តម្លៃមាសឡើងជាង ១% វិញ ជុំវិញកម្សោយប្រាក់ដុល្លារ និងសេដ្ឋកិច្ច

តម្លៃមាសអន្តរជាតិបានកើនឡើងជាង ១ ភាគរយ ឡើងវិញ សម្រាប់ការជួញដូរនៅថ្ងៃព្រហស្បតិ៍ ដោយសារតែកម្សោយនៃប្រាក់ដុល្លារ និងទិន្នន័យសេដ្ឋកិច្ចអាមេរិក រួមជាមួយនឹង​ឧបសគ្គនៃការចរចាបញ្ចប់ជម្លោះអ៊ុយក្រែន។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

តម្លៃមាសជួញដូរដោយផ្ទាល់ បាន​កើនឡើង ៣៧,៩០ ដុល្លារ ឬ ១,១៩ ភាគរយ ដោយជួញដូរនៅតម្លៃ ៣ ២២៤,៧២ ដុល្លារ/អោន ​គិតត្រឹមម៉ោង ១០ និង ៣៣ នាទីយប់ ថ្ងៃព្រហស្បតិ៍ នៅក្រុងញូវយ៉ក (ម៉ោង ១០ និង ៣៣ នាទីព្រឹកថ្ងៃសុក្រ នៅក្រុងហុងកុង)។ មាសអាមេរិកវិញ បានកើនឡើង ១,២ ភាគរយ ដោយបញ្ចប់ការជួញដូរនៅតម្លៃ ៣ ២២៦,៦ ដុល្លារ/អោន។

ការស្ទុះឡើងវិញនៃតម្លៃមាសនេះ ក្រោយប្រាក់ដុល្លារ បាន​ធ្លាក់ចុះ ០,១ ភាគរយ កាលពីថ្ងៃព្រហស្បតិ៍។ ជាមួយគ្នានោះ ទិន្នន័យពីរដ្ឋាភិបាល​អាមេរិក​បាន​បង្ហាញថា ​សន្ទស្សន៍តម្លៃអ្នកផលិតនៅសហរដ្ឋ​អាមេរិក បានធ្លាក់ចុះដោយមិននឹកស្មានដល់ក្នុងខែមេសា ខណៈ​កំណើននៃការលក់រាយបានធ្លាក់ចុះ។ កាលពីដើមសប្តាហ៍នេះ របាយការណ៍មួយបានបង្ហាញថា តម្លៃអ្នកប្រើប្រាស់បានកើនឡើងតិចជាងការរំពឹងទុកនៅក្នុងខែមេសា។

កម្សោយនៃតួលេខ​អំពីសេដ្ឋកិច្ច​ អាចជាសញ្ញានៃភាពមិនប្រាកដប្រជានៃសេដ្ឋកិច្ច និងជួយបង្កើនលទ្ធភាពកាត់អត្រាការប្រាក់របស់ធនាគារកណ្ដាលអាមេរិក ដែលជាធម្មតាតែងធ្វើឱ្យអ្នកវិនិយោគងាកទៅទិញមាស ដែលគេរាប់ថាជាទ្រព្យសម្បត្តិសុវត្ថិភាព​។

កំណើនតម្លៃមាសដដែល​ ក៏រួមចំណែកផងដែរពីការដួលរលំនៃការចរចាសន្តិភាពពាក់ព័ន្ធនឹងសង្រ្គាមអ៊ុយក្រែន ក្រោយប្រធានាធិបតីរុស្ស៊ីលោក វ្ល៉ាឌីមៀរ ពូទីន មិនចូលរួមការចរចានៅប្រទេសតួកគី៕