ទំនុកចិត្តអ្នកប្រើប្រាស់ថៃ ធ្លាក់ចុះខ្លាំងនៅខែមេសា ដោយសារពន្ធ ត្រាំ

​​ទំនុកចិត្តអ្នកប្រើប្រាស់ថៃបានបន្តធ្លាក់ចុះនៅខែមេសា ពោលគឺ ៣ ខែជាប់ៗគ្នា ដល់កម្រិតទាបបំផុតក្នុងរយៈពេល ៧ ខែ ដោយសារតែការ​ព្រួយបារម្ភអំពីពន្ធគយរបស់សហរដ្ឋអាមេរិក និងការស្ទុះងើបឡើងវិញយឺតយ៉ាវនៃសេដ្ឋកិច្ច។ ​នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

​ការស្ទង់មតិរបស់សាកលវិទ្យាល័យសភាពាណិជ្ជកម្មថៃ ដែលចេញផ្សាយកាលពីថ្ងៃព្រហស្បតិ៍ បានបង្ហាញថា សន្ទស្សន៍អ្នកប្រើប្រាស់ថៃ​ បានធ្លាក់ចុះដល់ ៥៥,៤ ពិន្ទុ នៅខែមេសា ធៀបនឹង ៥៦,៧ ពិន្ទុ នៅខែមីនា។ ​

សាកលវិទ្យាធិការនៃសកលវិទ្យាល័យ លោក Thanavath Phonvichai បានប្រាប់សន្និសីទសារព័ត៌មាន​ថា​៖ «ទំនុកចិត្តបានធ្លាក់ចុះជាលំដាប់ ​ដោយសារតែសង្គ្រាមពាណិជ្ជកម្មជាចម្បង»។ លោក​បាន​បន្ត​ថា​៖ «​អំណាច​ទិញ​​បន្ត​នៅ​ទ្រឹង ដែល​បង្ហាញ​ថា​ទំនុក​ចិត្ត​នៅ​តែ​មាន​និន្នាការ​ធ្លាក់​ចុះ​» ខណៈ​បន្ថែម​ទៀត​ថា​​ អ្នកប្រើប្រាស់​ស្ទាក់​ស្ទើរ​ក្នុង​ការ​ទិញ​ ជា​ពិសេស​លើ​ទំនិញ​ប្រើប្រាស់​បាន​យូរ ផ្ទះ យានយន្ត និង​ការ​ធ្វើ​ដំណើរ​។

​គួរគូសបញ្ជាក់ថា ថៃនឹងប្រឈមមុខនឹងពន្ធគយបដិការ ៣៦ ភាគរយ របស់សហរដ្ឋអាមេរិក ប្រសិនបើការចរចាមិនបាន​សម្រេច មុនដើមខែកក្កដា ដែលជាពេលផុតកំណត់ការផ្អាកការអនុវត្តពន្ធគយបដិការ​របស់​ប្រធានាធិបតីអាមេរិក លោក ដូណាល់ ត្រាំ។ ​ក្នុងអំឡុងពេលផ្អាកនេះ សហរដ្ឋអាមេរិកបានកំណត់ពន្ធ ១០ ភាគរយ លើប្រទេសភាគច្រើន ​រួមទាំងថៃ។

លោក Thanavath បាននិយាយថា ប្រសិនបើពន្ធនៅតែ ១០ ភាគរយ សម្រាប់ប្រទេសភាគច្រើន នោះវាអាចកាត់បន្ថយកំណើនសេដ្ឋកិច្ចថៃរហូតដល់ ១ ភាគរយ នៅឆ្នាំនេះ។

កាលពីដើមខែ​កន្លងទៅ ក្រសួងហិរញ្ញវត្ថុ​ថៃ បានកាត់បន្ថយការព្យាករ​កំណើនសេដ្ឋកិច្ចសម្រាប់ឆ្នាំ ២០២៥ ​មកត្រឹម ២,១ ភាគរយ ពី ៣ ភាគរយ ក្នុងការព្យាករកាលពីលើកមុន ដោយសារតែពន្ធគយ និងភាពមិនប្រាកដប្រជាសេដ្ឋកិច្ចសកល​៕