ធនោះនឹង​ត្រូវដកចេញ​ ហើយរដ្ឋាភិបាលអាមេរិកត្រូវសងប្រាក់ដែលបាន​ពីការប្រមូលពន្ធរាប់ពាន់លានដុល្លារ ទៅឱ្យអាជីវកម្មវិញ។ ​

ការប្ដឹងលោក ត្រាំ បាន​កើនឡើង ក្រោយ​​ចៅក្រមតុលាការកំពូលអាមេរិក​ បានសាក​សួរអំពីសិទ្ធិអំណាចរបស់លោក ​ត្រាំ ក្នុងការដាក់ពន្ធ ដែលរួមបញ្ចូលទាំងពន្ធគយបដិការ ​អំឡុងសវនាការកាលពីខែវិច្ឆិកា។ ប្រសិនបើតុលាការលុបចោលពន្ធគយ នោះក្រុមហ៊ុននានា​នៅតែ​អាចប្តឹងជាលក្ខណៈបុគ្គល ដើម្បី​ទារប្រាក់របស់ពួកគេមកវិញ។ រហូតមកដល់ពេលនេះ រដ្ឋាភិបាលអាមេរិក​បានប្រមូលបានប្រហែល ១៣៣ ​ប៊ីលានដុល្លារ ពីពន្ធគយ ដែលបាន​ដាក់ចេញថ្មីៗនៅឆ្នាំមុន។

ក្រុមហ៊ុន​ដែលប្ដឹងលោក ត្រាំ រួមមានក្រុមហ៊ុន​ម៉ាកល្បីៗដូចជា Costco, Goodyear, Reebok, Puma និង Dole ជាដើម​។ អាជីវកម្មភាគច្រើនមានមូលដ្ឋាននៅសហរដ្ឋអាមេរិក និងមកពីឧស្សាហកម្មដូចជាសម្លៀកបំពាក់ រថយន្ត និងផលិតកម្ម។ ក្រុមហ៊ុនមួយចំនួនរង់ចាំសិនមុនប្តឹង ព្រោះពួកគេខ្លាចប្រតិកម្មនយោបាយ។

លោក ត្រាំ បានព្រមានថា ​ប្រសិនបើតុលាការលុបចោលពន្ធ ហើយរដ្ឋាភិបាលត្រូវសងប្រាក់ត្រឡប់ទៅវិញ នឹងប៉ះពាល់ដល់សន្តិសុខជាតិ។ លោកបាននិយាយថា ប្រធានាធិបតីត្រូវតែមានសេរីភាពក្នុងការចរចាជាមួយប្រទេសផ្សេងៗដោយប្រើពន្ធគយ។ ​

ទោះបីជាយ៉ាងណាក៏ដោយ តុលាការកំពូលអាមេរិក មិនទាន់បានបញ្ជាក់ថាតើខ្លួននឹងសម្រេចលើសំណុំរឿងពន្ធគយនៅថ្ងៃសុក្រនេះ ឬអត់នោះទេ។