វៀតណាមចាប់ផ្ដើមជុំថ្មីនៃការចរចាពន្ធជាមួយអាមេរិក

ក្រសួងពាណិជ្ជកម្មវៀតណាម​ បាន​និយាយក្នុងសេចក្ដីថ្លែងការណ៍ថា ជុំទី២ថ្មីនៃការចរចាពន្ធជាមួយសហរដ្ឋអាមេរិកបាន​ចាប់ផ្ដើមហើយ ដោយរំពឹងថានឹង​អាច​ឱ្យ​វៀតណាមបញ្ចៀសពន្ធគយបដិការ ៤៦ លើទំនិញ​នាំចូលអាមេរិក។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសេចក្ដីថ្លែងការណ៍នៅថ្ងៃអង្គារនេះ ក្រសួងបាន​និយាយថា ជុំថ្មីដែលចាប់ផ្ដើមកាលពីថ្ងៃចន្ទ នឹងបន្តរហូតដល់ថ្ងៃព្រហស្បតិ៍ ទី ២២ ខែឧសភា ខណៈជុំទី១ ធ្វើឡើងកាលពីដើមខែនេះ។

សេចក្តីថ្លែងការណ៍របស់ក្រសួង​បានបន្តថា៖ «ប្រទេសទាំង ២ មានការពិភាក្សាលើវិធីសាស្រ្តរួមក្នុងការដោះស្រាយមូលដ្ឋានបញ្ហា​នៃ​កង្វល់រួម​ និងការពន្លឿនដំណើរការចរចា»។ ក្រសួងបន្តថា៖ «វៀតណាម និងអាមេរិក ក៏កំពុងនិយាយអំពីគោលនយោបាយបច្ចុប្បន្ន ជាមូលដ្ឋានសម្រាប់ដំណើរការទៅជំហានបន្ទាប់»។

រដ្ឋមន្ត្រីពាណិជ្ជកម្មវៀតណាម លោក Nguyen Hong Dien ​បច្ចុប្បន្ន​កំពុងនៅទីក្រុងវ៉ាស៊ីនតោនសម្រាប់កិច្ចចរចា​។

គេមើលឃើញថា កន្លងមក​វៀតណាម​បាន​ចេញនូវវិធានការ ក៏ដូចជាស្នើលើករណីផ្សេងៗដើម្បីជាការចរចាពន្ធ រួមទាំងការបង្រ្កាបលើទំនិញប្រើប្រាស់វៀតណាមជាផ្លូវដឹកជញ្ជូនទៅអាមេរិកដើម្បីគេចពន្ធ ពង្រឹងការត្រួតពិនិត្យលើប្រភពកំណើតទំនិញ បង្រ្កាបទំនិញក្លែងក្លាយ ប្ដេជ្ញាបង្កើនការនាំចូលទំនិញអាមេរិក ក៏ដូចជាបើកផ្លូវដល់អាជីវកម្មអាមេរិកលើទឹកដីវៀតណាមជាដើម៕