ព័ត៌មានអន្ដរជាតិ

តើថៃស្នើអ្វីខ្លះទៅសហរដ្ឋអាមេរិក ដើម្បីចរចាពន្ធគយបដិការ?

បានផុស

១២ ខែ មុន

នៅ

ថ្ងៃព្រហស្បតិ៍ ១៥ ឧសភា ២០២៥

ដោយ

ចំពេលការចរចារវាងសហរដ្ឋអាមេរិក និងបណ្ដាប្រទេសនៅអាស៊ីអាគ្នេយ៍ស្ថិតនៅក្នុងភាពស្រពិចស្រពិល នាយករដ្ឋមន្រ្តីថៃ លោកស្រី ផែថងថាន ស៊ីណាវ៉ាត្រ បានថ្លែងកាលពីថ្ងៃអង្គារថា ប្រទេសថៃបានដាក់ជូននូវសំណើមួយច្បាប់ទៅសហរដ្ឋអាមេរិក សម្រាប់ការចរចាពន្ធគយបដិការ ៣៦ ភាគរយ ដែលប្រធានាធិបតី ត្រាំ ដាក់លើទំនិញថៃ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាថ្មីម្ដងទៀតកាលពីថ្ងៃពុធ រដ្ឋមន្ត្រីក្រសួងហិរញ្ញវត្ថុថៃ លោក Pichai Chunhavajira បានឱ្យដឹងថា សំណើពាណិជ្ជកម្មដែលថៃបានដាក់ជូនទៅការិយាល័យការងារនៃតំណាងពាណិជ្ជកម្មរបស់សហរដ្ឋអាមេរិក (USTR) បង្ហាញពីឆន្ទៈរបស់ថៃក្នុងការនាំចូលផលិតផលថាមពល គីមីឥន្ធនៈ យន្តហោះ ផ្លែឈើ និងចំណីសត្វពីសហរដ្ឋអាមេរិក។

សំណើដដែល ត្រូវបានអនុម័តដោយក្រុមការងារគោលនយោបាយពាណិជ្ជកម្ម និងនាយករដ្ឋមន្ត្រីថៃ។ ការពិភាក្សាបានធ្វើឡើងជាមួយក្រុមចរចាអាមេរិកជាមុនរួចហើយ ដោយគ្របដណ្តប់លើចំណុច រួមមាន៖

១. សំណើភាពជាដៃគូ៖ ថៃបានស្នើកិច្ចសហការឆ្ពោះទៅរកការក្លាយជាដៃគូសេដ្ឋកិច្ចជាមួយសហរដ្ឋអាមេរិក ដោយផ្តោតលើឧស្សាហកម្មកែច្នៃ និងវិស័យបច្ចេកវិទ្យាឌីជីថល រួមទាំងមជ្ឈមណ្ឌលទិន្នន័យ និងឧស្សាហកម្មបញ្ញាសិប្បនិម្មិត (AI)។

២. ការបង្កើនការនាំចូលពីអាមេរិក៖ ថៃបានបង្ហាញពីឆន្ទៈក្នុងការបង្កើនការនាំចូលពីសហរដ្ឋអាមេរិកក្នុងវិស័យដូចជា ថាមពល គីមីឥន្ធនៈ ចំណីសត្វ ផ្លែឈើ យន្តហោះ និងគ្រឿងបន្លាស់ រួមទាំងឧបករណ៍សេវាកម្ម។ យុទ្ធសាស្រ្តនេះមិនប៉ះពាល់ដោយអ្នកផលិតក្នុងស្រុកទេ ដោយហេតុថា ថានឹងងាកចេញពីការនាំចូលពីប្រទេសដទៃ ហើយបង្កើនការនាំចូលពីអាមេរិកវិញ លើមុខទំនិញដែលខ្លួនទទួលការផ្គត់ផ្គង់ពីបរទេស។

*កំពង់ផែទឹកជ្រៅ Laem Chabang ក្នុងខេត្ត Chon Buri នៃប្រទេសថៃ*

៣. ការបើកទីផ្សារ៖ វានឹងធ្វើឡើងដោយកាត់បន្ថយរបាំងពាណិជ្ជកម្ម និងរបាំងមិនមែនពាណិជ្ជកម្ម ក៏ដូចជាកាត់បន្ថយការរឹតបន្តឹងលើទំនិញដូចជា ផ្លែឈឺរី ផ្លែប៉ោម ស្រូវសាលី និងផលិតផលសាច់។

៤. ដោះស្រាយបញ្ហាគេចវេះពាណិជ្ជកម្ម៖ ថៃនឹងអនុវត្តយ៉ាងតឹងរ៉ឹងនូវច្បាប់ស្តីពីប្រភពដើមទំនិញ ដើម្បីទប់ស្កាត់ការគេចវេះពន្ធគយ ឬរបាំងពាណិជ្ជកម្មផ្សេងទៀត។ បើតាមមន្រ្តីថៃ កិច្ចខិតខំប្រឹងប្រែងនេះត្រូវបានអនុវត្តរួចហើយ ដើម្បីបំពេញតាមការចង់បានរបស់មន្ត្រីគយអាមេរិក។

៥. ការជំរុញការវិនិយោគនៅសហរដ្ឋអាមេរិក៖ ប្រធានតំណាងពាណិជ្ជកម្មថៃ លោកស្រី Nalinee Taveesin ប្រធានសភាពាណិជ្ជកម្មថៃ លោក Poj Aramwattananont និងអ្នកតំណាងពីវិស័យឯកជននាំមុខគេរបស់ថៃ កំពុងស្ថិតនៅសហរដ្ឋអាមេរិក ដើម្បីចូលរួមក្នុងកិច្ចប្រជុំកំពូល Select USA Investment Summit 2025 ក្នុងការស្វែងរកឱកាសវិនិយោគ។

*រដ្ឋមន្ត្រីក្រសួងហិរញ្ញវត្ថុថៃ លោក Pichai Chunhavajira*

លោក Pichai បានពណ៌នាសំណើរបស់ថៃថាល្អ និងស្រដៀងនឹងអំពីសំណើរបស់ឥណ្ឌូណេស៊ី និងតៃវ៉ាន់ដែរ។ លោកបន្តថា ទាំងនេះត្រូវបានគេមើលឃើញថាជាសញ្ញាវិជ្ជមានពីអ្នកបង្កើតគោលនយោបាយរបស់សហរដ្ឋអាមេរិក ហើយរំពឹងថា នឹងមានការចាត់តាំងក្រុមការងារឱ្យពិនិត្យមើលព័ត៌មានលម្អិតបន្ថែមទៀត។

រដ្ឋមន្រ្តីដដែលនិយាយទៀតថា សំណើរបស់ថៃនឹងជួយកាត់បន្ថយអតិរេកពាណិជ្ជកម្មជាមួយសហរដ្ឋអាមេរិក ជាពិសេសជាមួយនឹងការនាំចូលគីមីឥន្ធនៈ ផលិតផលថាមពល និងយន្តហោះ៕